Friday, 28 April 2017

கான மயிலாட வான்கோழி தானுமாட



"கான மயிலாட கண்டிருந்த வான்கோழி 
தானும் அதுவாகப் பாவித்துத் தானுந்தன் 
பொல்லாச் சிறகை விரித்தாடினார் போலுமே
கல்லாதான் கற்ற கவி"
மூதுரையில் ஒளவையார் 

வரலாற்றில் தமிழர் பிரதேசத்தில் நடந்த முதலாவது பகீஷ்கரிப்பாக 1931ல் யாழ்ப்பாண இளைஞர் பேரவை (Jaffna Youth Congress, JYC), முன்னின்று நடாத்திய தேர்தல் பகீஷ்கரிப்பு பதிவாகிறது. டொனமூர் யாப்பிற்கமைய, நடாத்தப்பட்ட சர்வஜன வாக்குரிமையடிப்படையிலான  தேர்தலை, யாழ்ப்பாணத் தமிழர்கள் புறக்கணித்தார்கள். 


சாதி, மத, பால் பாகுபாடின்றி, ஆசிய கண்டத்திலேயே இலங்கையில் தான் முதன் முதலாக அனைவருக்குமான வாக்குரிமை (universal suffrage) அறிமுகப்படுத்தப்பட்டது. இந்தியாவில் 1950 வரை அனைவருக்கும் வாக்குரிமை வழங்கப்படவில்லை. சுவிஸ்லாந்து 1971ல் பெண்களுக்கு வாக்குரிமை அளிக்கும் போது, உலகின் முதலாவது பெண் பிரதமராக சிறிமாவோ பதவியேற்று ஆறாண்டுகள் கடந்து விட்டிருந்தன.


"கீழ் சாதியினரிற்கும் படிப்பறிவில்லாதவர்களிற்கும் பெண்களிற்கும் வாக்குரிமை அளிப்பது முட்டாள்தனமானது" என்று சேர் பொன் இராமநாதன் எதிர்ப்பு தெரிவிக்க, இலங்கையிலேயே எழுத்தறிவில் முன்னனியில் திகழ்ந்த யாழ்ப்பாண மாவட்டமோ, வேறொரு காரணத்திற்காக தனக்கு வழங்கப்பட்ட முதலாவது ஜனநாயக உரிமையை பகீஷ்கரிக்கத் தயாரானது.


இந்திய தேசிய காங்கிரஸின் வழிநின்ற யாழ்ப்பாண இளைஞர் பேரவை, பிரித்தானியா இலங்கைக்கு சுயராஜ்ஜியம் வழங்காததால் தேர்தலை புறக்கணிக்குமாறு அழைப்பு விட, யாழ்ப்பாண மாவட்டத்திற்கு ஒதுக்கப்பட்ட நான்கு ஆசனங்களும் வெற்றிடமாயின. யாழ்ப்பாணத்தில் போட்டியிட முடியாத ஜீஜி பொன்னம்பலம், மன்னார் மாவட்டத்தில் போட்டியிட்டுத் தோற்றுப்போனார். 



தேர்தல் புறக்கணிப்பால் தேசிய சட்ட சபையில் தங்கள் உரிமைகளும் நலன்களும் புறக்கணிக்கப்படுவதையும் 
பாதிக்கப்படுவதையும் காலங்கடந்து உணர்ந்த யாழ்ப்பாண மக்கள், அடுத்து வந்த காலங்களில் யாழ்ப்பாண இளைஞர் பேரவையை புறந்தள்ளினார்கள் என்பது வரலாறு. 


இந்த தேர்தல் புறக்கணிப்பு பற்றி Jane Russell எனும் வரலாற்றாசிரியர் எழுதிய விரிவான கட்டுரைக்கு அவர் இட்ட தலைப்பு "The dance of the Turkey-cock: the Jaffna Boycott 1931", அதாவது "வான் கோழியின் நடனம்: யாழ்ப்பாண பகீஷ்கரிப்பு 1931". இந்திய தேசிய காங்கிரஸ் என்ற மயிலைப் பார்த்து யாழ்ப்பாண இளைஞர் பேரவை என்ற வான் கோழி ஆடிய நடனமே 1931ம் ஆண்டு தேர்தல் பகீஷ்கரிப்பு என்று Jane Russell விபரிக்கிறார். 

 
1980களின் மத்தியில் இயக்கங்களின் கட்டுப்பாட்டில் யாழ்ப்பாண தீபகற்பம் இருந்த காலங்களில், இயக்கங்களின் மாணவர் அமைப்புக்கள் நடத்திய பகீஷ்கரிப்புக்களையும் ஹர்த்தால்களையும் ஊர்வலங்களையும் அந்தக் காலப்பகுதியில் வாழ்ந்த யாரும் மறந்திருக்க மாட்டார்கள். பெரும்பாலான பகீஷ்கரிப்புக்களை முன்னின்று நடத்தியது PLOTE அமைப்பின் மாணவர் அணியான TESO, EROS அமைப்பின் GUYS மற்றும் EPRLFன் GUES.


"இன்று ஹர்த்தால்" என்று காலை எழுந்ததும் ஈழநாடு பத்திரிகையில் கொட்டை எழுத்தில் தலையங்கம் மிரட்டும். இலங்கை அரசாங்கம் நிகழ்த்திய ஏதோ ஒரு அநியாத்தை கண்டித்து, நாங்கள் பள்ளிக்கூடங்களை பகீஷ்கரித்து, கடைகளை அடைத்து, அலுவலகங்களை மூடி, கண்டி வீதியால் கச்சேரியை நோக்கி, "மாணவர் சக்தி... மாபெரும் சக்தி" என்று தொண்டை கிழிய கோஷம் எழுப்பிக் கொண்டு, கொளுத்தும் வெயிலில் ஊர்வலம் போக, கொழும்பில் அத்துலத்முதலியும் ஜெயவர்த்தனாவும் சுடச்சுட தேத்தண்ணியோடு கொக்கீஸ் சாப்பிட்டுக் கொண்டிருப்பார்கள். 


அதே காலப் பகுதியில், மலையகத்திலும் வேலைநிறுத்த போராட்டங்கள் இடம்பெற்றன. அரசாங்கத்தில் அமைச்சுப் பதவியை வகித்துக் கொண்டே, பெருந்தோட்டங்களில் வேலைநிறுத்த போராட்டங்களிற்கு செளமியமூர்த்தி தொண்டமான் அறை கூவல் விடுப்பார் . இலங்கைப் பிரஜாவுரிமை கோரியும் சம்பள உயர்வு கேட்டும் மலையகத் தமிழர்கள் நடாத்திய போராட்டங்கள் குறிப்பிடத்தக்க வெற்றிகளைப் பெற்றுத்தந்தது.  இலங்கையின் பொருளாதாரத்தில் பெருந்தோட்டத்துறையின் வகிபாகமும் அந்தத் துறையில் மலையகத் தமிழர்களின் உழைப்பின்  முக்கியத்துவமும் அவர்களடைந்த வெற்றிகளிற்கு பிரதான காரணிகளாகின. 


கடந்த ஏப்ரல் 24ம் திகதி, இலங்கையின் பெற்றோலியத் துறை தொழிலாளர்களை பிரதிநிதித்துவப்படுத்தும் தொழிற்சங்கம் விடுத்த வேலைநிறுத்த கோரிக்கைக்கும், அரசாங்கம் 24 மணித்தியாலங்களுக்குள் அடிபணிந்தது. பெற்றோல் நிரப்பு நிலையங்களிற்கு வெளியே ஏற்பட்ட வாகன நெரிசலும் பொருளாதாரத்தையே முடக்கவல்ல அறிகுறிகளும் இலங்கை அரசாங்கத்தை, தொழிற்சங்கத்தின் கோரிக்கைகளை செவிமடுக்க செய்தது. 


