Friday, 22 April 2016

2016 Big Match.. அனுபவித்ததிலிருந்து 6


வடக்கின் பெரும் போர் என வர்ணிக்கப்படும் யாழ்ப்பாணம் பரி யோவான் கல்லூரிக்கும் யாழ்ப்பாணம் மத்திய கல்லூரிக்குமிடையிலான 110வது கிரிக்கட் ஆட்டம் மார்ச் 10, 2016ல் ஆரம்பமாகியது. கொழும்பில் Battle of the Blues என வர்ணிக்கப்படும் Royal Thomian கிரிக்கட் ஆட்டம் ஆரம்பமான அதே நாளில் யாழில் Battle of the North ஆரம்பமாகியது. இரு ஆட்டங்களும் Paparae TVயில் நேரடி ஒளிபரப்பு செய்யப்பட்டன.

நாங்களும் ஏலும்...

முதலில் துடுப்பெடுத்தாடிய மத்திய கல்லூரி அணி 75 ஓவர்கள் ஆடி 161 ஓட்டங்களிற்கு அனைத்து விக்கெட்டுகளையும் இழந்தது. பரி யோவானின் பந்து வீச்சு அபாரமாக இருந்தாலும் களத்தடுப்பில் இருந்த பலவீனம் மத்திய கல்லூரியை 161 ஓட்டங்களை எட்ட வழிசமைத்தது. பரி யோவானின் ஜதுஷன் 39 ஓட்டங்களிற்கு 4 விக்கெட்டுகளையும் நிலோஷன் 3 விக்கெட்டுகளையும் கைப்பற்றினர். 


பரி யோவானின் ஆரம்பத்துடுப்பாட்டக்காரர்கள் நொட்டி விளையாட தொடங்க எங்களுக்கு கொட்டாவி வர தொடங்கியது. 14வது ஓவரில் 26 ஓட்டங்கள் எடுத்த நிலையில் முதலாவது பரி யோவான் விக்கட் சரிந்தது. 27ல் இரண்டாவது விக்கெட்டும் 33வதில் மூன்றாவது விக்கெட்டும் சரிய வந்த கொட்டாவி பறந்து, நாடியில் கை வைத்தோம்.


களத்தில் பரி யோவானின் நம்பிக்கை நட்சத்திரங்கள் ஜெனின் ப்ளெமிங்கும் கபில்ராஜும் மத்திய கல்லூரியின் பந்து வீச்சை எதிர்கொண்டார்கள்.  ஜெனின் ப்ளெமிங் கடந்த ஆண்டு Big Matchல் நூறடித்தவர், முந்தைய வாரம் St. Patricksற்கு எதிராகவும் நூறடித்தவர். ஆனால் அன்றைய அவரது ஆட்டத்தில் ஏனோ தடுமாற்றம் தெரிந்தது. 42வது ஓட்டத்தில்  ஜெனின் ப்ளெமிங் ஆட்டமிழக்க மத்திய கல்லூரி அணியினரும் ஆதரவாளர்களும் ஆரவாரிக்க நாங்கள் சோபையிழந்தோம்.

என்னம்மா இப்படி பண்ணீட்டீங்களேம்மா..


அடுத்து வந்த பதினைந்து நிமிடங்களும் பரி யோவான் அணி அதிரடியாக அடித்தாடத் தொடங்கியது. கபில்ராஜுடன் இணைந்த கிஷன்துஜன் பவுண்டரிகளும் சிக்ஸரும் அடிக்க, காணாமல் போயிருந்த உற்சாகம் எங்களுக்குள் மீண்டும் வந்தது.  முதல்நாள் ஆட்ட முடிவில் பரி யோவான் அணி 4 விக்கெட் இழப்பிற்கு 61 ஓட்டங்களை பெற்றிருந்தது.


இரண்டாம் நாள் காலை பரி யோவான் அணியின் வெற்றிக்காக பிரார்த்திக்க நாங்கள் கீரிமலை நோக்கி பயணமானோம். ஒவ்வொரு ஜந்து நிமிஷமும் SJC92 WhatsApp குறூப்பில் அருள்மொழியும் ஆதியும் மாறி மாறி நேரடி update தந்து கொண்டிருந்தார்கள். 78ல் கபில்ராஜ் ஆட்டமிழக்க நாங்கள் நகுலேஸ்வரத்தில் காலடி எடுத்து வைத்தோம். நகுலேஸ்வரத்தில் கும்பிட்டுவிட்டு வந்து ஜயர் கடையில் சோடா குடிக்க, 108/8. 

