Total Pageviews

Friday, 31 March 2017

வாருங்கள் வடம் பிடிப்போம்



1990 ஜூன் மாதம், ஏதோ ஒரு கிழமை நாள்.

இரண்டாவது ஈழ யுத்தம் தொடங்கி, கோட்டை அடிபாடுகள் தீவிரமாக நடந்து கொண்டிருந்த நாட்கள். அன்று காலை க.பொ.த சாதாரண தரப் பரீட்சை முடிவுகள் வெளிவரப் போவதாக உதயன் பத்திரிகையில் கொட்டை எழுத்துக்களில் செய்தி வந்திருந்தது. 

1989 டிசம்பர் மாதம் நடக்க வேண்டிய எங்கள் க.பொ.த சாதாரண தர பரீட்சை, நாட்டில் நிலவிய வன்முறை சூழ்நிலையால் 1990 மார்ச் மாதத்திற்கு பிற்போடப்பட்டது. தெற்கில் ஜேவிபி பயங்கரவாதம் தலைவிரித்தாட, வட கிழக்கில் ஈபிகாரன்களின் கட்டாய ஆட்சேர்ப்பும் மண்டையன் குழுவின் படுகொலைகளும் தாண்டவமாடிய கொடிய காலகட்டம்.

பேப்பர் வாசித்ததிலிருந்து அம்மா கந்தசஷ்டி சொல்லத் தொடங்கினா. "இவனுக்கு என்ன results வரப்போகுதோ" என்று அம்மா ஒரு பக்கம் ஏங்க, அப்பரோ "இன்றைக்கு மானம் போகப் போகுது" என்று பம்பலாக அம்மாவை உசுப்பேத்தி விட்டு, மானம் காக்கவென, என்னுடைய தொப்பியை எடுத்து தனது தலையில் அணிந்து கொண்டு, கறி வாங்க சந்தைக்குப் போய்விட்டார்.

விதான்ஸ் லேனுக்கால சைக்கிளை திருப்பி, வைரவர் கோவிலடியில் சைக்கிள் சீட்டால் எழும்பி வைரவரிற்கு வணக்கம் வைத்து விட்டு,  இளங்கோவின் வீட்டடியை அடைகிறேன். இருவருமாக இணைந்து கல்லூரி நோக்கி சைக்கிளை மிதித்தோம், இருவருக்கும் டென்ஷனாக இருந்ததால் பெரிதாக இருவரும் கதைக்கவில்லை. 

பரி யோவான் கல்லூரி வளாகத்திற்குள் எங்கட SJC92 batch கூடத் தொடங்கியது. SJC92 batch, கல்லூரிக்கு அழியாப் பெருமை சேர்த்த நாளாகவும், வாழ்வில் கடைசி முறையாக கல்லூரி வளாகத்தினுள் நாங்கள் அனைவரும் ஒன்றிணைந்த நாளாகவும், அந்த நாள் அமைந்தது.  சிறிது நேரத்தில் எல்லோரையும் Principal officeற்கு முன்னாலிருந்த வகுப்பறைகளிற்கு போகுமாறு உத்தரவு வந்தது. நீண்ட வெள்ளைக் காகிதங்களைக் கட்டாகத் தூக்கிக் கொண்டு கணபதிப்பிள்ளை மாஸ்டர்  ஒரு வகுப்பறைக்குள் நுழைகிறார். 


அன்று அந்த வகுப்பறையில் நிலவிய அசாரண அமைதியின் சத்தத்தில் காது வெடித்தது. பாடங்களிற்கான பெறுபேறுகளை அறிவிக்கும் ஒழுங்கு முறையை அறிவித்து விட்டு, மாணவர்களின் பெயர்களின் alphabetical ஒழுங்கில் பெறு பேறுகளை அறிவிக்கத் தொடங்கினார், கணபதிப்பிள்ளை மாஸ்டர். ஒரு நீண்ட rulerஐ கடதாசியில் பிடித்து பிடித்து ஒவ்வொரு மாணவனதும் பெறுபேறுகளை உரக்க வாசிக்கிறார். 


"Nimalan, G" ஒருக்கா தலையை நிமிர்த்தி, எழும்பி நின்ற நிமலனை ஒரு பார்வை பார்க்கிறார். "All D's...congratulations.. you may go" ஹொஸ்டலில் தனது மேற்பார்வையில் வளர்ந்து, ட்யூஷன் எதற்கும் போகாமல், பரி யோவானின் ஆற்றலும் அக்கறையும் மிகுந்த ஆசிரியர்களிடம் மட்டும் கல்வி கற்று, அனைத்து பாடங்களிலும் D எடுத்த மாணவனை புன்முறுவலுடன் கைகுலுக்கி அனுப்பி வைத்து விட்டு, அடுத்த மாணவனின் பெறுபேறை வாசிக்கிறார், கணபதிப்பிள்ளை மாஸ்டர்.

என்னுடைய முறையும் வருகிறது, இதயம் படபட என்று அடிக்க, பரலோகத்தில் இருக்கும் பிதாவே சொல்லத் தொடங்கினேன். கணபதிப்பிள்ளை மாஸ்டர் வாசிக்க வாசிக்க, காகிதத்தில் எழுதுகிறேன், D......D......C....கடைசிப் பாடம் Art.. அதுவும் C. கணபதிப்பிள்ளை மாஸ்டரின் அருகில் சென்று "சேர், ஒருக்கா திரும்ப check பண்ணுறீங்களா" என்று பணிவாக கேட்டேன்.

"ஏன் ஐசே உமக்கு என்ன doubt" கணபதிப்பிள்ளை மாஸ்டரிற்கு விசர் வந்தது. " இல்லை சேர், Artற்கு C வந்திருக்கு...அதான்" இழுத்தேன். ஒவ்வொரு தவணைப் பரீட்சையிலும் Artற்கு 40 தாண்டாது, சுட்டுப் போட்டாலும் வரைதல் வரவே வராது. தேவராஜா மாஸ்டரிடம் வாங்கிய அடியில் சித்திரப் பாடமே கதிகலங்கி போயிருக்க, இறுதிப் பரீட்சையில் C என்றால் என்னென்று நம்புவது. மீண்டும் ஓரு முறை rulerஐ வைத்து, பெறுபேறுகளைச் சரி பார்த்து விட்டு "ஐசே, நான் சரியாத் தான் சொன்னனான்.. நீர் போம்" கணபதிப்பிள்ளை மாஸ்டர் கடுப்பானார்.

வீட்ட போய், பெறுபேறுகளைச் சொல்ல, Artற்கு C வந்ததையும் Mathsற்கு D வந்ததையும் நம்பாத அம்மா, அப்பாவை கல்லூரிக்கு அனுப்பி பெறுபேறுகளை உறுதிப்படுத்தி வரச் சொல்லி அனுப்பின கதையையும் வரலாறு பதிவு செய்தது. 


பரி யோவானில் ஆறு பேரிற்கு அந்த முறை 8D வந்திருந்தது. அந்த அறுவரில் ரமோ, கணா, கோபால், நிமலன் அடக்கம். க.பொ.த சா.த பரீட்சையில், யாழ்ப்பாண மாவடத்தில், பரி யோவான் முதலிடம் பிடித்த கடைசி ஆண்டாக அது அமைந்தது என்று நினைக்கிறேன். அகில இலங்கையிலும் யாழ்ப்பாண மாவட்டம் முன்றாம் இடத்தை பிடித்திருந்தது, கொழும்பும் கண்டியும் முதலிரு இரு இடங்களைப் பிடித்திருந்தன. 

25 ஆண்டுகள் கடந்து...

அந்தக் காலத்தில் கல்வியில் கலக்கிய யாழ்ப்பாண மாவட்டத்தின் க.பொ.த சா.த பரீட்சையின் பெறுபேறுகள் சம்பந்தமான ஒரு அறிக்கையை அண்மையில் வாசிக்க வாசிக்க  வேதனை தான் வந்தது. அண்மையில் வெளிவந்த க.பொ.த சாதாரண தரப் பரீட்சைக்கு யாழ்ப்பாணத்திலிருந்து தோற்றிய பத்தாயிரம் சொச்ச மாணவர்களில், 37% வீதமானோர் உயர்தரம் படிக்க மாட்டார்கள் என்ற கசப்பான உண்மையை ஜீரணிக்க முடியாமலிருக்கிறது. 

 

1970களில் மறுக்கப்பட்ட கல்வி உரிமை,  ஆயுதமேந்திய விடுதலைப் போராட்டத்திற்கு இளைஞர்களை உந்தியதில் முக்கிய பங்கு வகித்தது. வீறுகொண்டெழுந்து, தாயகத்திற்காக தங்கள் இன்னுயிரை தியாகம் செய்த மறவர்களால் வழிநடத்தப்பட்ட, விடுதலைப் போராட்டம் மெளனிக்கப்பட்டு எட்டாண்டுகள் கடந்த நிலையில், கல்வியில் தமிழர் மாவட்டங்கள் பின் தங்கியுள்ள நிலைமைக்கு நாங்கள் அனைவருமே பொறுப்பாளிகள்.