பெற்றோலிய தொழிற்சங்கத்தின் பணிப் பகீஷ்கரிப்பு மட்டுமன்றி தென்னிலங்கையில் இடம்பெறும் பெரும்பாலான போராட்டங்கள் வெற்றி பெறுவதற்கான காரணம், அவை பெரும்பான்மையின சிங்களவர்களால் மேற்கொள்ளப்படுவது மட்டுமன்றி, அந்த போராடங்கள் இலங்கையின் பொருளாதாரத்தில் செலுத்தவல்ல எதிர்மறையான தாக்கமும் தான். 


பெற்றோலியத் தொழிலார்களின் பகீஷ்கரிப்பு
நடந்து மூன்று நாட்கள் கழித்து, காணாமல் போனவர்கள் பிரச்சினைக்கு ஆதரவாக தமிழர் பிரதேசங்களில் நடந்த பகீஷ்கரிப்பிற்கு இலங்கை அரசின் பதில், "நல்லாட்சி அரசில் ஜனநாயக வழியில் போராட ஏற்பட்டுள்ள பொது வெளியை இந்த பகீஷ்கிரிப்பு பிரதிபலிக்கிறது" என்பதாக அமைந்தது. 


இலங்கைத் தீவின் மூன்றிலொரு பங்கு நிலப்பரப்பையும் மூன்றிலிரெண்டு பங்கு கடற்பரப்பையும் தன்னகத்தே கொண்ட, தமிழர் தாயகப் பகுதியில் இடம்பெறும் பகீஷ்கரிப்புகள், வெற்றி பெறாமல் போவதற்கான மிகப் பிரதான காரணம், வட-கிழக்கு மாகாணங்கள் இலங்கையின் பொருளாதாரத்தில் செலுத்தும் தாக்கம் எதுவுமில்லை என்ற கசப்பான உண்மையே. இலங்கையின் 2015ம் ஆண்டிற்கான GDPயில் கிழக்கு மாகாணம் 6.0%ஐயும் வட மாகாணம் 3.5%ஐயும் பங்களிப்பு செய்திருந்ததாக இலங்கை மத்திய வங்கியின் அறிக்கை கூறுகிறது. 

 
இந்த உண்மைகளை அறிந்தும் தங்கள் சொந்த அரசியல் நலன்களிற்காகவும் அரசியல் சாகஸத்திற்காவும் (political stunt) ஹர்தால்களிற்கு அழைப்பு விடுக்கும் தமிழ் தலைமைகளை பற்றி என்னத்தைச் சொல்ல?


யுத்தத்தில் அழிவுண்டு சிதைவுண்டு போயிருக்கும் தமிழர்களின் பொருளாதாரத்தை கட்டியெழுப்ப எந்த வித ஆக்கபூர்வமான செயற்பாடுகளையும் மேற்கொள்ளாத அதே வேளை, பகீஷ்கரிப்புக்களை நடாத்தி, வட-கிழக்கில் முதலீடுகளை மேற்கொள்ள விரும்பும் முதலீட்டாளர்களையும் துரத்தி விடும் கைங்கரியத்தை, இந்த தமிழ் தலைமகள் செவ்வனே செய்கின்றன. 


பொருளாதார அபிவிருத்திக்கும் அதனுடனான மக்களின் சுபீட்சமான வாழ்விற்கும் அடிப்படையாக அமைவது தொழில்சார் முதலீடுகளே. இந்த முதலீடுகளை தங்கள் தங்கள் நாடுகளிற்கு கவர உலகிலுள்ள 190 சொச்ச நாடுகளோடு இலங்கையும் போட்டி போடுகிறது. அவ்வாறு இலங்கைக்குள் வரும் முதலீடுகளை தங்கள் தங்கள் மாகாணங்களிற்குள் உள்வாங்க ஒன்பது மாகாணங்களும் முட்டி மோத வேண்டும். 


எங்களது பகீஷ்கரிப்புகளும் ஹர்த்தால்களும் கடையடைப்புக்களும் வெற்றி பெற வேண்டுமென்றால், நாங்கள் முதலில் பொருளாதார ரீதியில் பலம் பெற வேண்டும். புலம்பெயர்ந்த எங்களுறவுகளின் முதலீடுகளிற்கும் வெளிநாட்டு உள்நாட்டு நிறுவனங்களின் முதலீடுகளிற்கும் உகந்த பிரதேசமாக வட-கிழக்கு மாகாணங்களை மாற்ற வேண்டும். 


முதலீட்டாளர்கள் ரஜினிகாந்தை வரவழைத்து வவுனியாவில் திறப்பு விழா நடாத்தவும் டென்டுல்கரை கூப்பிட்டு கிளிநொச்சியில் கிரிக்கெட் போட்டி நடாத்தவும் எதிர்ப்பு தெரிவிப்பதை நிறுத்த வேண்டும். அதைவிட முக்கியமாக எங்கள் தலையில் நாங்களே மண் வாரியிறைக்கும் பகீஷ்கரிப்புக்களிற்கு ஓய்வு கொடுக்க வேண்டும்.


ஒரு விதத்தில் இன்று நாங்கள் அரங்கேற்றும் பகீஷ்கரிப்புகளும், 1931ம் ஆண்டு தேர்தல் பகீஷ்கரிப்பைப் போல், வான் கோழி நடனங்களே. எந்த வித பொருளாதார வலுவுமற்று, ஹர்த்தால் நடாத்துவதால் எதிரிக்கு எந்த வித பாதிப்பும் நேராது என்றறிந்தும், கடையடைப்பு நடாத்தி வியாபாரத்தை முடக்கி, அன்றாட வேதனத்தில் வாழும் எம்மவர்களை நாங்களே நிர்கதியாக்கும் இந்த செயற்பாடுகளை நாங்கள் நிறுத்த வேண்டும். 


நீதியும் நியாயமுமான எங்கள் கோரிக்கைகளை உலகிற்கு எடுத்துரைக்க, எழுக தமிழ் போன்ற பேரணிகளிற்கும் உண்ணாவிரதங்களிற்கும் பகீஷ்கரிப்புகளிற்கும் அழைப்பு விடுக்கும் அரசியல் தலைவர்களை, எங்களிற்காக ஒரு நாளேனும் ஜனாதிபதி மாளிகைக்கு முன்பாகவும் அலரி மாளிகைக்கு பின்பாகவும் பாராளுமன்றத்திற்கு வெளியேயும் உண்ணாவிரதம் இருக்க அழுத்தம் கொடுக்க வேண்டும். 


ஒடுக்கப்பட்ட மக்களின் பிரதிநிதிகளாக தெரிவு செய்யப்பட்டவர்கள், அந்த மக்களின் உரிமைக்காக தங்களை வருத்தி போராட வேண்டும் என்று எதிர்பார்ப்பது தவறா? 




முப்பது ஆண்டுகளிற்கு மேலாக "ஊர் வாழ வேண்டுமென்ற, உன்னத நோக்கம் கொண்டு, ஏராளமான துயர் தாங்கி நின்று" களமாடிய ஆயிரமாயிரம் போராளிகள் உலாவிய எங்கள் தேசத்தில்,  அரசியல் உரிமைகளுமின்றி, ஆக்கிரமிக்கப்பட்ட தங்கள் காணிகளை மீட்கவும் காணாமல் போன தங்கள் உறவுகளை தேடியும் போராடும் எம்மக்களிற்கு தலைமை தாங்கவென முன்வரும் எவரும் அந்த மக்களிற்காக தியாகங்கள் செய்ய தயாராக இருக்க வேண்டும் என்று எதிர்பார்ப்பது தவறா? 