ஆண்டவா.. என்ன சோதனை இது.


WhatsAppஐ மூடிவிட்டு கீரிமலை கேணித்தண்ணி கடலில் கலக்கும் இடத்தில் இறங்கி, முக்கி முழுகி பாவங்களை கழுவினோம். காலில் கல்லு குத்த பாசியில் வழுக்கி விழாமல் ஆளை ஆள் பிடித்து கொண்டு கடலில் இறங்கி மூச்சு பிடித்து படம் எடுத்தோம். கரையிலிருந்து ஜனா கத்தினான் 133/9. மீண்டும் மூன்றுமுறை கடல் தண்ணீரில் தலை முழுகி, மிச்ச பாவத்தையும் கரைத்தோம். 

மச்சான், இங்க பார்டா.. யாரோ செய்த பிதிர்கடன் மிதந்து வருது


மறைவாய் நின்று துடைத்து களுசாண் மாற்றி பஸ்ஸில் ஏற, மைதானத்தில் மதிய உணவு இடைவேளை என்று செய்தி வந்தது. மதிய உணவு சாப்பிட்டுவிட்டு மைதானத்திற்குள் நுழைய பரி யோவானின் கடைசி துடுப்பாட்ட வீரன் ஜோசப்புடன் அணியின் சிறந்த சகலதுறை ஆட்டக்காரன் ஜதுஷன் இணைந்து களமாடுகின்றனர். இருவரும் இணைந்து ஒவ்வொரு ஓட்டங்களாக எடுத்து மத்திய கல்லூரி அடித்த ஓட்டங்களை தாண்டி 163 என்ற இலக்கை எட்ட, ஜோசப் ஆட்டமிழக்கிறார். 53 ஓவர்களில் 163 ஓட்டங்களை எடுத்த பரி யோவான் அணிக்கு கிஷன்துஜன் 31, ஜதுஷன் 28, கபில்ராஜ் 22, நிலோஷன் 15 ஓட்டங்களை அடித்து பலம் சேர்த்தார்கள். 


இரண்டாவது இன்னிங்ஸில் ஆடத்தொடங்கிய மத்திய கல்லூரி மீண்டும் மந்த கதியில் ஓட்டங்களை எடுக்க ஆரம்பித்தது. இரண்டாவது ஓவரில் முதல் விக்கெட்டை கைப்பற்றிய பரி யோவான் அணியினர், அதன்பின் ஒவ்வொரு விக்கெட்டிற்கும் கடுமையாக போராட வேண்டியிருந்தது. களத்தடுப்பில் இருந்த பலவீனமும் கோட்டை விட்ட கட்ச்களும் பரி யோவானின் பந்து வீச்சாளர்களை உற்சாகமிழக்க செய்தன. மத்திய கல்லூரி 164/4 எனும் பலமான நிலையில் இருக்க இரண்டாவது நாள் ஆட்டம் முடிவிற்கு வந்தது. 


மூன்றாவது நாள் ஆரம்பமே பரி யோவான் அணியினருக்கு கோணலாக அமைந்தது. முதல் ஜந்து ஓவர்களில் பிடிக்க வேண்டிய இரு கட்ச்கள் தவறவிடப்பட மத்திய கல்லூரியின் ஒட்ட எண்ணிக்கை தொடர்ந்து அதிகரித்தது. மூன்றாவது நாள் ஆரம்பத்திலேயே தவறவிட்ட கட்சால் பயனடைந்த கிருபாகரன், அதன்பின் திறமையாக ஆடி 103 ஓட்டங்களை அடித்து மத்திய கல்லூரி அணியை ஒரு பலமான நிலைக்கு கொண்டு வந்தார். 