பாடசாலைகளில் அக்கறையாக கற்பிக்காத ஆசிரியர்கள், புதுசு புதுசாக கட்டிடங்கள் கட்டுவதில் மட்டும் குறியாய் இருக்கும் அதிபர்கள், கலை நிகழ்ச்சிகளும் இரவு விருந்துகளும் நடாத்தி காசு சேர்க்கும் புலம் பெயர்ந்த பழைய மாணவர்கள் என்று குற்றவாளிக் கூண்டில் பலரை எற்றலாம். இவர்களை எல்லோரையும் விட இந்த கீழ் நிலைக்கு யாழ்ப்பாண மாவட்டம் செல்ல பிரதான காரணமானவர்கள், கல்வியில் அக்கறை செலுத்தாது வெளிநாட்டு பணத்தில் திளைத்து,  வெளிநாடு போகும் மோகத்துடன் வாழும் பெற்றோர்களும் பிள்ளைகளும் தான். 


குற்றவாளிக் கூண்டில் ஏற்றப்பட வேண்டியவர்கள் பட்டியலில் இணைந்து கொள்ளப்பட வேண்டிய முக்கியமான மற்றுமிருவர், வட மாகாண சபையின் கல்வி அமைச்சரும் வட மாகாண சபையின் முதலமைச்சரும் தான். இலங்கையின் 25 மாவட்டங்களில், கடைசி 5 இடங்களை பிடித்த மாவட்டங்களில் 3 மாவட்டங்கள் வடமாகாண சபையின் ஆளுகைக்கு உட்பட்டவை. வடமாகாணத்தின் கல்வியில் பின்தங்கியுள்ள இந்த நிலைமை, வடமாகாண சபையின் வினைத்திறனை நோக்கி கேள்வி எழும் வினாக்களிற்கு வலுச்சேர்க்கிறது.


வடமாகாணத்தின் கல்வி நிலை தொடர்பான இந்த அறிக்கையைப் பற்றி அறிந்ததும், நாங்கள்  வடமாகாண கல்வி அமைச்சரின் கொடும்பாவியை எரிக்கப் போகிறோமா? இல்லை, முதலமைச்சரை இருத்தி வைத்து "வடமாகாணத்தில் தமிழர் ஆட்சியில் கல்வித்தரம் முன்னேறியுள்ளதா பின்தங்கியுள்ளதா" என்று பட்டிமன்றம் நடாத்தப் போகிறோமா?


சாதாரண தரத்தில் வெற்றி பெறும் மாணவர்களைக் கொண்டாடும் நாங்கள், சித்தியடையாத மாணவன் பற்றியும் சிந்திக்க வேண்டாமா? கல்விச் செயற்பாடுகளிலிருந்து விலகும் மாணவனே, வாள் வெட்டு குழுக்களிலில் இணைந்து தானும் நாசமாகி, சமூகத்தையும் சீர்குலைக்கிறான் என்று எண்ணத் தோன்றுவது தவறா? விரக்தியடையும் அந்த மாணவன் போதைக்கு அடிமையாக வாய்ப்புக்கள் அதிகமில்லையா?


இவ்வாறு வினாக்களை அடுக்கிக் கொண்டு போன போது, நண்பன் ஒருவன் 2014ல் தமிழ்க் கல்வியாளர்களால் யுத்தத்தால் பாதிக்கப்பட்ட வடகிழக்கில், கல்வியை அபிவிருத்தி செய்வது பற்றிய ஆய்வறிக்கையை உட்பெட்டியில் அனுப்பினான். வடமாகாண சபையின் அனுசரணையில், புலம்பெயர் கல்வியாளர்கள் வழிகாட்ட, தாயகத்தில் கல்விப் பணியாற்றும் அதிகாரிகள், ஆசிரியர்கள் மற்றும் கல்வி பயிலும் மாணவர்கள் அவர்தம்  பெற்றோர்கள் என்போரது கருத்துக்களையும் அவதானங்களையும் உள்வாங்கி Bottom Up அணுகுமுறையில் தயாரிக்கப்பட்டது தான் இந்த Northern Education System Review (NESR) அறிக்கை.


தமிழர்களால் தமிழர் தாயகப் பிரதேசங்களில் கல்வியை முன்னேற்ற தயாரிக்கப்பட்ட NESR அறிக்கையை வாசித்த, மத்திய அரசும் பிற சிங்கள மாகாணங்களும், அறிக்கையில் தெரிவிக்கப்பட்ட பெறுமதியான ஆலோசனைகளை நடைமுறைப்படுத்த, எங்கள் வடமாகாண சபை மட்டும் இந்த அறிக்கையின் பரிந்துரைகளை துரித கதியில் செயற்படுத்துவதில் இன்றுவரை அதீத ஆர்வம்  காட்டவில்லை என்பது வேதனையளிக்கிறது.


NESR அறிக்கையின் சில பரிந்துரைகளை அமுல்படுத்தி விட்டு, மீதியை நடைமுறைப்படுத்த மத்திய அரசு போதிய நிதி ஒதுக்காமை போன்ற நொண்டிச் சாட்டுக்களை வடமாகாண சபை சொல்லிக்கொண்டு இருக்கிறதாம். இந்த சோம்பேறித் தனமும் தட்டிக் கேட்பாரற்ற கேவலமான நிலையும் தொடர, எங்கள் மாவட்டங்கள் தொடர்ந்தும் பின்தங்கிய நிலையில் நிற்கின்றன. இந்த நிலை தொடர்ந்தால் எங்கள் தாயகத்தில் ஏற்படப்போகும் சமூக பாதிப்புக்கள் நிட்சயமாக பாரதூரமானவையாக இருக்கும். 


வடமாகாணமெங்கும் கல்விக்கு முன்னுரிமை கொடுத்து, நாமெல்லோரும் சேர்ந்து வடம் பிடிக்க வேண்டிய காலம் வந்துவிட்டது. நிரந்த அரசியல் தீர்விற்கு பின்னர் கல்வி அபிவிருத்தி பற்றி சிந்திப்போம் என்றிருந்தால் "ஐயர் வரும் வரை அமாவாசை காத்திருக்க வேண்டும்" என்று அடம்பிடித்த கதையாகத் தான் முடியும். 


வாருங்கள்..கல்வி எனும் தேரின் வடம் பிடிப்போம், வடமாகாணத்தை மீண்டும் கல்வியில் வளமாக்குவோம்,  இழந்த மாட்சிமையை மீண்டும் கொண்டு வருவோம். வாருங்கள் வடம் பிடிப்போம்!

 

 

Friday, 24 March 2017

அந்த ஒரு மணித்தியாலம்... 1982 Big Match


 

194 ஆண்டுகால பழமை வாய்ந்த பரி யோவான் கல்லூரிக்கு என்று பல சிறப்பம்சங்கள் உண்டு. அந்த சிறப்பம்சங்களில் பிரதானமானது, காலங் காலமாக, தலைமுறை தலைமுறையாக, பேணப்பட்டும் காவப்பட்டும் வரும் விழுமியங்கள் (Values). பாடசாலையின் பிரதான வாயிலின் முகப்பைத் தாண்டி உள்நுழையும் ஒவ்வொரு மாணவனிலும் ஏதோ ஒரு வகையில் இந்த விழுமியங்கள் உள்நுழைக்கப்படும், மாணவனாலும் உள்வாங்கப்படும்.

பரி யோவானின் விழுமியங்கள் காலங்கள் கடந்தும் அந்த மாணவனின் வாழ்வில் நிலைத்து நிற்கும். வாழ்விலே ஏதோவொரு சந்தர்ப்பத்தில் சவால்களை சந்திக்கும் போது இந்த விழுமியங்களே ஜொனியன்ஸிற்கு கைகொடுக்கும்.

Pitch may be bumby
Light may be blinding, but
Johnians always play the game

என்ற வாசகங்கள், ஜொனியன்ஸ் விளையாட்டுக் களத்தில் மட்டுமன்றி வாழ்க்கை எனும் களத்திலும் என்றுமே கடைசி வரை போராட வேண்டும், அதுவும் நேர்மையாக போராட வேண்டும் என்ற நற்பண்பை வலியுறுத்த, ஒவ்வொரு ஜொனியினின் மண்டைக்குள்ளும் விதைக்கப்படும் விழுமியம், தாரக மந்திரம்.

1982 Big Matchல் பரி யோவான் அணி, இரண்டாவது இன்னிங்ஸில் 126/9 என்ற இக்கட்டான நிலையில் நின்ற போது, களத்தில் நின்ற விக்னபாலனையும்
விஜயராகவனையும் மனந்தளராது போராட வைத்தது இந்த ஜொனியன் விழுமியம் தான். 

வெற்றியின் விளிம்பில் நின்று வெற்றிக் கொண்டாட்டத்திற்கு ஆயத்தமான மத்திய கல்லூரி அணியை விரக்தியடையச் செய்தது, பரி யோவான் அணியின் கிரிக்கெட் வல்லமை அல்ல, "நான் ஒரு ஜொனியன், நான் கடைசிவரை நேர்மையாக போராடுவேன்" எனும் விழுமியத்தை அடித்தளமாக கொண்ட, இறுமாப்பு நிறைந்த ஓர்மம் தான்.

"மச்சான், முதல் அஞ்சு பந்தை நான் பசையுறன், கடைசி பந்தை தட்டிவிட்டு ஓடுவம், சரியாடா" Batஜ கமர்க்கட்டுக்குள் பிடித்தபிடி வந்த விஜயராகவனிற்கு விக்னனபாலன் கூறிய பொன் மொழிகள். விஜயராகவன் வந்த முகூர்த்தம், மத்திய கல்லூரி அணி New ball எடுக்கவும் சரியாகவிருந்தது.