"கான மயிலாட கண்டிருந்த வான்கோழி 
தானும் அதுவாகப் பாவித்துத் தானுந்தன் 
பொல்லாச் சிறகை விரித்தாடினார் போலுமே" என்றுள்ள எங்கள் பகீஷ்கரிப்புகளிற்கு விடை கொடுப்போம். எங்கள் போராட்ட வடிவங்களை மாற்றி எங்கள் தலைவர்களை முன்னிறுத்தி  போராடங்களில் ஈடுபடுவோம். அதே வேளை எங்கள் பொருளாதாரத்தை வளப்படுத்தி வான்கோழிகளாக எங்களைப் பார்ப்பவர் கண்களில் நாங்களும் கான மயில்களாக அவதாரம் எடுப்போம்.

போலிப் பகீஷ்கரிப்புகளை பகீஷ்கரிப்போம் !


Friday, 14 April 2017

பெரிய வெள்ளி

 

"Victory doesn't look like this" 

வெள்ளை நிற குறுந்தாடி வைத்த நடுத்தர வயதுடைய மனிதன் ஒருவர்,  கவலை தோய்ந்த முகத்துடன்  தனக்கு பக்கத்தில் நின்ற தனது நண்பரிடம் சொல்லிக்கொண்டு இருந்தார். ஜெருசலேம் நகரின் சுவர்களிற்கு வெளியே இருந்த கொல்கொத்தா என்ற இடத்தில், சிலுவையில் அறையப்பட்டிருந்த இயேசுவை பார்த்துக் கொண்டிருந்த மக்கள் கூட்டத்திலே தான் அவர்களிருவரும் நின்று கொண்டிருந்தார்கள்.

சிலுவையில் அறையப்பட்டிருந்த இயேசுவிற்கு இன்னும் உயிர் இருந்தது. துயிலுயிரியப்பட்டு, 39 தடவைகள் விழுந்த கசையடியால் உரிந்த தோல்களிலிருந்தும் ஆணியறையப்பட்ட கைகளிலிருந்தும் உதிரம் சிந்திக் கொண்டிருந்து. தனது சீடனொருவனால் காட்டிக் கொடுக்கப்பட்டு, எந்த மக்களை மீட்க வந்தாரோ அவர்களாலேயே அநீதியாக குற்றம் சாட்டப்பட்டு, சிலுவையில் இயேசு மரணத்தை எதிர்பார்த்து காத்திருந்தார்.  

"நீர் தானே இறைவனின் பிள்ளை, ஏலுமென்றால் சிலுவையிலிருந்து இறங்கி வாரும் பார்ப்பம்" கூட்டத்திலுருந்த ஒருத்தன் கூச்சலிட்டான். "ஏலுமா.. ஏலாது.. ஏலுமென்றா பண்ணிப்பாரும்" இன்னொருத்தன் அவனோடிணைந்து இயேசுவை நக்கலடித்து அவமானப்பபடுத்தினான்.

மனிதர்களை பாவத்திலிருந்து விடுதலையளிக்க போராடிய இயேசு எனும் விடுதலைப் போராளி, அதே மனிதர்களால் பயங்கரவாதியாக பட்டம் சூட்டப்பட்டு,  பயங்கரவாதிகளில் இருவரோடு சிலுவையில் அறையப்பட்டு, பயங்கரவாதியாக சித்தரிக்கப்பட்டு, மண்ணில் தனது கடைசி நிமிடங்களை கவலை, வேதனை, ஏமாற்றம் நிறைந்ததாக வாழ்ந்து கொண்டிருந்தார். 

உடலில் ரண வேதனை, மனதில் அவமானங்கள் தந்த வலி, சீடர்களும் நண்பர்களும் தன்னை கைவிட்டுச் சென்ற ஏமாற்றம் என்று இயேசுவின் கடைசிக் கணங்கள் மெய்யாகவே மரண வேதனையாகவே இருந்தன. இந்த வேதனையை நினைத்து தான் முதல் நாளிரவு கெத்சமனே தோட்டத்தில் "அப்பா பிதாவே உமக்கு விருப்பமென்றால் வரவிருக்கும் வேதனையை இல்லாமல் பண்ணும், ஆனால் உமது விருப்பமெதுவோ அதையே செய்யும்" என்று ஆண்டவரை நோக்கி மன்றாடியிருந்தார். 

அந்த கடைசி மணித்தியால மன்றாட்டமும் செவிசாயக்கப்படாமல் போக, இயேசு ஜெருசலேமிலிருந்து கசையடிகளை வாங்கிக் கொண்டு, அவமான வாரத்தைகளை செவிமடுத்துக் கொண்டு, தான் மரணிக்கப் போகும் சிலுவையை சுமந்து கொண்டு கொல்கொத்தா வந்திருந்தார். தன்னை சிலுவையில் அறைந்து நிந்தித்தவர்களிற்காக அவர் ஆண்டவரை நோக்கி மன்னிப்பும் வேண்டியிருந்தார். 

நேரம் பின்னேரம் மூன்று மணியை நெருங்கிக் கொண்டிருந்தது. யூதேயா நாடெங்கும் திடீரென ஒரு அந்தகார இருள் சூழ்ந்து கொண்டது. கொல்கொத்தாவில் இயேசுவை சிலுவையிலறைந்த இடத்தில் குழுமியிருந்த மக்களை அச்சம் சூழ்ந்து கொண்டது. அதுவரை அமைதியாக தனது வேதனைகளை அனுபவித்துக் கொண்டிருந்த இயேசு, தனது தாய் மொழியில் "ஏலி ஏலி லாமா சபக்தானி" உரத்த சத்தமிட்டார்

"ஆண்டவரே, ஆண்டவரே, ஏன் என்னைக் கைவிட்டீர்"

ஆண்டவர் அப்போதும் மெளனமாகவே இருந்தார், ஏனெனில் தோல்விகளை வெற்றிகளாக மாற்றும் வல்லமை படைத்த ஆண்டவனல்லவா அவர், வேதனைகளை சந்தோஷங்களாக மாற்றும் வல்லமை படைத்த ஆண்டவனல்லவா அவர்.

பெரிய வெள்ளி
Victory doesn't look like this
விடியல் வெகு தொலைவில் இல்லை

சரா மாஸ்டரும் அலெக்ஸ் மாஸ்டரும்

 



1980களின் நடுப்பகுதியில் ஒரு மத்தியான நேரம், ஏதோ ஒரு அவசர விஷயமாக பரி யோவான் கல்லூரியில் staff meeting நடந்து கொண்டிருக்கிறது. அலெக்ஸ் தம்பிராஜா மாஸ்டர் சீரியஸாக ஆங்கிலத்தில் உரையாற்றிக் கொண்டிருக்க, பலாலி பக்கமிருந்து வந்த இரு சியா மார்செட்டி ரக பொமர்கள்,  பழைய பூங்காவில் அமைந்திருந்த இயக்கத்தின் பயிற்சி முகாமை குறிவைத்து வானில் வட்டமடிக்கின்றன.