இரண்டாவது இன்னிங்ஸை declare பண்ணி ஆட்டத்தை விறுவிறுப்பாக்குவார்கள் என்று பார்வையாளர்கள் ஏங்க, மத்திய கல்லூரி அணியினரோ எந்த வித அவசரமும் காட்டாமல் ஆடிக்கொண்டே இருந்தார்கள். 200வது ஆண்டை கொண்டாடும் மத்திய கல்லூரி அணி ஆட்டத்தில் வெல்வதை விட தோல்வியை தவிர்ப்பதில் குறியாக இருந்தது. மதிய இடைவேளைக்கு சற்று முன்னர்
அனைத்து விக்கெட்டுகளும் இழக்கப்பட 94 நீண்ட ஓவர்களில் 264 ஓட்டங்களுடன் மத்திய கல்லூரியின் இரண்டாவது இன்னிங்ஸ் ஒருவாறு முடிவிற்கு வந்தது. பரி யோவான் அணிக்கு கபில்ராஜும் ஜதுஷனும் தலா மூன்று விக்கெட்டுகளையும் நிலோஷனும் அணித்தலைவர் ஞானமித்ரனும் 2 விக்கெட்டுகளையும் கைப்பற்றினார்கள்.


வெற்றிபெற 63 ஓவர்களில் 263 ஓட்டங்கள் என்ற இலக்கு நோக்கி பரி யோவான் அணி துடுப்பெடுத்தாட தொடங்கியது, ஓவரிற்கு 4.2 ரன்கள் எடுத்தாக வேண்டும். பரி யோவான் அணிக்கும் மத்திய கல்லூரி அணியின் சோம்பல் தொற்றிக் கொள்ள, அடித்தாட வேண்டிய அணி, நின்று நிதானித்து ஆடத்தொடங்கியது. 22 ஆவது ஓவரில் 40 ஓட்டங்கள் எடுத்த வேளை முதலாவது விக்கெட் விழ, களமிறங்கினார் ஜெனின் ப்ளெமிங். 


பத்தொன்பது வயதிற்குட்பட்டோருக்கான இலங்கை தேசிய கிரிக்கட் அணியின் தேர்வில் இடம்பிடித்த ஜெனின் அடித்தாடுவார் என்று பார்த்தால், பசையலில் விக்னபாலனை விஞ்சினார். கொளுத்தும் வெயில் ஒரு பக்கம், வெறுப்பேற்றும் பரி யோவான் அணியின் துடுப்பாட்டம் மறுபுறம் என்று பார்வையாளர்கள் வாடி வதங்கினார்கள். தேநீர் இடைவேளையில் பரி யோவான் 64/2 எனும் நிலையில் இருந்து. 30 ஓவர்களில் 200 ஓட்டங்கள் எடுக்க வேண்டும். 

கிழிஞ்சுது கிருஷ்ணகிரி...


மூன்றாவது விக்கெட் 91 ஓட்டங்களில் விழுத்தப்பட களமிறங்கிய நிலோஷன் விளாசத் தொடங்கினார். 4 பவுண்டரிகள் 1 சிக்ஸர் உட்பட 24 ஓட்டங்களை 20 பந்துகளில் அடித்து நிலோஷன் ஆட்டமிழக்கும் போது அணியின் ஓட்ட எண்ணிக்கை 124/4. பரி யோவான் அணி 130 ஓட்டங்கள் எடுத்தவேளை ஜெனின் ப்ளெமிங் 107 பந்துகளில் அடித்த 37 ஓட்டங்களுடன் ஆட்டமிழக்க, கபில்ராஜ் ஜதுஷன் கூட்டணி களத்தில் ஒன்றிணைந்தது. 


கடைசி 7 ஓவர்களில் 49 ஓட்டங்களை குவித்து பார்வையாளர்களை பரவசப்படுத்திய இந்த இரு துடுப்பாட்டக்காரர்களும் பாராட்டப்பட வேண்டியவர்கள். கபில்ராஜ் 3 பவுண்டரிகள் 2 சிக்ஸர்கள் அடங்கிய 31 ஓட்டங்களையும், ஜதுஷன் 2 பவுண்டரிகள் அடங்கிய 20 ஓட்டங்களையும் ஆட்டமிழக்காமல் அடிக்க, பரி யோவான் அணி 179/5  என்ற நிலையில், 110வது வடக்கின் பெரும் போர் இரு அணியினருக்கும் வெற்றி தோல்வியுற்ற நிலையில் முடிவிற்கு வந்தது. 