மணிக்கூட்டு கோபுர முனையிலிருந்து தோமஸ் வேகமெடுக்க, சுப்ரமணிய பூங்கா முனையிலிருந்து உமாசுதனும் சுதர்ஷனனும் புயலாய் பந்து வீசினார்கள். "மச்சான், காலை முன்னுக்கு வைத்து, batஐ காலுக்கு பின்னால் வைத்து விளையாடு" ஓவர் நடுவில் விக்கனபாலனின் உபதேசம் நடக்கும். "டேய் back footல மட்டும் போய்டாதாடே, காலில் பட்டுச்சோ, umpire தூக்கிக் குடுத்துடாவான்" விக்னபாலனின் பிரசங்கத்தை புன்முறுவலுடன் விஜயராகவன் கேட்பார்.

மைதானத்தின் ஓரத்தில் மத்திய கல்லூரி மாணவர்களும் பழைய மாணவர்களும் ஆதரவாளர்களும், தங்கள் அணி இந்தா வெற்றி பெறப் போகிறது, காண்பதற்கரிய ஒரு வரலாற்று வெற்றியை தங்கள் அணி பெறப் போகிறது, என்ற ஆனந்தத்தில் மைதானத்திற்குள் ஓடத் தயாராகிக் கொண்டிருந்தார்கள்.

மத்திய கல்லூரி அணியின் பந்து வீச்சாளர்கள் வீசும் பந்துகளை, விக்னபாலன் தரையோடு தடவி தடுத்தாட, மத்திய கல்லூரி அணியினரின் விரக்தி அதிகரித்தது. silly mid-on, silly mid-off, silly point, Gully , இரண்டு slips மற்றும் forward short leg என பரி யோவானின் துடுப்பாட்டக்கானை சுற்றி பத்ம வியூகமே அமைத்திருந்தார் மத்திய கல்லூரி அணியின் தலைவர் தோமஸ்.

விக்னபாலன் தடுத்தும் மறித்தும் ஆடிய விதம் அவருக்கு "பசைவாளி" என்ற பட்டத்தையும், அதற்கு பிறகு பரி யோவானில் மட்டுமல்ல, யாழ்ப்பாணத்தில் யார் நொட்டி விளையாடினாலும், "இவன் பசையலில விக்னபாலனை விஞ்சுவான்டா" என்ற அழியாப் புகழையும் சேர்த்தது.

 

பன்னிரெண்டாவது அல்லது பதின்மூன்றாவது
ஓவராக இருக்கலாம். Off stumpsற்கு சற்று வெளியே விழுந்த பந்தை விக்னபாலன் ஓங்கி அடிக்க, பந்து மட்டையின் நுனியில் பட்டு இரண்டாவது slipsல் நின்ற பிரதீபனிடம் போகிறது. தாவி பந்தைப் பிடிக்க முயன்ற , பிரதீபனின் கை விரலில் பட்டு நிலத்தில் விழுகிறது. மத்திய கல்லூரி அணி வெற்றி பெறக் கிடைத்த சந்தர்ப்பம் ஒன்று கை நழுவிப் போகிறது.


அந்தக் கடைசி மணித்தியாலத்தில் மத்திய கல்லூரி அணி மூன்று சந்தர்ப்பங்களை தவறவிட்டதாக போல் பிரகலாதன் அண்ணா நம்புகிறார். விக்னபாலன் அண்ணாவோ "நாங்க ஒரே ஒரு chance தான் குடுத்தனாங்க, அதுவும் நான் close field settingஐ உடைக்கவென்று அடிக்க வெளிக்கிட்ட படியால்" என்று நீண்ட விளக்கம் தந்தார்.

 

பத்து ஓவர்கள் பரி யோவானின் கடைசி துடுப்பெடுத்தாட ஜோடி ஆடிவிட்டது. மத்திய கல்லூரி அணியின் பிரதித் தலைவர் போல் பிரகலாதன் தனது தலைவரை அணுகுகிறார். "தோமஸ், நீ spin போடுடா" போலின் அறிவுரையை தோமஸ் உதறிவிடுகிறார். "பந்து இன்னும் புதுசா எல்லோ இருக்கு, இப்ப பறக்குது பார்" என்று சொல்லி விட்டு வேகப் பந்து வீச தோமஸ் தயாராகிறார். தோமஸ் ஒரு மிகச்சிறந்த சுழல் பந்து வீச்சாளர், அவர் ஆட்டத்தின் அந்த கடைசி ஒரு மணித்தியாலத்தில் ஒரு ஓவர் கூட சுழல் பந்து வீசாது விட்டது ஆட்டத்தின் தலைவிதியை மாற்றப் போகிறது என்பதை அவர் அப்போது உணரவில்லை.

பரி யோவான் அணி வீரர்களிற்கு தண்ணீர் கொண்டு வந்த ஷண்டி ரவிச்சந்திரனும் "எதையாவது குடுங்கோடா, batஐ மட்டும் குடுத்திடாதீங்கோடா" என்று கெஞ்சி விட்டு ஓடுகிறார். மத்திய கல்லூரி அணியோ ஓவர்களிற்கிடையிலான மாற்றங்களை அதி வேகமாக முடித்து, மீண்டும் மீண்டும் பந்து வீச தயாராகிக் கொண்டு இருக்கிறது.

"இப்ப விழும் பாரடா" என்று மத்திய கல்லூரி ஆதரவாளர்கள் இலவு காக்க, பரி யோவான் பாசறையிலோ ஓரிரண்டு மேளங்கள் மட்டும் அப்போதும் இப்போதும் முழங்க, College College .. St Johns College கோஷம் ஈனஸ்வரத்தில் கேட்கிறது. "டேய்.. யாரும் groundsற்குள் ஓடக் கூடாது" வெற்றியின் விளிம்பில் நின்ற மத்திய கல்லூரி ஆதரவாளர்களின் கட்டுப்பாடு ஆச்சரியப்பட வைக்கவில்லை.


"அண்ணே, அந்த கடைசி மணித்தியாலம் umpiring எப்படி இருந்து" போல் அண்ணாவை கேட்டேன். "நாங்க நிரம்ப தரம் lbற்கு appeal பண்ணினாங்கள் தான். ஆனா நான் நினைக்கேல்ல ஒன்று கூட out என்று" போல் பிரகலாதன் எனும் யாழ்ப்பாணத்தின் உன்ன விளையாட்டு வீரர்களில் ஒருவரின் வார்த்தைகளில் வெளிப்பட்டது உண்மையான sportsmanship. "எல்லாம் வெளில போன பந்துகள் அல்லது height கொஞ்சம் கூட, நான் mid onல தான் நின்றனான்" போல் அண்ணாவின் குரலில் இன்றும் வெற்றியைத் தவறவிட்ட ஏமாற்றம் எதிரொலித்தது.

இருபதாவது mandatory over... மைதானம் எங்கும் பதற்றம். வெற்றி கை நழுவி போகுமோ என்று மத்திய கல்லூரியினர் ஏங்க, தோல்வியிலிருந்து மீண்டு விடுவோம் என்ற நம்பிக்கை பரி யோவான் பாசறையில் துளிர் விடத் தொடங்கியது. பரி யோவான் அணி தங்கியிருந்த சிறிய கொட்டிலிற்கு முன்னாலும் சனம் கூடிவிட, கொட்டிலிலிருந்த வாங்குகளில் ஏறி நின்று தான் பரி யோவான் அணி ஆட்டத்தை பார்க்கிறது.


இருபதாவது ஓவரின் கடைசி பந்தை விக்னபாலன் மறித்து ஆட, பரி யோவான் மாணவர்களும் ஆதரவாளர்களும் மைதானத்திற்குள் பாய்ந்து விட்டார்கள்.

நேரம் பிற்பகல் 4:50

மைதானத்தின் நடுவில் பரி யோவான் மாணவர்கள் ஆரவாரிக்க, மத்தியஸ்தர்கள் மட்டும் அசையவில்லை. ஆட்டம் இன்னும் முடியவில்லை, ஆட்டம் முடிய இன்னும் இரண்டு ஓவர்கள் இருக்கிறது என்று அறிவித்தார்கள். மத்திய கல்லூரி அணியினர் ஒரு மணித்தியாலத்தில் வீச வேண்டிய 20 mandatory ஓவர்களை 50 நிமிடங்களில் வீசியதால், மத்திய கல்லூரி பந்துவீச இன்னும் இரண்டு ஓவர்கள் கிடைத்துள்ளது என்ற இடியைத் தூக்கி போட்டார்கள்.

மீண்டும் திக் திக் திக்...

இருபத்தோராவது ஓவரை விஜயராகவனும் "பசைவாளி" விக்னபாலனும் ஒருவாறு நொட்டி சமாளித்து விட்டார்கள். ஆனால் திட்டமிட்ட படி அந்த ஓவரின் கடைசி பந்தில் விக்னபாலன் மறுமுனைக்கு ஓட முடியாமல் மத்திய கல்லூரி அணியின் பந்து வீச்சும் களத்தடுப்பும் விடவில்லை.

இருபத்திரண்டாவது ஓவர், கடைசி ஓவர்

மணிக்கூட்டு கோபுர முனையிலிருந்து தோமஸ் பந்துவீச சுப்ரமணிய பூங்கா முனையில் விஜயராகவன் துடுப்பெடுத்தாட எதிர் கொள்கிறார்.