இழவு விழுந்த ஆமிக்காரன் குண்டு போடப் போறான் என்ற பயத்தில் பதறியடித்து எழும்பிய ஜீவானந்தம் மாஸ்டர், "Alex, bomber is bombing" என்று குறுக்கிடுகிறார்.

ஜீவானந்தம் மாஸ்டரின் குறுக்கீட்டை சகிக்காத Alex மாஸ்டர் "Jeevanantham, Be silent" என்று ஜீவானந்தம் மாஸ்டரை அமைதி காக்கும்படி கேட்கிறார். ஆங்கில வாத்தியாரான அலெக்ஸ்  மாஸ்டர் தான் ஆங்கிலத்தில் Bomber is Bombing என்று சொன்ன உச்சரிப்பில் B எழுத்தின் ஒலி silentஆக இருக்க வேண்டும் என்று தனது ஆங்கிலத்தை திருத்துகிறார் என்று கருதிய ஜீவானந்தம் மாஸ்டர் சொன்னார் 

"Omber is ombing"

ஜீவானந்தம் மாஸ்டர் பற்றிய பல பரி யோவான் கால பகிடிக் கதைகளில் இதுவும் ஒன்று, இந்தக் கதையில் அலெக்ஸ் மாஸ்டரிற்கும் ஒரு கதாபாத்திரம் கொடுக்கப்பட்டிருக்கும்.


கடந்த வாரங்களில் யாழ்ப்பாணம் பரி யோவானின் இரு பெருமதிப்பிற்குரிய ஆசான்கள் இவ்வுலகை நீத்தார்கள். ஒருவர் சரா தாமோதரம், மற்றவர் அலெக்ஸ் தம்பிராஜா. ஆளுமை நிறைந்த குணநலன்களிலும், கற்பித்தலில் காட்டிய முழுமையான ஈடுபாட்டிலும், மாணவர் நலனில் செலுத்திய அக்கறையிலும், பரி யோவானின் விழுமியங்களை பேணுவதில் காட்டிய விட்டுகொடாமையிலும், பரி யோவானின் பழைய மாணவன் என்ற மமதையிலும், சரா மாஸ்டரிலும் அலெக்ஸ் மாஸ்டரிலும் நிறைய ஒற்றுமைகளைக் காணலாம்.


ஆறு ஆண்டுகள் துரைச்சாமி மாஸ்டரின் கண்டிப்பும் கடும் கட்டுப்பாடுகளும் நிறைந்த பரி யோவானின் ஆரம்பப் பாடசாலையிலிருந்து, மத்திய பிரிவிற்கு 
வந்தால், பரியோவானில் ஒழுக்கத்தை பேணும் சிறப்பு தளபதி ஜீவானந்தம் மாஸ்டரின் பாசறை காத்திருந்தது. ஆண்டு 7Bயில் அருள்தாசன் மாஸ்டர் தான் வகுப்பாசிரியர், வாழ்வில் முதல் தடவையாக எங்களுக்கு விஞ்ஞானப் பாடம் அறிமுகப்படுத்தப்பட, சயன்ஸ் படிப்பிக்க வந்தவர் தான் சரா மாஸ்டர். 


1980களில் பரி யோவானின் ஆசிரியர் குழாமிலிருந்த கனபேர் வலு திறமான ஆசிரியர்கள், உண்மையான அக்றையுடன் ஆசிரியப் பணியாற்றியவர்கள். ஆசிரியர்களைத் தெரிவு செய்வதிலும் அவர்களை தொடர்ந்து உற்சாகப்படுத்தி, பரி யோவானை கல்வியிலும் விளையாட்டுத் துறையிலும் முன்னனியில் வைத்திருந்ததில் அன்றைய அதிபர் ஆனந்தராஜாவிற்கு பெரும் பங்குண்டு. இன்றும் நாங்கள் ஆனந்தராஜா மாஸ்டர் அதிபராக இருந்த காலத்தில் படித்தோம் என்று பெருமைப்பட காரணம் இந்த ஆசிரியர்களும் தான். 


அந்த மாஸ்டர் எங்களிற்கு படிப்பிக்க வரமாட்டாரா, இந்த மாஸ்டர் படிப்பிக்க வந்தால் மணியா இருக்கும் என்று எங்களை ஏங்க வைத்த பல வாத்திமார் உலாவித் திரிந்த வளாகமாக, பரி யோவான் கல்லூரி திகழ்ந்து. அவ்வாறு எங்களிற்கு வகுப்பெடுக்காத திறமான ஆசிரியர்களில் ஒருவர், அழகாக ஆங்கிலம் கற்பித்த, அலெக்ஸ் தம்பிராஜா மாஸ்டர். 


சரா மாஸ்டர், ஒரு மெல்லிய சிறிய உருவம். சிறிய முகத்தில் பெரிய கண்ணாடி. சின்ன கண்களில் பொய்யாக வரவழைத்த கடுமை, இளகிய மனம். கையை பின்னால் கட்டிக் கொண்டு வேகமாக நடப்பார், இல்லை..இல்லை, காற்று தள்ளிக் கொண்டு போகும். மாணவர்கள் எல்லோரும் வாழ்வில் நல்லாய் வரவேண்டும் என்ற அக்கறை தொனிக்கும் அறிவுரைகள் அவரின் வகுப்புக்களில் வெளிவரும். ஹொஸ்டல் மாஸ்டராக கூடுதல் பொறுப்பிலும் இருந்ததால், மாணவர்களின் அபிமானம் பெற்ற ஒருவராக திகழ்ந்தார். 

 

அலெக்ஸ் மாஸ்டர் பெரிதாக அலட்டிக் கொள்ள மாட்டார். கம்பீரமான உயர்ந்த உருவம், சில காலங்கள் வெள்ளை குறுந்தாடி இருந்ததாக ஞாபகம். அவரது நடை உடை பாவனையில் கண்டிப்பு கலந்திருப்பதால், மாணவர்கள் அவரது வகுப்புக்களில் சேட்டை விடத் தயங்குவார்கள். அதட்டலிற்கு அடங்காத அட்டகாசக்காரன்களிற்கு மட்டுமே அடி விழும், அதுவும் இறுதி முயற்சியாகத் தான். பின்னாட்களில் தேவ அழைப்பை ஏற்று முழுமையாக இறைபணியில் தன்னை இணைத்துக் கொண்டவர்.


ராஜசிங்கம் ப்ளொக்கின் கீழ் மாடியிலிருக்கும் வகுப்புகளில் கொஞ்சம் உயரமாகத் தான் கம்பிகளாலான யன்னல் அமைக்கப்பட்டிருக்கும். விஞ்ஞான பாடம் தொடங்க மணியடித்த சில நிமிடங்களில், அந்த யன்னல்களிற்கு மேலால் இரு விழிகள் தெரியும். சரா மாஸ்டர், நுனிக் காலில் உந்தி நின்று யன்னலுக்குள்ளால் குழப்படி செய்வோரை ஓரிரு நிமிடம் உளவு பார்ப்பார். பின்னர் சடாரென வகுப்பிற்குள் அதிரடியாய் நுழைந்து, குழப்படிக்காரனை பிடித்து நாலு சாத்து சாத்தி விட்டுத் தான் "Good afternoon" சொல்லுவார். சரா மாஸ்டரிடம் அதிகம் அடிவாங்கியது, தாயக கனவோடு களமாடச் சென்று, இறுதி யுத்தத்தில் காணாமல் போன சிவக்குமரன் (சேரலாதன்) தான். 