பரி யோவான் அணியில் மாணவர்களிற்கிடையில் மிகப்பிரபலமான ஆட்டக்காரனாக திகழ்ந்தவர் நிலோஷன். நிலோஷன் களமிறங்கும் போதும் பந்து வீசும் போதும் மாணவர்கள் பகுதியில் ஆரவாரம் கேட்கும். நிலோஷன், வன்னி மண்ணிலிருந்து பரி யோவான் 
2009ம் ஆண்டு உள்வாங்கிய 620 மாணவர்களில் ஒருவன். 


இறுதி யுத்தத்தால் பாதிக்கப்பட்ட, மெனிக் முகாமில் அடைக்கப்பட்டிருந்த மாணவர்களிலிருந்து 620 பேரை,  பரி யோவானின் அதிபர் வண.ஞானபொன்ராஜா பொறுப்பெடுத்து விடுவித்து, பாடசாலையின் விடுதியில் இலவசமாக தங்க வைத்து, கல்லூரியில் இணைத்து கொண்டார். பரி யோவான் கல்லூரியின் இந்த செயற்பாட்டிற்கு,   லண்டன், மெல்பேர்ண், கனடா, சிட்னியில் இயங்கும் பழைய மாணவர் சங்கங்கள் பாரியளவில் நிதிப்பங்களிப்பு செய்தன.


2016ன் Big Match ஆட்டம் விறுவிறுப்பு அற்றதாக அமைந்தது ஏமாற்றமளித்தாலும், மீண்டும் எங்கள் யாழ் மண்ணில் தடம் பதித்து, பழைய நண்பர்களையும் ஆசிரியர்களையும் சந்தித்த பசுமையான நினைவுகளுடன் எங்கள் யாழ்ப்பாண பயணம் இனிதே நிறைவுற்றது. 

அனுபவித்ததிலிருந்து
http://kanavuninaivu.blogspot.com.au/2016/03/2016-big-match.html


அனுபவித்ததிலிருந்து 2
http://kanavuninaivu.blogspot.com.au/2016/03/22016-big-match.html


அனுபவித்ததிலிருந்து 3
http://kanavuninaivu.blogspot.com.au/2016/04/3-big-match-2016.html


மீண்டும் பள்ளிக்கு...அனுபவித்ததிலிருந்து 4
http://kanavuninaivu.blogspot.com.au/2016/04/4.html

அனுபவித்ததிலிருந்து 5
http://kanavuninaivu.blogspot.com.au/2016/04/5.html


Thursday, 14 April 2016

யாழ்ப்பாண விருந்துகள்... அனுபவித்ததிலிருந்து 5



தாயகத்தில் இடம்பெற்ற யுத்தத்தால் சிதறுண்டு உலகின் பல்வேறு நாடுகளிற்கும் புலம்பெயர்ந்த பாடசாலை நண்பர்கள் மீண்டும் ஒன்றுகூடி பம்பலடித்து நட்பை புதுப்புக்கும் நிகழ்வுகள் அண்மைக்காலங்களில் அரங்கேறி வருகின்றன. யாழ்ப்பாணத்தின் பிரபல பாடசாலைகளை சேர்ந்த மாணவர்கள் கலந்து கொள்ளும் ஒன்று கூடல் நிகழ்வுகள் முகநூலில் லைக்குகளை அள்ளி வாங்கும். நாங்கள் படித்த பரி. யோவானின் 92 batchம் கோலாலம்பூரில் 2013ல் ஒன்று கூடி, வாழ்வில் மறக்க முடியாத முத்தான மூன்று நாட்களை வாழ்ந்து மகிழ்ந்தோம்.


யாழ்ப்பாணத்தில் Big Match பார்க்க மீண்டும் ஒன்று கூடுவோம் என்ற யோசனை முன்வைக்கப்பட்டதும் "யாழ்ப்பாணத்தில் போய் என்னத்தை செய்யுறது" என்று ஒரு கூட்டம் பின்னடிக்க "அங்க சனம் கஷ்டப்படுது, அதுக்க நாங்க போய் அட்டகாசம் செய்யுறது சரியில்லை" என்று இன்னொரு குறூப் உணர்ச்சிவசப்பட்டது.