முதலாவது பந்து.. நேரடியாக விக்கெட் காப்பாளரிடம் செல்கிறது

இரண்டாவது பந்து..எகிறி வந்த பந்து, விஜயராகவனின் தோளில் பட்டு விழுகிறது, வலியை தாங்கிக் கொள்கிறார்

மூன்றாவது பந்து.. முன்னால் வந்து தடுத்தாட அவரது padsல் படுகிறது, bat பின்னால் நிற்கிறது. How is that என்று அணியோடு சேர்ந்து மத்திய கல்லூரியே கத்த, umpire அசையவில்லை

நான்காவது பந்து, மீண்டும் ஒரு bouncer. தலையை குனிந்து batஐ கொடுக்காமல் தப்பி விடுகிறார், விஜயராகவன்

ஐந்தாவது பந்து வீச முன்னர், விஜயராகவனருகில் வந்த விக்னபாலன், அவரை தோளில் தட்டி விட்டு செல்கிறார், வார்த்தைகள் வரவில்லை. ஐந்தாவது பந்து தரையோடு மறித்து விஜயராகவன் ஆட, பரி யோவான் பாசறையில் ஆரவாரம் கேட்க தொடங்கியது.

கடைசிப் பந்து.. எல்லைக் கோட்டை சூழ்ந்து பதினைந்தாயிரத்திற்கு மேற்பட்ட மக்கள் கூட்டம் ஆரவாரிக்க, என்ன நடக்குமோ என்று எட்டிப்பார்க்க மணிக் கூட்டு கோபுரமும் ஒரு நிமிடம் ஓய்வெடுக்க, பண்ணைக் கடலில் மறைந்து கொண்டிருந்த சூரியனும் மட்ச் பார்க்க ஒரு கணம் தாமதிக்க, மைதானத்தில் இருந்த அனைவரின் இதயமும் படபடக்க...

பந்தை வீச தோமஸ் வேகமாக ஓடி வருகிறார்.. விஜயராகவனிற்கு முன்னால் விழுந்து எழும்பிய பந்திற்கு batஐ கொடுக்காமல் தனது நெஞ்சில் பந்தை வாங்குகிறார் விஜயராகவன்.

Match Draw..
 
 

மறுமுனையிலிருந்து ஓடி வந்த விக்னபாலன் விஐயராகவனை கட்டிப்பிடிக்க, பரி யோவானின் பரிவாரங்கள் மைதானத்தில் ஆரவாரத்துடன் குவிய, பரி யோவானின் சிவப்பு கறுப்பு கொடிகள் காற்றில் அசைந்தாடுகின்றன. விக்னபாலனையும் விஜயராகவனையும் தோளில் தூக்கி, ஆனந்த தாண்டவம் ஆடுகிறார்கள் பரி யோவானின் மாணவர்கள். தோல்வியின் விளிம்பிலிருந்து மீட்ட மீட்பர்கள் இருவரின் பெயர்களும் பரி யோவான் வரலாற்றில் பொறிக்கப்படுகின்றது.

மைதானத்தின் மத்தியிலிருந்து பரி யோவான் அணியின் கொட்டிலை நோக்கி தூக்கி வரப்படும் கதாநாயகர்களை நோக்கி
வெள்ளை Shirtம் வெள்ளை Pantsம் அணிந்த ஒரு உயர்ந்த கம்பீரமான உருவம் மைதானத்திற்குள் ஓட்டமும் நடையுமாக
வருகிறது. அந்த கம்பீரமான மனிதனருகில் வந்ததும் விக்னபாலனும் விஜயராகவனும் தோளிலிருந்து இறக்கப்படுகிறார்கள், ஆரவாரமும் சற்று அமைதியடைகிறது.

அடுத்த கணம், அந்த ஆளுமை நிறைந்த மனிதர், விக்னபாலனையும் விஜயராகவனையும் இறுக்க கட்டிப்பிடித்து, முதுகில் தட்டுகிறார், "well done Boys". தங்களை இறுக்கிக் கட்டிப்பிடித்தவரை பார்த்து விக்னபாலனும் விஜயராகவனும் மட்டுமல்ல முழு பரி யோவான் சமூகமே திகைப்பில் திளைத்தது. அந்த திகைப்பிற்கு காரணமானவர் கண்டிப்பற்கும் ஒழுக்கத்திற்கும் பெயர் போன பரி யோவானின் மிகச்சிறந்த அதிபர்களில் ஒருவரான, CE ஆனந்தராஜன்.

கிசு கிசு
ஆட்டத்தின் கடைசி மணித்தியாலத்தை விக்னபாலனின் "கிளி" பார்த்ததாம். மிகுதிக் கதையை கூற அவரது உன்னத நண்பர்கள் மறுத்துவிட்டார்கள்.

கொசுறு
நொட்டி நொட்டி பரி யோவான் அணியை காப்பாற்றிய விக்னபாலனிற்கு, பரி யோவான் பழைய மாணவனும், பரி யோவானின் scoreboard கட்டியவர்களில் ஒருவருமான, தொழிலதிபர் ராஜசிங்கம், தனது கழுத்தில் தொங்கிய தங்கச் சங்கிலியை பரிசளித்தாராம். 125 ஓட்டங்கள் அடித்து Man of the Match ஆக தெரிவான போல் பிரகலாதனிற்கு கிடைத்த பரிசுப்பணம் ரூபாய் 500.

1982ம் ஆண்டு Big Matchன் Best Allrounder ஆக உமாசுதனும், Best Batsman ஆக போல் பிரகலாதனும் Best Bowler ஆக தோமஸும் Best Fielder ஆக பரி யோவானின் DM ரவீந்திராவும் விருதுகளைப் பெற்றார்கள்

வெற்றியின் விளிம்பில்..1982 Big Match (Part 2)

1982 Big Match (Part 1)


Friday, 17 March 2017

வெற்றியின் விளிம்பில்..1982 Big Match


யாழ்ப்பாணத்தின் மிடுக்கு போல கம்பீரமாக நிமிர்ந்து நின்ற யாழ் மணிக்கூட்டு கோபுரத்தில் காலை ஒன்பது மணியடிக்க, umpire சொன்ன "play", மைதானத்தில் எழுந்த விண்ணதிரும் கோஷங்களிலும் கரகோஷத்திலும் கரைந்து போக, யாழ் மத்திய கல்லூரி அணியின் தலைவர் தோமஸ், 84வது வடக்கின் பெரும் போரின் முதலாவது பந்தை, பரி யோவான் கல்லூரி அணியின் தலைவர் DM ரவீந்திராவை நோக்கி வீச ஓடி வந்து கொண்டிருந்தார். 

பரி யோவான் அணியின் ஆரம்பத் துடுப்பாட்ட வீரர்களான DM ரவீந்திராவும் DS ஞானரட்ணமும் நிதானமாக துடுப்பெடுத்தாடினார்கள். சுப்ரமணியம் பூங்கா முனையிலிருந்தும் மணிக்கூட்டு கோபுர முனையிலிருந்தும் மத்திய கல்லூரியின் நட்சத்திர வேகப்பந்து வீச்சாளர்களான தோமஸ், உமாசுதன், சுதர்ஷனன், மனோஜ்குமார் விசிய பந்துகளை லாவகமாக விளையாடி, பரி யோவான் அணி ஓட்டங்களை குவித்துக் கொண்டிருந்து. 

மத்திய கல்லூரி மைதானத்தின் யாழ் பொது நூலகம்  பக்கம் பரி யோவான் மாணவர்களிற்கும், மைதானத்தின் மறுமுனையான மத்திய கல்லூரி பக்கம் மத்திய கல்லூரி ஆதரவாளர்களிற்கும் ஒதுக்கப்பட்டிருந்தது. இரு கல்லூரி கொடிகளும் காற்றில் பறந்தாட, தகர டப்பாக்கள் மேளங்களாக, தங்கள் கல்லூரி அணியை ஆடியும் பாடியும் உற்சாகப்படுத்த இரு கல்லூரி மாணவர்களும் ஆனந்தமாக ஆரவாரித்தார்கள். 

பரி யோவானின் கல்லூரி அணி  50/0 ஓட்டங்களை எடுத்த வேளை, தோமஸின் அபாரமான பந்துவீச்சிலும் களத்தடுப்பாலும் அவரிடமே பிடிகொடுத்து DM ரவீந்திரா (27) ஆட்டமிழந்தார். ரவீந்திராவை தொடர்ந்து ஆட வந்த N பிரபாகரன் (01), தோமஸின் சுழல் பந்துவீச்சில் மணிவண்ணனால் Stumped ஆக, R மகிந்தாவோ (07) சுதர்ஷனனின் வேகப்பந்து வீச்சிற்கு மணிவண்ணனிடம் பிடி கொடுத்து ஆட்டமிழந்தார். பட பட என மூன்று விக்கெட்டுகள் விழ, ஆட்டம் கண்ட பரி யோவான் அணியின் முதலாவது இன்னிங்ஸை தூக்கி நிறுத்தியது  ஞானரட்ணமும் (38) ஜூட் ஜோசப்பும் (26) தான்.

மதிய இடைவேளைக்கு முன்னர் ஞானரட்ணம்,  தோமஸின் பந்து வீச்திலும்,  ஜூட் ஜோசப் அநியாயமாக run out முறையிலும் ஆட்டமிழக்க மத்திய கல்லூரி அணியின் பாசறையில் உற்சாகம் பொங்கிப் பிரவாகித்தது. பரி யோவானின் அதிரடி ஆட்டக்காரன் விக்னபாலனின் (01) விக்கெட் தோமஸ் வீசிய பந்தில் சிதற, பரி யோவான் ஆதரவாளர்களின் முகத்தில் கலவரம் படர்ந்தது. முதலாவது நாள் மதிய இடைவேளைக்கு அணிகள் மைதானத்தை விட்டு விலகும் போது பரி யோவான் அணி 126/6.