அலெக்ஸ் மாஸ்டர் கற்பித்த எங்களது batchன் இன்னொரு வகுப்பில், ஆங்கிலப் பாடத்திற்கான ஒப்படை (assignment) நடந்து கொண்டிருக்கிறது. ஆங்கிலத்தில் அலெக்ஸ் மாஸ்டரோடு சில நிமிடங்கள் சம்பாஷிக்க வேண்டும், அது தான் ஒப்படை. அலெக்ஸ் மாஸ்டர் "அட்டாக்" சசியை நேர்காணலிற்கு கூப்பிடுகிறார், ஏதோ பம்பலா நடக்கப் போகிறது என்று வகுப்பே உற்சாகமாகிறது.

"So.. what did you do last evening" அலெக்ஸ் மாஸ்டர் கம்பீரமாக கேட்கிறார்.

"Sir.. I played cricket sir" நாவற்குழி இராணுவ முகாமிற்கு சென்ரி பார்க்கப் போனதை மறைத்து, சசி கதையளக்க தொடங்குகிறான்.

"Good.. who is your favourite cricketer ?" அடுத்த கேள்வி அலெக்ஸ் மாஸ்டரிடமிருந்து வருகிறது.

"Sir.. சிறிகாந்த்.. sir...கிருஷ்ணமாச்சாரி சிறிகாந்த்" அறுத்து இறுத்து, இலகுவான கேள்விக்கு பதிலளித்ததில் சசியின் குரலில் ஆனந்த தாண்டவம்..

"Why do you like him" அலெக்ஸ் மாஸ்டரின் கேள்வியில் நக்கல் எட்டிப் பார்க்கிறது.

"Sir.. he hit sixers sir" சசி அடுத்த கேள்விக்கு முன்னேறி விட்டான். சிரிப்பை அடக்கிக் கொண்டு வகுப்பு அடுத்த கேள்வியை எதிர்பார்த்து காத்திருக்கிறது.

"Can you show me how Srikanth hits a six" அலெக்ஸ் மாஸ்டர் சசியை மடக்க கேள்வியை வீசுகிறார்.

ஒரு கணம் யோசித்த சசி, பதிலெதுவும் சொல்லாமல், forward defensive shot ஒன்றை விளாயாடிக் காட்டுகிறான். வகுப்பு ஆ ஊ என்று கத்தி கத்தி சிரிக்கிறது. 

அலெக்ஸ் மாஸ்டரிற்கு விசர் வந்து விட்டது, கதிரையால் எழும்பி விட்டார். "I say.. how can you score a six with a defensive stroke" அலெக்ஸ் மாஸ்டர் இடுப்பில் கை வைத்துக்கொண்டு கேட்ட தொனியில் சிரிப்பலைகள் அடங்க, சசி மட்டும் பின்வாங்க வில்லை. அரைக்கை ஷேர்ட்டின் கைகளை உயர்த்தி தனது வலிய புஜங்களைத் தட்டி விட்டுச் சொன்னான்

"பலம்....சேர்.... பலம்" வகுப்போடு சேர்ந்து அலெக்ஸ் மாஸ்டரும் சிரித்தார். 

 
அலெக்ஸ் மாஸ்டரும் சரா மாஸ்டரும் தமது செயற்பாடுகளை வகுப்பறைகளோடு மட்டும் மட்டுப்படுத்தவில்லை. கல்லூரியின் சங்கங்கள் கழகங்கள் இல்லங்கள் என்பவற்றை நிர்வகிப்பதிலும் தங்களை ஆர்வத்துடன் ஈடுபடுத்திக் கொண்டார்கள். 

சரா மாஸ்டரைப் போலும் அலெக்ஸ் மாஸ்டர் மாதிரியும் பல ஆசான்கள் பரி யோவானில் எங்களை ஆளாக்கினார்கள். ஆளுமை நிறைந்த ஆசிரியர்கள் எங்கள் எதிர்காலத்திற்கு வழிகாட்டியாக திகழ்ந்தார்கள். யாழ்ப்பாணத்தில் நிலவிய கடுமையான போர்ச்சூழலிலும் மெழுகுதிரியாக அவர்கள் எரிந்து எங்களின் வாழ்க்கையை ஒளிமயப்படுத்தினார்கள்.

எங்கள் SJC92 batch 1989 சாதாரண தரப் பரீட்சையில் யாழ்ப்பாணத்தில் முன்னனியில் திகழ்ந்தமைக்கு அடித்தளம் இட்டவர்கள், பாடசாலையில் முழுமையான ஈடுபாட்டோடு கல்வி கற்பித்த இந்த ஆசிரியர்கள் தான். 1992ம் ஆண்டு நாங்கள் உயர்தர பரீட்சை எழுதிய போது எங்கள் பிரிவிலிருந்து 6 பேருக்கு 4A கிடைத்தது, அதில் இருவர் மட்டுமே பரி யோவானிலிருந்து பரீட்சை எழுதியவர்கள். மீதி நால்வரும் பரி யோவானில் இடப்பட்ட அத்திவாரத்தில் கொழும்பு பள்ளிக்கூடங்களிலிருந்து பரீட்சை எழுதியவர்கள். அந்த 6x4A யும் பரி யோவானிலிருந்து வந்திருருந்தால், 1992ல் பரி யோவான் கல்லூரி அகில இலங்கையிலும் முதலாவது இடத்தை பிடித்திருக்கும்.

SJC1989 இலும் உயர்தர பரீட்சையில் Bio பிரிவில் அகில இலங்கையிலும் முதலாவது இடத்தை பிடித்த சுபனேசன், உட்பட பலரை உற்சாகப்படுத்தி வழிகாட்டியவர்கள் எங்களது ஆசிரியர்கள். நாங்கள் படித்த காலத்தில் கல்வியிலும் விளையாட்டிலும் யாழ்ப்பாண மாவட்டத்தில் மட்டுமன்றி முழ நாட்டிலும் முன்னனியில் திகழ்ந்த எங்கள் பரி யோவான் கல்லூரி, இன்று கல்வித் துறையில் பின்தங்கியிருப்பது வேதனையளிக்கிறது.

அண்மைய ஆண்டுகளாக எவ்வாறு கிரிக்கெட்டில் பரி யோவான் கல்லூரி அணி திறமையாக விளையாடி, வடமாகாணத்திலேயே அதி சிறந்த அணியாக திகழ்கிறதோ, அதே போல் கல்வித்துறையிலும் முன்னேறி யாழ்ப்பாணத்தின் முன்னனி பாடசாலைகளில் ஒன்றாக மீண்டும் மிளிர வைப்பதே அலெக்ஸ் மாஸ்டருக்கும் சரா மாஸ்டருக்கும் அவர்களைப் போல் தங்கள் வாழ்க்கையை பரி யோவானிற்கு அர்ப்பணித்த அனைத்து ஆசிரியர்களிற்கும் நாங்கள் அளிக்கும் உண்மையான காணிக்கையாக இருக்கும். 

வெல்லுவமா? 

Saturday, 8 April 2017

காற்று வெளியிடை...

 
மணிரத்னம் படம் பார்க்க போறது ஒரு வேதனை கலந்த எதிர்பார்ப்பு. மணிரத்தினத்தின் முந்தைய சிறந்த படங்களை பார்த்து மகிழ்ந்ததால் வந்த எதிர்பார்ப்பு, இன்றைய படங்களை பார்க்கும் போது வரும் வேதனையோடு கலக்க, மிஞ்சுவது, ஒரு வெறுமையான உணர்வு மட்டுமே. 