உண்மைதான்.. பாங்கொக்கில் விளையாடுற விளையாட்டை கோலாலம்பூரில் ஆடமுடியாது, கோலாலம்பூரில் போடுற கூத்தை கொழும்பில் அரங்கேற்றேலாது, கொழும்பில் விடுற சேட்டையை யாழ்ப்பாணத்தில் விட முடியாது.

எங்கட யாழ்ப்பாணமடா.. 

--------------------------------------------------------------------------------------------------------------------------

யாழ்ப்பணாத்தில் மீண்டும் கால்பதித்த புதன்கிழமையிரவு நண்பன் டொக்டர் கோபி வீட்டில் பார்ட்டி. ஏழரை மணியளவில் கோபி வீட்டில் போய் இறங்கினோம். யாழ்ப்பணாத்தின் பாரம்பரிய கட்டிடக்கலை மரபைத் தழுவி, நவீனம் கலந்து கட்டப்பட்ட கோபியின் இல்லத்தின் மொட்டை மாடியில் எங்கள் ஒன்றுகூடல் களை கட்டத்தொடங்கியது. 


வெளிநாடுகளிலிருந்து பயணித்திருந்த பத்து டயஸ்போராகாரன்கள் கொழும்பிலிருந்து வந்திருந்த எட்டுப்பேரோடு யாழ்ப்பாணத்தில் வாழும் எங்கள் Batchன் எழுவர் ஒன்றுசேர யாழ்ப்பாணத்து மொட்டை மாடி குதூகலித்தது. யாழ்ப்பாணம் இந்துவின் டாக்டர் சிவநேசன் சிறப்பு பாடகராக கலந்து கொண்டு நிகழ்வை சிறப்பித்தார். அவருக்கும் எங்கட ஜொனியன்ஸ் ஜேர்ஸி அணிவித்து எங்களில் ஒருவராக்கினோம். எங்களுடன் பயணித்த கொக்குவில் இந்து நண்பன், துவாவும் அன்று இரவு மட்டும் ஜொனியனானான்.

யாவரும் கேளீர் !


நாட்டுக் கோழி முட்டை பொரியல் மேலே வரவர ஆதியும் சிறிபிரகாஷும் முழுசா எடுத்து வாய்க்குள் திணித்தாங்கள். மற்றவர்களிற்கு போய் சோர விடாமல் இவங்கள் சாப்பிட்ட விதம், கல்லூரி காலங்களில் மற்றவன் பறிக்க முதல் கன்டீனில் ரோல்ஸ் சாப்பிட்டதை நினைவுபடுத்தியது. இறால் பொரியல் வரத்தொடங்க சிவனேசன் "காத்திருந்து காத்திருந்து காலங்கள் போகுதடி" பாடத்தொடங்கவும் சரியாக இருந்தது.


நாட்டுக்கோழி முட்டைப் பொரியல் அமோகமாக விற்பனையாக, நாட்டுக்கோழி முட்டை கையிருப்பு தீர்ந்து நோர்மல் கோழி முட்டைக்கு மாறியிருந்தார்கள். கோபி தானும் பாடப்போகிறேன் என்று மைக்கை பிடித்து "மன்றம் வந்த தென்றலிற்கு" பாடிக்கொண்டிருக்க, மொட்டை மாடிக்கு வந்த யாழ்ப்பாணத்து கணவாய் பொரியல் எங்கட வாய்க்குள் வந்து அசை போட்டது.

யாழ்ப்பாண கணவாயை அடிக்க ஏலாது, மச்சான்.


டொக்டர் சிறிகிருஷ்ணா தலைமையில் ஒரு டீசன்ட் குறூப் ஓரமாயிருந்து வேடிக்கை பார்க்க, குழப்படிகாரன்கள் அட்டகாசம் பண்ணினாங்கள். சிவனேசன் இளையராஜாவின் பாட்டுகளை அள்ளி வழங்க, யாழ்ப்பாண சமையலின் சுவையை கனகாலத்திற்கு பின்னர் கோபி வீட்டில் ருசித்தோம்.