மதிய இடைவேளையில் மத்திய கல்லூரி அணி என்ன சாப்பிட்டதோ தெரியாது, மீதமிருந்த நான்கு பரி யோவான் அணி விக்கெட்டுக்களையும் அரை மணித்தியாலத்திற்குள் சரித்து, பரி யோவான் அணியை 139 ஓட்டங்களுக்கு ஆட்டமிழக்க செய்தார்கள். தோமஸ் 42 ஓட்டங்களை கொடுத்து 6 விக்கெட்டுகளைக் கைப்பற்றினார்.


மத்திய கல்லூரி அணிக்கு R மகிந்தாவும் உமாசுதனும் ஆரம்ப துடுப்பாட்ட வீரர்களாக களமிறங்கினார்கள். பரி யோவானிற்கும் ஒரு R மகிந்தா ஆடினார், அந்த R மகிந்தாவும் u15 வரை மத்திய கல்லூரியில் படித்தவர். பரி யோவான் அணியின் வேகப்பந்து வீச்சாளரான திருக்குமாரின் பந்தை Slipsல் பிடி கொடுத்து, R மகிந்தா ஆட்டமிழக்க, களமிறங்கினார் மத்திய கல்லூரி அணியின் பிரதி தலைவரும் அந்த ஆண்டின் சிறந்த துடுப்பாட்ட வீரருமான போல் பிரகலாதன்.

போல் பிரகலாதன், கிரிக்கெட்டில் மட்டுமன்றி உதைபந்தாட்டம் மற்றும் மெய்வல்லுனர் போட்டிகளிலும் கலக்கியவர். யாழ்ப்பாண மாவட்ட பாடசாலைகள் உதைபந்தாட்ட அணியில் போல் பிரகலாதனும் பரி யோவானின் விஜயராகவனும் இடம்பிடித்திருந்தார்கள். 

----------------------------------------------

"அண்ணே, எங்கட விக்னபாலனின் "கிளியக்கா" கதை மாதிரி, சென்ரல் பக்கம் ஏதாவது கிளுகிளுப்பு கதை இருக்கோ" என்று போல் பிரகலாதன் அண்ணாவிடம் கேட்டேன்.

"சொன்னா நம்ப மாட்டீங்க தம்பி, நாங்க பெட்டையளை பார்க்கேல்ல, அவளவ தான் எங்களை பார்த்தவ, நாங்க எல்லாம் அப்ப யாழ்ப்பாணத்தில் ஸ்டார் ஸ்போர்ட்ஸ்மன்டா" என்று போல் பிரகலாதன் அண்ணா சொல்லிக் கொண்டே போனார்.

சென்ரல்காரன்கள் கிரிக்கட் மைதானத்தில் மட்டும் ஜொனியன்ஸோடு மோதவில்லை, புளூகு விடுறதிலும் ஜொனியன்ஸை விஞ்ச கடுமையாக முயற்சி செய்திருக்கிறார்கள் என்று நினைத்துக் கொண்டேன்.

-------------------------------------------------------


உமாசுதனும் பிரகலாதனும் அடித்து ஆடத் தொடங்கினார்கள். மைதானத்தின் எல்லா புறமும் பந்துகள் பறக்க, பரி யோவானின் பந்து வீச்சாளர்களின் பாடு, படு பரிதாபமாக இருந்தது.  யாழ்ப்பாண உச்சி வெய்யிலில் அன்று பரி யோவான் அணிக்கு கிடைத்த இரண்டாவது விக்கெட் உமாசுதனுடையது (59). ஜூட் ஜோசப்பின் சுழல் பந்துவீச்சில், விஜயராகவனிடம் பிடி கொடுத்து உமாசுதன் ஆட்டம் இழந்தார்.

பேயை கலைத்து விட பிசாசு வந்திறங்கின மாதிரி, உமாசுதன் ஆடுகளத்தை விட்டு விலக களமிறங்கிய சுதர்ஷனன், உமாசுதன் விட்ட இடத்திலிருந்து ஆட்டத்தை தொடர்ந்தார். அந்த மார்ச் மாத வெள்ளிக்கிழமை பின்னேரம், பண்ணைக் கடலில் சூரியன் மறையும் போது, மத்திய கல்லூரி அணி 182/2 என்ற மிகப் பலமான நிலையில் இருக்க, போல் பிரகலாதனின் (82*) சதமும் மத்திய கல்லூரியின் வெற்றியும் மட்டும் பிரகாசமாக தெரிந்தன. 

Big Matchல் சதம் அடிப்பது என்பது ஒவ்வொரு கிரிக்கெட் விளையாட்டு வீரனின்  கனவாக இருக்கும். சதம் அடிக்கும் ஆட்டக்காரனை அடுத்து வரும் சந்ததிகள் மறவாமல் போற்றும். 
நூறு ஓட்டங்கள் எடுக்க 18 ஓட்டங்களே தேவைப்பட்ட நிலையில் ஆட்டம் நிறுத்தப்பட்ட அந்த இரவை, பிரகலாதன் நித்திரையில்லாமல் தான் கழித்திருப்பார். 


Big Matchன் இரண்டாம் நாளான சனிக்கிழமை, பிரகலாதன் சதம் அடிப்பதை பார்க்க, மத்திய கல்லூரி மாணவர்களும் ஆதரவாளர்களும் காலையிலேயே மைதானத்தில் குழுமத் தொடங்கினார்கள். 
பிரகலாதனின் நண்பர்களோ அவரை கூட்டிக்கொண்டு சென்று அத்தியடி பிள்ளையார் கோயிலில் விசேட பூஜை வழிபாடுகளில் ஈடுபட்டார்கள். அத்தியடி பிள்ளையார் தான் யாழ்ப்பாண மத்திய கல்லூரியின் ஆஸ்தான கோயிலாம். 


போல் பிரகலாதன் சதம் அடித்ததும் மைதானத்திற்குள் ஓடி வந்த மத்திய கல்லூரி மாணவர்களும் ஆதரவாளர்களும், சந்தோஷத்தின் உச்சத்தில் திளைத்தார்கள். Big Match வெல்லப் போகும் ஆனந்தம் அவர்களின் ஒவ்வொரு கோஷத்திலும் அசைவிலும் வெளிப்பட்டது. பரி யோவான் அணியின் ஆட்டத்தில் வெளிப்பட்ட இயலாமை, பரி யோவான் பாசறையிலும் எதிரொலித்தது. 


Big Match போட்டிகளில் Highest individual  scoreஆக இருந்த 113ஐ (Johnian T கதிர்காமர், 1947) தாண்டிப் பயணித்த பிரகலாதனின் இன்னிங்ஸ் 125ல் முடிவிற்கு வந்ததோடு மத்திய கல்லூரி அணி declare பண்ணியது. ஜூட் ஜோசப்பின் பந்து வீச்சில் sweep பண்ணப் போய் Square legல் ஜோர்ஜிடம் பிடி கொடுத்து பிரகலாதன் ஆட்டம் இழக்கும் போது, மத்திய கல்லூரி அணி 309/5 ஐ எட்டி Big Match வரலாற்றில் புதிய சாதனையை ஏற்படுத்தியது.


 

இரண்டாவது இன்னிங்ஸில் துடுப்பெடுத்தாட பரி யோவான் அணி களமிறங்கும் போது மணிக்கூட்டு கோபுரத்தில் நேரம் காலை 11:10 மணி. தோல்வியை தவிர்க்க களமிறங்கிய பரி யோவான் அணி 42/1 என்ற நிலையில் மதிய இடைவேளக்குப் போகும் போது, மத்திய கல்லூரி அணியின் வெற்றி விழா கொண்டாட்டத்திற்கான ஆயத்தங்கள் முழுவீச்சில் முடுக்கி விடப்பட்டிருந்தன. 


மதிய இடைவேளைக்குப் பின்னர் பரி யோவான் அணி நொட்டத் தொடங்கியது. தோல்வியிலிருந்து தப்ப ஒரே வழி பசைவது தான் என்று முடிவெடுத்த பரி யோவான் அணி, வேகப் பந்துகளையும் சுழல் பந்துகளையும் மறித்து ஆடத்தொடங்கியது. DM ரவீந்திரா (40), ஞானரட்ணம் (13), N பிரபாகரன் (10), R மகிந்தா (05) என்று விக்கெட்டுகள் சரிய, "டேய் தட்டிக்கொண்டு நில்லுங்கோடா, விக்கெட்டை குடுத்திடாதீங்கோடா" என்று ஐஸ்க்ரீம் விக்கிற சிவகுரு முதற்கொண்டு பரி யோவான் மாணவர்களும் ஆதரவாளர்களும் மனதார ஒவ்வொரு துடுப்பாட்ட வீரரையும் வேண்டிக் கொண்டார்கள். 

101/4ல் தேநீர் இடைவேளைக்குப் போன பரி யோவான் அணியின் நிலைமை, இடைவேளைக்குப் பின் மிக மிக மோசமாகி தோல்வியின் விளிம்பை நோக்கிப் பயணிக்கத் தொடங்கியது. தேநீர் இடைவேளைக்குப் பின்னர் ஆக்ரோஷமாக பந்துவீசிய உமாசுதன், பரி யோவானின் விக்கெட்டுக்களை ஒவ்வொன்றாக சரிக்கத் தொடங்கினார். 