மணிரத்தினத்திற்கு தானொரு intellectual இயக்குனர் என்று நினைப்பு அதிகம். மணிரத்தினம் படம் பார்த்து விட்டு ஆஹோ ஓஹோ என்று சொல்லுபவர்களில் சிலரும் தங்களை intellectual ரசிகர்களாக வெளிக்காட்ட முற்படும் "கார்த்தி ரக" சொதப்பல் நடிகர்கள். மணிரத்தினத்தின் அண்மையில் வெளிவந்த கெளதம் மேனனுடனான முழுநீள இங்கிலீஷ் செவ்வியில்  தானெடுத்த தமிழ் படங்களைப் பற்றி கதைப்பார், அவர் தன்னைத்தானே மற்ற தமிழ் இயக்குனர்களிடமிருந்து பிரித்தும் உயர்த்தியும் காட்ட எடுக்கப்பட்ட முயற்சியாகவும் இது இருக்கலாம்.

எடுக்கிறது தமிழ்ப் படம்
கதைக்கிறது கடும் இங்கிலீஷ்


"காற்று வெளியிடை" என்ற பாரதியாரின் கவித்துவ தலைப்பிற்கு மகுடம் தந்தவர்கள் ரஹ்மானும் வைரமுத்துவும் கார்க்கியும் தான். அழகான பாடல்களை மிக அழகாக படமாக்க மணிரத்தினத்தால் மட்டும் தான் முடியும், இந்தப் படமும் அதற்கு விதிவிலக்கல்ல. இயற்கையின் அழகிலும் செயற்கையான அரங்கங்களின் ஒளியமைப்பிலும், ஒளிப்பதிவாளர் ரவி வர்மனின் அட்டகாசமான ஒளி ஓவியத்திலும் பாடல்கள் அனைத்துமே அட்டகாசம் தான்.

துளி காலம் கேட்டேன் 
துளி காதல் கேட்டேன்     
துளி காமம் கேட்டேன் 
முறு உயிரே……

காற்று வெளியிடை படம் வரமுதலே எதிர்பார்ப்பை ஏற்படுத்திய பாடல், tango இசையிலமைந்த "கேளாயோ கேளாயோ செம்பூவே" பாடல். ரஹ்மானின் இப்போதைய ஆஸ்தான பாடகர் ஹரிசரணும், சூப்பர் சிங்கர் புகழ் திவாகரும் இணைந்து கலக்கிய பாடல், அகலத்திரையில் பார்த்தால் மட்டுமே பரிபூரணமடையும். பாடலின் இறுதியில் வரும் "officerற்கு காது கேட்காதா", "டொக்டருக்கு மனசு மாறாதா" வசனங்களுடனான காட்சி, மணிரத்தினத்தின் பழைய டச் வெளிவந்த கணம்.

 நீ என்னை மறந்தால் காற்று கதறும் 
கடலின்  மேலே ஒட்டகம் நடக்கும்

வைரமுத்து, செம்மொழியாம் தமிழ் மொழியில் புகுந்து விளையாடியிருக்கும் பாடல், "நல்லை அல்லை". Red & Black சேலையில் அதிதி நடந்து வர, பின்னனியில் ரஹ்மானின் இசையோடு வைரமுத்துவின் வரிகள் கை கோர்க்க, காற்று வெளியிடை படத்தில் மெரஸலான ஒரு தருணமென்றால், சத்யபிரகாஷ் பாடிய இந்தப் பாடல் வந்த காட்சிகள் தான். 

நல்லையல்லை நல்லையல்லை
நன்னிலவே நீ நல்லையல்லை     
நல்லையல்லை நல்லையல்லை
நள்ளிரவே நீ நல்லையல்லை


மணிரத்னம் படங்களில் மிளிரும் இன்னொரு சிறப்பம்சம், காதல் காட்சிகள். நடிகர் நடிகையரின் கண்ணசைவுகளிலும் உடல் மொழிகளிலும் வெளிப்படும் காதல் பரவசம், மணிரத்தினத்தின்  ஒரிரு சொற்களிலான வசனங்களில் மெருகேறி, நம்மையும் காதல் கொள்ள வைக்கும். தெய்வீகன் குறிப்பிட்டது போல், அந்த காட்சிகள் அரண பரண, repetition, ஆக இருந்தாலும் மீண்டும் மீண்டும் ரசிக்கலாம்.

வரும்முன் அறிவான்
என்னுள் ஒளிவான் 
அருகே நிமிர்வான் 
தொலைவில் பணிவான்

மணிரத்தினத்தின் காதல் காட்சிகளை மீண்டும் மீண்டும் ரசிக்க வைக்க காரணம், அவர் தேர்வு செய்யும் நடிகர்கள். ரஜினிகாந்த்-ஷோபானா தொட்டு அரவிந்சாமி-மதுபாலா, மாதவன்-ஷாலினி, ஷாருக்-மனிஷா தாண்டி  போன வருடம் வந்த துல்கார்-நித்யா மேனன் வரை அந்த காதல் பரவத்தை, ரசிகர்களையும் உணர வைத்தவர்கள். ஆனால் காற்றிடை வெளியிலே படத்தில், அந்தவிதமான எந்த அசம்பாவிதமும் நடக்காமல் போனதற்கு காரணம், கார்த்தி. 

கர்வம் கொன்றால்
கல்லாய் உறைவான் 

"காற்றிடை வெளியிலே" படத்தின் பலவீனம் கார்த்தி. கார்த்தியை எனக்கு கண்ணிலேயே காட்ட முடியாது. கார்த்தியின் மொக்கை நடிப்பை காண காண வெறுப்பு இமயமலையின் உச்சியில் ஏறும். கார்த்தி எந்தக் காட்சியிலும் மணிரத்தினத்தின் எதிர்பார்ப்பை பூர்த்தி செய்யவேயில்லை, அதிலும் ஒரு முக்கிய காட்சியில் கார்த்தி அழ, கிளிசரீன் ஆறாய் ஓட, கார்த்தியின் முகத்தில் சோகத்தின் ரேகைகளை நாங்கள் தேடிக் கொண்டிருந்தோம். 

கண் திறந்தால் 
கணத்தில் கரைவான்

காற்றிடை வெளி படத்தில் அடிக்கடி கேட்ட பொமர் (bomber) இரைச்சலும் குண்டு பொழியும் காட்சிகளும், யாழ்ப்பாணத்தில் வாழ்ந்த நாட்களை நினைவில் கொண்டு வந்தன. அதனால் தான் என்னவோ fighter pilot ஆக வந்த கதாநாயகனை ஆரம்பத்திலிருந்தே மனம் வெறுக்கத் தொடங்கியது.


மணிரத்தினம் படத்தில் வழமையாக வரும் ரயில், காற்றிடை வெளியிலில் காணாமல் போக, உருமும் பொமர்கள் பறந்து பறந்து பயமுறுத்தியது. ஒரு காட்சியில் மட்டும் அதிதி ரயில் டிக்கட்டை காட்டி ரயிலேற போக போவதாக வசனம் மட்டும் வரும், ஆனால் ரயில் மட்டும் வராது.


காற்றிடை வெளியில் படத்தில் சிறந்த பாடல், திப்புவோடு ரஹ்மானியாவும் நிக்கிதா காந்தியும் பாடிய, "சரட்டு வண்டியிலே சிரட்டொலியிலே" தான். படம் முடிந்து வரும்போது திரும்ப திரும்ப கேட்க தோன்றிய அழகான பாடல், திரையில் வர்ண ஜாலமாக மிளிர்ந்தது, கொள்ளை அழகு. 

சேலைக்கே சாயம் போகும் மட்டும்     
ஒன்ன நான் வெளுக்க வேணுமடி     
பாடுபட்டு விடியும் பொழுதும்     
வெளியில் சொல்ல பொய்கள் வேணுமடி     

கார்த்தி நடித்த கதாபாத்திரத்தில் ஆர்யா நடித்திருந்தால் படம் நிட்சயமாக சிறப்பாக அமைந்திருக்கும். மணிரத்தினம், ரஹ்மான், வைரமுத்து என்ற ஜாம்பவான்களின் கூட்டணியில் அமைந்த திரைக்காவியத்தை பார்த்து விட்டு, வீட்ட வரும் போது மனிசி சொன்ன இரு வரி, மணிரத்தினம் பாணி விமர்சனம் தான் மண்டைக்குள் இப்போதும் எதிரொலிக்கிறது. "படத்தில எல்லாம்  இருந்தும், ஏதோ ஒன்று இல்லை என்ற ஃபீலிங் தான் வருகுது".

உண்மை தான், கவிதை வாங்க போய் காற்று வாங்கி வந்த கதை தான் "காற்று வெளியிடை"

Friday, 7 April 2017

யாழ்ப்பாணத்திற்கொரு ஆறு (River to Jaffna)

 

 "வானிலிருந்து விழும் ஒரு துளி நீரையும் விவசாயத்திற்குப் பயன்படுத்தாது வீணே கடலைச் சென்றடைய விடமாட்டேன்" என்பது, பொலநறுவையை இராசதானியாக
கொண்டு ஆட்சி செய்த சிங்கள மன்னன் மகா பராக்கிரமபாகுவின் புகழ் மிக்க கூற்றுக்களில் ஒன்றாகும். பேச்சோடு மட்டும் நின்றுவிடாது, வானிலிருந்து விழும் நன்னீர், கடலைச் சென்றடைவதைத் தடுக்க, பராக்கிரம சமுத்திரம் என்ற மாபெரும் நன்னீரேரியை பராக்கிரம்பாகு கட்டுவித்தான். பராக்கிரம்பாகுவின் காலத்தில் இலங்கைத் தீவு தெற்காசியாவின் தானியக் களஞ்சியமாக திகழ்ந்தது என்பது வரலாறு. 

யாழ்ப்பாணத்திற்கு தண்ணீரப் பிரச்சினை, ஒரு பெரும் பிரச்சினை. யாழ்ப்பாணத்தின் பிரதான தண்ணீர் மூலம் கிணறுகள் தான். கிணறுகளிலிருந்து துலா, கப்பி, வெறும் கயிறு பயன்படுத்தி தண்ணீர் மொள்ளுவது யாழ்ப்பாணத்திற்கேயுரிய தனித்துவம்.  தண்ணீர் இறைக்கும் இயந்திரமும் தடைபடாத மின்சாரமும் வந்த பின்னர், கப்பியும் துலாவும் காணாமல் போய் விட்டன.

அந்தக்  காலத்தில், யாழ் மாநகர சபைக்குட்பட்ட பிரதேசங்களிற்கு நிலாவறை கிணற்றிலிருந்து குழாயில் நன்னீர் வரும், அதுவும் காலையில் ஒரு மணி நேரம் மாலையில் ஒரு மணி நேரம் மட்டும். செல்வாக்குள்ளவர்கள் மாநகர சபையின் அனுமதி பெற்று தங்கள் வீடுகளிற்குள் தண்ணீர் குழாயை பொருத்துவார்கள். மற்றவர்கள் வீதியில் இருக்கும் பொதுக் குழாயில், குடங்களிலும் வாளிகளிலும் தண்ணீர் எடுக்க வருவார்கள். தண்ணீர் குழாயடியில் இருந்து நாட்டு நடப்பு கதைக்கவும் அரசியலை அலசவும் ஒரு கூட்டம் வந்து சேரும். 


பராக்கிரம்பாகுவின் சிந்தனையை அடியொற்றி, 1930களில் இலங்கையின் சட்டசபையில் உறுப்பினராக இருந்த K பாலசிங்கம் என்பவரால் யாழ்ப்பாண தீபகற்பத்தின் களப்புக்களை நன்னீரேரிகளாக மாற்றும் திட்டம் முன் மொழியப்பட்டது. யாழ்ப்பாண தீபகற்பம், ஆறுகள் எதுவுமற்ற ஒரு வரண்ட பிரதேசம், ஆனால் நிலத்தடி நீர்வளமிக்க பிரதேசம். இந்த நிலத்தடி நீரையும் கடும் உழைப்பையும் வளமான மண்ணையும் மூலதனமாக்கி, யாழ்ப்பாண விவசாயி, விவசாயத்தில் கோலோச்சுவான். 

இலங்கைத் தீவு 1948ல் பிரித்தானிய காலனித்துவ ஆதிக்கத்திலிருந்து விடுபட்டு, சிங்கள பெரும்பான்மையின ஆட்சிக்குள் வந்த பின்னர், இலங்கையின் நீரப்பாசனத்துறை (irrigation) திணைக்களத்தின் துணைப் பணிப்பாளராக இருந்த ஆறுமுகம் என்பவரால், "யாழ்ப்பாணத்திற்கு ஒரு ஆறு" (River to Jaffna) திட்டம், முன் மொழியப்பட்டது. ஆறுமுகத்தால் முன்மொழியப்பட்டதால், "ஆறுமும் ஆறு", எனும் பெயரை இந்தத் திட்டம் பெற்றது. யாழ்ப்பாணத்தில் மாரி காலத்தில் மட்டும் மழை பெய்யும். மூன்று நான்கு மாதங்கள் பொழியும் மாரி மழை நீரை கடலிற்கு போவதைத் தடுத்து, முறையாக சேகரித்து, கோடைக்காலத்திலும பயன்படுத்த, இந்த யாழ்ப்பாண ஆறு திட்டம் வழிசமைக்கும்.  

 


வன்னியின் வளமான கனகராயன் ஆறு, ஓமந்தைக்கு அண்மையில் உற்பத்தியாகி, புளியங்குளம், மாங்குளம், கிளிநொச்சி என்று வன்னியின் பெரு நிலங்களைத் தழுவிச் சென்று, ஆனையிறவு கடவையின் கிழக்குப்பகுதியில், சுண்டிக்குளத்துற்கு அண்மையில் கடலுடன் கலக்கிறது. "ஆறுமுகம் ஆறு" திட்டத்தின் ஆரம்பப் புள்ளி, இந்த கனகராயன் ஆறு சுண்டிக்குளத்தடியில், ஆனையிறவு ஏரியில் கலப்பது தான். 


யாழ்ப்பாணத் தீபகற்பத்தை வன்னி பெருநிலப்பரப்புடன் இணைப்பது ஆனையிறவு கடவை. ஆனையிறவு பாலத்தின் கிழக்குப் பக்கம் நன்னீராகவும், பாலத்தின் மறுபுறமான மேற்குப் பக்கம் உவர்நீராகவும் இருப்பதன் காரணம், இந்த கனகராயன் ஆற்றின் நன்னீர், ஆனையிறவு பாலத்தின் கிழக்குப் பகுதியில் கலப்பது தான். 


ஆனையிறவு பாலத்தின் கீழ் ஒரு தடையை எற்படுத்தி, ஆனையிறவு நீரேரியின் கிழக்குப் பகுதியில் சேரும் நன்னீரை, ஆனையிறவு ஏரியின் மேற்குப் பகுதியில் இருக்கும் வங்கக் கடலின் உவர் நீரோடு சேரவிடாமல் தடுப்பது, யாழ்ப்பாண ஆற்றுத்திட்டத்தின் முதற் கட்டம்.  