ஆறாவது விக்கெட்டாக ஜூட் ஜோசப் (24) ஆட்டமிழக்க விக்னபாலன் மைதானத்திற்குள் இறங்கினார். "மச்சான் பார்த்து செய்யுடா, கிளி வந்திருக்குடா" என்று சொல்லி விட்டு ஜூட் ஜோசப் ஆடுகளத்தை விட்டு விலகினார். வானத்தை அண்ணாந்து பார்த்து இறைவனின் ஆசியை பெற்றுவிட்டு மைதானத்தை சுற்றிப் பார்த்த விக்னபாலனிற்கு கதி கலங்கியது. பதினைந்தாயிரத்திற்கு மேற்பட்ட பார்வையாளர்களால் மைதானம் நிரம்பி வழிந்து கொண்டிருந்து, எங்கும் மத்திய கல்லூரியின் கொடி தான் கண்ணுக்கு தெரிந்தது. 

நிதானமாக ஒரு முனையில் விக்னபாலன் ஆடிக் கொண்டிருக்க, மறுமுனையில் S நிர்மலன் (00), JM George (01) P திருக்குமார் (00) என்று உமாசுதன் விக்கெட்டுக்களை சரித்துக் கொண்டிருந்தார்.  பின்னேரம் நாலு மணியளவில் பரி யோவான் அணி,   126/9 என்ற நிலையை எட்டும் போது மணிக்கூடு பின்னேரம் நான்கு மணியைத் தொட்டிருந்தது. 

ஆட்டம் முடிய சரியாக ஒரு மணித்தியாலமே இருந்த நிலையில் 20 mandatory overs, என்ற வீசப்பட வேண்டிய குறைந்த பட்ச ஓவர்களிற்கான விதிமுறை அமுலுக்கு வந்தது. 

யாழ் மத்திய கல்லூரி ஆதரவாளர்களின் ஆரவாரத்தால் மைதானம் மட்டுமன்றி யாழ் நகரமே அதிர்ந்து கொண்டிருக்க, பரி யோவானின் பதினோராவது துடுப்பாட்ட வீரன், விஜயராகவன் மைதானத்தில் காலடி எடுத்து வைத்தார். வாழ்வில் முதலாவதாண்டு கல்லூரிக்கு கிரிக்கட் விளையாடும் விஜயராகவன் இதுவரை பெரிதாக துடுப்பெடுத்தாடியதில்லை, ஒரு typical No 11. 


பரி யோவான் கிரிக்கட் அணியின் கடைசி துடுப்பாட்ட ஜோடியான, கல்லூரியின் உதைபந்தாட்ட அணியின் தலைவரான விஜயராகவனையும் பிரதி தலைவரான விக்னபாலனையும் வரவேற்க காத்திருந்தது, வெற்றியின் விளிம்பில் நின்ற மத்திய கல்லூரி அணியின் நட்சத்திர வேகப் பந்துவீச்சாளர்கள் மட்டுமல்ல, புத்தம் new ballம் தான். 

அந்த கடைசி, 20 அல்ல, 22 திக் திக் ஓவர்கள் ..அடுத்த பதிவில் 

1982 Big Match - Part 1



Friday, 10 March 2017

1982 Big Match


1982ம் ஆண்டு மார்ச் மாதம் மூன்றாம் சனிக்கிழமை, எட்டு வயது சிறுவனாக, "இன்றைக்கு அங்க பிரச்சினை வரும்... போகாதே" என்ற அம்மாவின் அநியாய கட்டளையை, அப்பாவின் மென்வலுவால் வென்று, 84வது வடக்கின் பெரும் போர் என வர்ணிக்கப்படும், பரி யோவான் - மத்தியா கல்லூரி அணிகளிற்கிடையிலான Big Match பார்க்க கிடைத்த சந்தர்ப்பம் வாழ்வில் ஒரு வரப்பிரசாதம்.


தலையில் கறுத்த தொப்பி, சிவப்பு கறுப்பு டீஷேர்ட், கறுப்பு களுசான், கையில் பஸ்தியான் கடையடி டெயிலரிடம் வாங்கிய சின்ன Red & Black கொடி, கழுத்தில் தொங்கிய Drink Bottleல் தவசீலன் கடையில் வாங்கி நிரப்பிய cream soda, பொக்கற்றில் பத்து ரூபா காசு இவற்றோடு அப்பா காலையில் கொண்டு வந்து, சிங்கள பேரினவாதிகளால் எரிக்கப்பட்ட யாழ்ப்பாண பொது நூலகத்தடியில் இறக்கி விட்டது இன்றும் நினைவில் நிழலாடுகிறது. 

கொளுத்தும் யாழ்ப்பாண வெய்யிலில், யாழ்ப்பாண கிரிக்கட் வரலாற்றில் அழியாத இடம் பிடித்த ஒரு கிரிக்கெட் ஆட்டத்தை அன்று பார்த்த பரவசம் இன்றும் நினைவை விட்டு அகலவில்லை. முப்பத்தைந்து வருடங்களிற்கு முன்னர் அந்த ஆட்டத்தை கண்டுகளித்த யாருமே இன்று வரை அந்த கடைசி நாளை, குறிப்பாக அந்த கடைசி இரண்டு மணித்தியாலங்களை, விசேஷமாக அந்த இரண்டு பரி யோவான் ஆட்டக்காரர்களை மறக்கவே மாட்டார்கள். 


1982ம் ஆண்டு Big Match பற்றி ஒரு பதிவு எழுத வேண்டும் என்று இருந்த நீண்ட நாள் கனவை நனவாக்க வழிகோலியது, சென்ற வருடம், நண்பர்களுடன் பயணித்த இனிமையான Big Match பயணம் தான். இந்தப் பயணத்தில் சந்தித்த மூவர் தான் இன்று இந்தப் பதிவை வரைய எனக்கு தகவல்களை தந்து உற்சாகப்படுத்தியவர்கள். 


முதலாமவர், "டேய் ஜூட், என்னடாப்பா" என்று பரி யோவான் கல்லூரி Dining Hall அடியில் வைத்து, கை எலும்பு நொறுங்க கைகுலுக்கி, உடல் நொறுங்க ஆரத்தழுவிய, யாழ்ப்பாணத்தில் எங்கள் ரோட்டுக்காரனான விக்னபாலன் அண்ணா. இரண்டாமவர், யாழ்ப்பாணம் Jetwings Hotelல் புகைப்படம் எடுத்த போது "ஹாய்" சொன்ன மத்திய கல்லூரியின் 1982 ஆட்ட நாயகன், போல் பிரகலாதன் அண்ணா. 


மூன்றாமவர் நாங்கள் CIMA படிக்கும் காலத்தில் எங்களை தனது காரில் ஏற்றி இறக்கிய காலம் தொட்டு இன்று வரை அன்பு பாராட்டும்  ஜூட் ஜோசப் அண்ணா. இவர்கள் அனைவரும் மறந்த சில தகவல்களையும் தரவுகளையும் உறுதிபடுத்த உதவியது தம்பி கோபிகிருஷ்ணா, பரி யோவானின் வாழும் cricket encyclopedia.
--------------------------

1970ம் ஆண்டு மத்திய கல்லூரி அணி ஈட்டிய வெற்றிக்கு பின்னர் இடம்பெற்ற அனைத்து ஆட்டங்களும் வெற்றி தோல்வியின்றி முடிவடைந்திருந்தன. எண்பதுகளின் ஆரம்பத்தில் DM ரட்ணராஜா தலைமையிலான பரி யோவானின் 1980 மற்றும் 1981 ஆண்டு அணிகள் பலமாக இருந்தாலும், மத்திய கல்லூரி அணி அபரிதமாக ஆடி அந்த ஆட்டங்களில் தோல்விகளை தவிர்த்திருந்தது. 1980ல் DM ரட்ணராஜாவின் சதமும் 1981ல் சிவேன் சீவநாயகத்தின் சதமும் பரி யோவான் அணி வெற்றியீட்ட போதுமானதாக இருக்கவில்லை. 


1982ம் ஆண்டு, யாழ்ப்பாணம் மத்திய கல்லூரி அணி, வடக்கில் மட்டுமன்றி முழு இலங்கையிலும் மிகப் பலமான அணியாக விளங்கியது. சகலதுறை ஆட்டக்காரரான தோமஸ் தலைமை தாங்கிய அணியில், அணியின் பிரதி தலைவர் போல் பிரகலாதன், சுதர்ஷனன், உமாசுதன், விக்கெட் காப்பாளரான (காலஞ்சென்ற) மணிவண்ணன் என்று பலவருட அனுபவம் வாய்ந்த Colours menகளின் கூடாரமாக யாழ்ப்பாணம் மத்திய கல்லூரி அணி திகழ்ந்தது. எப்படியும் இந்த முறை Central தான் Big Match வெல்லும் என்று யாழ்ப்பாணமே பரவலாக எதிர்பார்த்தது. பலவீனமான பரி யோவான் அணியை Big Matchல் வெல்லுவோம் என்ற  நம்பிக்கையிலேயே மத்திய கல்லூரி அணியும் உலா வந்தது. 


பரி யோவான் அணியுடனான Big Matchற்கு முதல் கிழமை, பலம் வாய்ந்த கொழும்பு ஆனந்தாக் கல்லூரி அணியை வென்று தன்னம்பிக்கையின் உச்சத்தில் வீற்றிருந்தது யாழ்ப்பாணம் மத்திய கல்லூரி அணி. ஆனந்தாக் கல்லூரியுடனான ஆட்டத்தில், போல் பிரகலாதன் சதம் அடித்திருந்தார். மத்திய கல்லூரி அணியின் தலைவரான தோமஸ் வேகப் பந்து வீச்சாளராகவும் சுழல் பந்து வீச்சாளராகவும் மாறி மாறி அவதாரம் எடுத்து, எதிரணிகளிற்கு சிம்ம சொப்பனமாக திகழ்ந்தார். வேகப்பந்து வீச்சாளரான உமாசுதனின் பந்து வீச்சில் வேகமும் விவேகமும் கலந்திருக்கும்.  



இதற்கு மாறாக பரி யோவான் பாசறையில் பல புது முகங்கள் இடம்பிடித்திருந்தன. பரி யோவான் அணியின் தலைவரான DM ரவீந்திராவும் பிரதி தலைவரான N பிரபாகரனும் மட்டுமே அணியின் colours men.  Half coloursman ஆன ஜூட் ஜோசப்பின், சுழல் பந்து வீச்சும், நிதானமான துடுப்பாட்டமும், முந்தைய வருட அனுபவமும் அணிக்கு பலம் சேர்த்தது.

 ஜூட் ஜோசப்பிற்கு நாடி நரம்பு, ரத்தம் எல்லாம் ஜொனியன் என்கிற வெறி, பெருமிதம், திமிர், எடுப்பு. ஆள் நடக்கும் போதே அந்த ஜொனியன் என்ற கர்வம் வெளிப்படும், ஆனால் பழகிப் பார்த்தால், பசு. 1980 Big Matchற்கு தன்னுடைய அப்பாவின் Layden Garments தொழிற்சாலையில் ஒரு பெரிய பரி யோவான் Red & Black கொடியை நெய்து, யாழ்ப்பாணத்தின் வரலாற்றில் பாரிய கொடியை அறிமுகப்படுத்திய பெருமை  ஜூட் ஜோசப்பை சாரும். 


பரி யோவான் அணியில் மகிந்தா, திருக்குமார் என்று இரு நெட்டையர்கள் விளையாடினார்கள். மகிந்தா ஒரு சகலதுறை ஆட்டக்காரர், 1983ம் ஆண்டு பரி யோவான் அணிக்கு தலைமை தாங்கியவர். திருக்குமார், வேகப் பந்து வீச்சாளர், பரி யோவானின் புகழ்பூத்த உதவி அதிபர் பஞ்சலிங்கம் மாஸ்டரின் மகன். 1984ம் ஒஸ்ரேலியாவிற்கு விஜயம் செய்த இலங்கை U19 தேசிய அணியில் விளையாடியதால், பரி யோவான் கல்லூரியின் அதியுயர் கெளரவமான Johnian Eagle விருதை வென்றவர், திருக்குமார். 


பரி யோவான் அணியின் அதிரடி ஆட்டக்காரன் தான் S விக்னபாலன். ஜந்தாவது அல்லது ஆறாவது விக்கெட் விழ இறங்கும் விக்கி, ஸ்டைலாக விளையாடுவார், ஆளும் ஸ்டைல் மன்னன் தான், ஜொனியன் என்றால் சும்மாவா. விக்னபாலன் ஸ்டைலில் மட்டுமல்ல சுழற்றலிலும் மன்னன். "மச்சான், வாடா ஒருக்கா கிளியை பார்ப்பம்" என்று நண்பர்களைக் கூட்டிக்கொண்டு அடிக்கடி இங்லீஷ் கொன்வென்ட் பக்கம் போவார். ஒரு சுப நாளில் கிளி அக்கா இவரைப் பார்த்து சிரிக்க, கூடப் போன நண்பர்களிற்கு ரிக்கோ ஹோட்டலில் ரோல்ஸும் சர்பத்தும் வாங்கித் தந்து விருந்து வைத்தார், விக்கி என்கிற விக்னபாலன், 1982 Big Matchன் கதாநாயகர்களில் ஒருவர். 

பரி யோவான் அணியின் வேகப்பந்து வீச்சாளராகவும் கடைசி துடுப்பாட்ட வீரராகவும் இடம்பிடித்தவர், விஜயராகவன். கல்லூரியின் உதைபந்தாட்ட அணியின் தலைவராகவும் ஒரு சிறந்த மெய்வல்லுனர் வீரனாகவும் திகழ்ந்த விஜயராகவன், கல்லூரி கிரிக்கெட் அணிக்கு விளையாடிய முதலும் கடைசியுமான வருடம், 1982. பரி யோவானின் தலைசிறந்த பயிற்றுவிப்பாளர்களில் ஒருவரான மனுவல்பிள்ளை மாஸ்டரின் உந்துதலில் கிரிக்கெட் விளையாட வந்தவர் தான், விஜயராகவன்.

மனுவல்பிள்ளை மாஸ்டரின் இன்னுமொரு தெரிவு,  Baby of the Team, JM ஜோர்ஜ். களத்தடுப்பில் மிகச்சிறந்து விளங்கியதற்காகவும் பரி யோவானின் கிரிக்கெட் அணியின் எதிர்காலத்தை கருத்தில் கொண்டும் ஜோர்ஜை, 1982 Big Matchல் களமிறக்கினார் மனுவல்பிள்ளை மாஸ்டர். ஜோர்ஜ் பரி யோவான் கிரிக்கட் அணிக்குத் தலைமை தாங்கிய 1985ம் ஆண்டு, நாட்டுப் பிரச்சினை காரணமாக Big Match நடக்கவில்லை. இவர்களை விட அணியின் விக்கெட் காப்பாளராக நிர்மலனும், சிறந்த துடுப்பாட்ட வீரரான TS வரதனும் பரி யோவானின் 1982 Big Match அணியில் இடம்பிடித்திருந்தார்கள்.


நாணய சுழற்சியில் வெற்றிபெற்று, துடுப்பெடுத்தாட முடிவெடுத்து, களமிறங்கிய பரி யோவானின் ஆரம்பத் துடுப்பாட்ட வீரர்களான DM ரவீந்திராவையும் ஞானரட்னத்தையும் எதிர்பார்த்து காத்திருந்தது, யாழ் மத்திய கல்லூரி அணியின் தலைவர் தோமஸ், உமாசுதன், சுதர்ஷனன், மனோஜ்குமார் அடங்கிய வேகப்பந்து வீச்சாளர்களின் படையணி. 

தொடரும்....

1982 Big Match - Part 2



Friday, 3 March 2017

கொழும்பு இந்துவின் கொமர்ஸ்காரன்கள்



1992ம் ஆண்டு கொழும்பு இந்துவில் கொமர்ஸ்காரன்கள் கோலோச்சிய ஒரு அற்புதமான ஆண்டு. கொழும்பு இந்துவின் வரலாற்றில் முதல்தடவையாக கொமர்ஸ் பிரிவிலிலிருந்து Head Prefect தெரிவான ஆண்டு 1992. நண்பன் கறுப்பையா ரமேஷ், கொழும்பு இந்துவின் HP ஆக தெரிவாக, ஆருயிர் நண்பன் வசந்தன் கொழும்பு இந்துவின் உயர்தர மாணவர் ஒன்றிய தலைவராக தெரிவானான். 


1983ம் ஆண்டிற்கு பின்னர் கொழும்பு இந்துவில் உயர்தர மாணவர் மன்றம் செயற்படத் தொடங்கிய ஆண்டாக 1992 அமைந்தது. உயர்தர மாணவர்களின் நலன்களைப் பேண செயற்படத் தொடங்கிய இந்தச் சங்கம், நினைவில் நிலைத்த ஒரு  இரவு விருந்துபசாரத்தை, 1992 உயர்தர மாணவர்களுக்கான பிரியாவிடையாக, கல்லூரியில் அரங்கேற்றியது. கொழும்பில் தமிழ் பிரிவு இருக்கும் அனைத்து ஆண் பெண் பாடசாலைகளிற்கும் அவர்தம் பிரதிநிதிகளை அனுப்ப அழைப்புக்கள் அனுப்பப்பட்டன, ஆனால் கலந்து கொண்டதோ இந்து மகளிர் கல்லூரி, இராமநாதன் மகளிர் கல்லூரி, மெதடிஸ்ட் மகளிர் கல்லூரி மாணவிகள் மட்டுமே. 

1992 உயர்தர மாணவர் ஒன்றியத்தின் இரவு விருந்துபசாரத்தை ஒழுங்கமைக்க அனைத்து மாணவர்களும்  ஒற்றுமையாகவும் கடுமையாகவும் உழைத்தார்கள். விழாவின் சிறப்பு மலரும் autograph புத்தகமும் வத்தளை பிரின்டேர்ஸில் அச்சாகியது. கொட்டும் கொழும்பு மழையில், முழங்காலளவு சேற்று வெள்ளத்தில், பொலித்தீனில் சுற்றிய புத்தகங்களை தோளில் சுமந்து வரும் போது அறிமுகமானவர் தான் அருமை நண்பன் ஐங்கரன் சுப்ரமணியம், அன்று 1993 மட்ஸ் பிரிவின் வகுப்பு பிரதிநிதி. 