இரண்டாவது கட்டம், ஆனையிறவு ஏரியின் கிழக்குப் பக்கம், சுண்டிக்குளத்திற்கு அண்மையில், ஒரு ஒடுங்கிய நிலப்பரப்பினூடாக இந்துமாக்கடலில் கலக்கும் நன்னீரை தடுக்க, ஒரு தடுப்பரண் கட்டுவது. சுண்டிக்குளம் தடுப்பரண், ஆனையிறவு ஏரியின் நன்னீரை கடலோடு கலக்க விடாமல் தடுப்பதோடு, ஆனையிறவு ஏரியில் அளவுக்கதிகமாக தண்ணீர் நிறைந்தால், வெள்ளத்தை தடுக்க, மிதமிஞ்சிய நீரை கடலுக்குள் பாய விடும் பொறிமுறையை கொண்டிருக்கும்.


ஆறுமகம் ஆறு திட்டத்தின் மூன்றாவதும் முக்கியமானதுமான கட்டம், முள்ளியான் வாய்க்கால். 12 மீட்டர் அகலமும், சுமார் 4 கிலோ மீற்றர் நீளமுடைய ஒரு வாய்க்காலை, ஆனையிறவு ஏரியின் வடக்கு பக்கமாக, முள்ளியான் கிராமத்தினூடாக அகழ்ந்து, ஆனையிறவு ஏரியின் நன்னீரை, வடமராட்சி நீரேரியுடன் இணைப்பது தான் முள்ளியான் வாய்க்கால். ஆறுமுகம் ஆற்றுத் திட்டத்தின் இதயப்பகுதி தான் முள்ளியான் வாய்க்கால் என்று சொல்லலாம்.


 

தெற்கே ஆழியவளைக்கு அண்மையில்  தொடங்கும் வடமராட்சி நீரேரி, உடுத்துறை, மருதங்கேணி, பால்ராஜ் அண்ணர் தரையிறங்கிய குடாரப்பு, பருத்தித்துறை தாண்டி, தொண்டமனாறில் உள்ள செல்வச்சந்நிதி ஆலயத்திற்கு அண்மையில் கடலுடன் கலக்கிறது. 

யாழ்ப்பாண ஆற்றுத்திட்டத்தின் நாலாவது கட்டம், செல்வச்சந்நிதி தடுப்பரண். சுண்டிக்குளம் தடுப்பரணைப் போல், நன்னீரோடு உவர்நீர் கலப்பதை தடுப்பது, மிதமிஞ்சிய நன்னீரை கட்டுக்கோப்பாக கடலிற்கு வழிய விட்டு வெள்ளத்தை தடுப்பது என்ற இரட்டை நோக்கங்களைக் கொண்டதாக இந்த செல்வச்சந்நிதி தடுப்பரண் அமைக்கப்படும். 

வடக்கே செல்வச் சந்நிதி அணை, தெற்கே ஆழியவளை, கிழக்கிலும் மேற்கிலும் நிலப்பரப்புக்கள், முள்ளியானில் ஆனையிறவு நன்னீரேரியிலுருந்து வரும் தண்ணீர் என்று வடமராட்சி களப்பை ஒரு நன்னீரேரியாக மாற்றிவிடும் திட்டமே ஆறுமுகம் ஆறு திட்டத்தின் பிரதான குறிக்கோள். ஆனால், வல்லை வெளியின் மேற்கே ஆரம்பமாகும் உப்பாறு எனும் சிறிய களப்பு வடமராட்சி ஏரியுடன் கலக்கிறது. 

 

வடமராட்சியில் தொடங்கி, மேற்காக வளைந்து நெளிந்து சென்று, அரியாலையடியில் கடலுடன் கலக்கிறது, இந்த உப்பாறு. அரியாலையிலிருந்து கடல் நீர் வந்து வல்லை வெளி தாண்டி, வடமராட்சி நன்னீரேரியை மாசுபடுத்துவதைத் தடுக்க, அரியாலையிலும் ஒரு தடுப்பரண் அமைக்கப்பட வேண்டும். 


அரியாலை தடுப்பரணுடன் முழுமையடையும் யாழ்ப்பாண ஆறு திட்டம், யாழ்ப்பாண தீபகற்பத்தில் இரு நன்னீர் ஏரிகளை உருவாக்கி, மாரி கால மழை நீரை சேகரித்து, கோடை காலத்தில் யாழ்ப்பாணத்தாருக்கு நீர் வளங்கும் நோக்கத்தை நிறை வேற்றும். அத்துடன், யாழ்ப்பாணத்தில் உள்ள கிணறுகளின் நன்னீர் பெருக்கத்தையும் இந்த இரு நன்னீரேரிகளின் உருவாக்கம் ஊக்கப்படுத்தும்.


1950களிலிருந்து கட்டம் கட்டமாக மேற்கொள்ளப்பட்ட கட்டுமான வேலைகளால், ஆனையிறவு, சுண்டிக்குளம், தொண்டமனாறு, அரியாலை ஆகிய இடங்களில் கட்டப்பட்ட அணைக்கள் பழுதாகி விட்டன. முள்ளியான் வாய்க்காலும் தூர்வடைந்து போயுள்ளது. 

ஆறுமுகம் ஆறு எனும் யாழ்ப்பாணத்திற்கான ஆறு எனும் திட்டத்தை நிதியுதவி வழங்கி செயற்படுத்த இன்று ஆசிய அபிவிருத்தி வங்கி முன்வந்துள்ளது. ஆறுமகம் ஆறு திட்டம் அமுலாக்கப்படும் அதே வேளை, யாழ்ப்பாண தீபகற்பத்தில் நிலத்திடியில் சேரும் மலக்கழிவுகளை சுகாதார முறையில் அகற்ற முறையான ஒரு கழிவகற்றும் பொறிமுறையும் (sanitation system) நிறுவப்படுவது அவசியம். ஆசிய அபிவிருத்தி வங்கியின் முன்மொழிவுகளில், யாழ்ப்பாண தீபகற்பகத்தில் நிலத்திடிக்கு சென்று நிலத்தடி நீரை மாசுபடுத்தும் மலக்கழிவுகளைத் தடுக்க, முறையான கழிவகற்றும் பொறிமுறை அமைக்கும் திட்டமும் இருப்பதாக நம்பப்படுகிறது. 

வடமாரட்சி நீரேரியும் உப்பாறும் நன்னீரேரிகளாக, நிலத்தடி நீரில் சேரும் மலக் கழிவுகளும் இல்லாமல் போக, யாழ்ப்பாண கிணறுகள் நன்னீரால் நிரம்பி வழியும், விவசாயமும் வளம் பெறும். யாழ்ப்பாண தீபகற்பத்தின் தண்ணீர் பிரச்சினையை தீர்க்க அறுபது ஆண்டுகளிற்கு மேலாக பேசப்பட்டு வரும் இந்தத் திட்டம், முதலாவது வடமாகாண தமிழர் ஆட்சியில் முழுமையடைந்து, விக்னேஸ்வரன் ஆட்சிக் காலத்தின் மணிமகுடமாக திகழும் என்பது நம்பிக்கை நிறைந்த எதிர்பார்ப்பு. 

 



நீர் வளம் உண்டு, 
நில வளம் உண்டு,

நிம்மதி ஒன்றுதான் இல்லை
இந்த மண் 
எங்களின் 
சொந்த மண்