கொழும்பு இந்துவின் கால்பந்தாட்ட அணி, அகில இலங்கையிலும் மிகச் சிறந்த அணிகளில் ஒன்றாக திகழ்ந்தது. அணியில் முக்கால்வாசி ஆட்டக்காரன்கள் எங்கட வகுப்பில் இருந்தாங்கள். அமலன், நித்தி, பகீ, தேவா, ராஜூ, சதா,  பண்டா, கிரிஷாந்தன் இவங்களோடு, கப்பல் விபத்தில் நம்மை விட்டுப் பிரிந்த ஷிரானும் அணியில் இருந்தான். சின்னண்ணாவின் வழிகாட்டலில் கடுமையாக பயிற்சி எடுத்து சிறப்பாக ஆடிய கொழும்பு இந்து அணி, கொழும்பின்  பல பிரபல பாடசாலைகளிற்கு சிம்ம சொப்பனமாக திகழ்ந்தது. தமிழ் பாடசாலை அணி என்ற ஒரே காரணத்திற்காக, பெரும்பான்மையின நடுவர்களின் பாரபட்சத்தால் இந்த அணி ஈட்டியிருக்க வேண்டிய பல வெற்றிகள் தட்டிப் பறிக்கப்பட்டன என்பது வேதனையான சோகம். 


கொமர்ஸ் வகுப்புகளிற்கு தங்கராஜா டீச்சரின் முதலாவது பாடத்திற்குப் பின்னர் வாத்திமார் வருவது அரிது. எங்கள் 13E வகுப்பில் அதற்கு பிறகு யாதவனின் பாட்டுக் கச்சேரி களைகட்டும். யாதவன் பாட, கொட்டா பிரதீப் மேளம் அடிக்க, பண்டாவும் அமலனும் ஜோடி போட்டு MGRம் ஜெயலலிதாவும் போல் கட்டிப்பிடித்து ஆடுவதை பார்க்க மெய்யாலுமே கண்கோடி வேண்டும். 

பதினொரு மணி வாக்கில், ஆடலும் பாடலும் நிகழ்ச்சி முடிவடையும். வகுப்பிலிருந்து நைஸாக நழுவி, செக்கியூரிடியிடம் சிங்களத்தில் கதைத்து பாடசாலையை விட்டு வெளியேற அமலன் அனுசரணை வழங்குவார். வீட்ட போய் ஒரு குட்டித் தூக்கம் அடித்துவிட்டு பின்னேரம் சங்கத்திற்கு டியூஷனிற்கு வர "அதோ மேக ஊர்வலம், அதோ மின்னல் தோரணம்" உருத்திரா மாவத்தையில் ஊர்வலம் போகும். அமலன் வகுப்பில் இல்லாத நாட்களில் மதில் பாய்ந்து வீட்ட போக CR ரஞ்சன் உதவி செய்வார். 

அமலனின் Prefect விண்ணப்பம் முதலில் ஒழுக்கத்திற்கு பொறுப்பான ஆசிரியர் கிமு என செல்லமாக அழைக்கப்படும் கிருஷ்ணமூர்த்தி ஆசிரியரால் நிராகரிக்கப்பட்டு, பின்னர் தங்கராஜா டீச்சரின் தலையீட்டால் தான் அவனிற்கு batch வழங்கப்பட்டது. "ஒரு prefect ஆக வர உனக்கென்ன தகுதியிருக்கு" என்று கிமு கேட்ட கேள்வியால் நொந்து நூலான அமலன், தங்கராஜா டீச்சரின் காலில் விழ "அவர் சொன்னது உண்மை தானேடா" என்று அமலனிற்கு சொல்லிவிட்டு, தங்கராஜா டீச்சர் தனது prefect ஆக வேண்டும் என்ற கனவை நனவாக்கியதை அமலன் சொல்லி நெகிழ்ந்தான். 


கிடைத்த batchஜ அமலன் AO ராமநாதனிற்கு, ஒரு பனிசீற்கும் டீக்கும் வாடகைக்கு விட்டு பிடிபட்டது தனிக்கதை. நண்பர்களிற்காக "குதிரையில்" AL படிக்க வந்த AO ராமநாதனின் கொழும்பு தமிழை சதானந்தன் மொழிபெயர்ப்பான். AO ராமாவும் "எலி வாய்" தேவாவும் நடாத்தும் கொழும்பு தமிழ் பட்டிமன்றத்தில் செந்தமிழும் சங்கத்தமிழும் பொங்கிப் பிரவாகிக்கும். 

கொழும்பு இந்து கல்லூரி தொண்ணூறுகளில்  பாடசால விவாத அரங்கில் கோலோச்ச அடித்தளம் இட்ட ஆண்டாகவும் 1992 அமைந்தது. பிற்காலங்களில் விவாத அரங்கில் கலக்கிய தமிழழகன், சுபாஷ் சிறிகாந்தா போன்றோர் 1992 விவாத அணியிலும் இருந்தார்கள். கொழும்பு இந்துவின் Quiz அணி, மேல் மாகாண தமிழ் பாடசாலகளிற்கிடையிலான போட்டியில் வெற்றிக் கிண்ணத்தை தனதாக்கிக் கொண்டது மட்டுமன்றி தேசிய மட்ட போட்டிகளான ரூபவாஹினியில் ஒளிபரப்பான Dulux Do You Know, ITNல் ஒளிபரப்பான Olympics Quiz, SAARC Quiz போட்டிகளிற்கு தெரிவான ஒரே தமிழ் பாடசாலை என்ற பெருமையையும் பெற்றது. 

கொழும்பு கதிரேசன் மண்டபத்தில் நடைபெற்ற 1992ம் ஆண்டு கலைவிழாவை யாரும் மறக்க மாட்டார்கள். நண்பன் ஜெயபிரகாஷ் சிறிகாந்தாவின் பராந்தகன் கனவு சரித்திர நாடகத்திலும் ரமேஷ்-டெரன்ஸ் கூட்டணியின் நவீன ராமாயணம் நகைச்சுவை நாடகத்திலும் தளபதியாக நடிக்க வாய்ப்பு தந்தார்கள். இசை நிகழ்ச்சியில் கொமர்ஸ்காரன்களான  யாதவன், "சொக்கன்" விசாகன், "பம்பா ஃபளட்ஸ்" சுதாகர் என்று அருமையான பாடகர்கள் கலக்கினார்கள். அமலன் குறூப் "ஏப்ரல் மேயிலே பசுமையேயில்லை" என்ற இதயம் படப் பாடலிற்கு ஆடி கரகோஷம் வாங்கினார்கள்.




கொழும்பு இந்துவில் கடைசி நாள்..

எழுதிய கடைசி Logic exam Paper நினைத்த அளவிற்கு கஷ்டமாக இருக்கவில்லை. "ரம்போ" ராஜரத்தினமும் கேசவனும் படிப்பித்த பகுதிகளுக்குள் கேள்விகள் வந்திருந்தன. கர்த்தரே எப்படியாவது Colombo Campus போகோணும், அங்க தான் வடிவான பெட்டயளும் பெரிய மரங்களும் இருக்கு, என்று செபித்து பேப்பரை கையளித்துவிட்டு வெளியில வந்தால்... கூழ் முட்டை, சேற்றுத் தண்ணி போன்ற ரசாயன ஆயுதங்களுடன் குழப்படி குறூப் நிற்குது. 


AO ராமா தலைமையில் நின்ற குறூப்போட அமலன், நித்தி, பக்கா, ஜெயந்தன், ஷிரான் சேர்ந்து கொள்ள, தாக்குதல் தொடங்கியது. Head Prefect ரமேஷிற்கு முதலில் சேறபிஷேகம் நடக்க நாங்கள் கேட்டை நோக்கி ஓட தொடங்கிட்டோம். "வா வா வா" என்று கத்திகொண்டு அங்கேயும் நிற்கிறாங்கள். நானும் வசந்தனும் திரும்ப ஓடிப்போய் இராமநாதன் இந்து மகளிர் கல்லூரி பக்கமுள்ள வகுப்பறைக்குள் பதுங்கினோம். 


நாங்க ஒளிந்திருந்த வகுப்பிற்கு வெளியே பலமான தாக்குதல் சத்தங்களும் அவலக்குரல்களும் கேட்குது. "எல்லா stockம் முடிய வெளிக்கிடுவம்" என்ற எங்கள் திட்டத்தில் மண் விழுந்தது. சதா, எங்களை கண்டு பிடித்துவிட்டான். உடனே சத்தம் போட்டு எல்லோரையும் கூப்பிட்டு, சுத்தி நின்று கும்மியடிச்சாங்கள். உச்சியிலிருந்து உள்ளங்கால் வரை கூழ் முட்டையால் குளிப்பாட்டினாங்கள். 


முட்டை வெடுக்கு மணத்தோட பஸ்ஸில போக ஏலாது, மானப்பிரச்சினை வேற. பின்ரோட்டால போன ஆட்டோவை மறிக்க அவன் எங்களை ஏத்த மறுத்துவிட்டான். இப்படி நாலு ஆட்டோக்காரன்களால் நிராகரிக்கப்பட்டு ஜந்தாவது ஆட்டோவில் கெஞ்சி கூத்தாடி ஏறி வசந்தன் வீட்ட போய் 2 shampoo packet போட்டு குளித்தும் வெடுக்கு நாத்தம் போக கன நேரம் எடுத்தது.  கொழும்பு இந்துக் கல்லூரியில் படித்த நினைவுகளும் வாழ்வில் அழியாத கோலங்களாய் மனதில் ஆழமாய் பதிந்து விட்டது.