பொட்டு வைத்த வட்ட நிலா பாடினவர்... நல்லா செய்தார், பாட்டை.  அந்தப் பாட்டிற்கு பக்கவாத்தியமாய் மிருதங்கம் வாசித்த வித்துவான் கணா, பாடகரின் தாளத்திற்கு மிருதங்கம் வாசிக்க திணறினதாக ரசிகர்கள் குறைபட்டார்கள். தேவாலயத்தில் அல்லேலூயா பாடும் ரோய் பிரதீபனும் ஒரு காதல் பாட்டை இழுத்து அந்தக்கால காதல் பருவத்தை மீள நினைவுறுத்தினான்.


அன்றைக்கு காலம்பற கல்லூரி அசெம்ப்ளியில் லண்டன் இங்கிலீஷில் முழங்கிய சுரேன், தனக்கும் தமிழ்ப்பாட்டு பாட தெரியும் என்பதை நிரூபிக்க "கண்ணே கலைமானே" பாட்டை ஆரம்பித்து வைத்தான். சுட்டுப்போட்டாலும் பாட்டு வராத நகுவும் கஜனும்,  விஜயனையும் மொழியனையும் பேட்டி கண்டு,  கலாய்த்து இரவை கலகலப்பாக்கினார்கள். 


இரவு சாப்பாட்டிற்கு புட்டு, இடியப்பம், பாண்டியன்தாழ்வு பேக்கரி ரோஸ்ட் பாண், சோறு இவற்றோடு நண்டு குழம்பு, கோழி பொரியல், அவித்த முட்டை, ஆட்டுக்கறி, இறால் வறுவல் என்று நிறைந்த சாப்பாட்டு மேசை எங்களை அழைத்தது.

"மச்சான் நான் டயட்டில இருக்கிறன்டா"

--------------------------------------------------------------------------------------------------------------------------

வியாழக்கிழமை மத்தியானம், வாதுலன் வீட்டில் விருந்து. Big Matchற்கு lunch break விட, மைதானத்திலிருந்து பஸ்ஸில் ஏறி சுண்டுக்குளியில் அமைந்திருந்த வாதுலன் வீடு நோக்கி புறப்பட்டோம். வாதுலன் வீட்டிற்கு போக, ட்ரைவரிற்கு வழிகாட்ட நாங்கள் வெளிக்கிட, யோகதாஸ் தலையிட்டு தான் காட்டுறன் என்று முரண்டு பிடித்தான். பிரதான வீதியில் ஏறி நேராக போக வேண்டிய பஸ், வேம்படி கொன்வென்ட் எல்லாம் தாண்டி போகுது.

எங்களுக்கு யாழ்ப்பாணம் காட்டுறாராம்.


நல்ல உறைப்பான எலும்பு போட்ட ஆட்டிறைச்சி குழம்பு, வத்தின கோழி கறி, கீரை, கத்தரிக்காய் பால்கறி, மோர் மிளகாய், பப்படம், ஊறுகாய், ரசம், சிவப்பரிசி சோறு, என்று யாழ்ப்பாண மத்தியான சாப்பாட்டை ஒரு பிடிபிடித்தோம். குழப்படிகார வாதுலனிற்கு தனது இளைய மகளை திருமணம் செய்து கொடுத்த கணபதிப்பிள்ளை மாஸ்டரின் முகத்தில், தனது பழைய மாணவர்களை கண்டதும் ஏற்பட்ட சந்தோஷத்தை காண முடிந்தது.


கடைசியா ரசத்தை கோப்பையில் விட்டு வழித்து வழித்து சாப்பாட்டு விட்டு, கோப்பையில் மிச்சமிருந்த ரசத்தை உறிஞ்சி குடிக்க... சொல்லி வேலையில்லை.  வயிறு முட்ட இறுக்கிவிட்டு ஈஸிசேயரில் ஓய்வெடுக்க, பாயாசம் பரிமாறினார்கள்.

"தங்கச்சி, இன்பனிற்கு இன்னொரு கப் பாயாசம் வேணுமாம்.. அப்படியே எனக்கும் இன்னொன்று"

-----------------------------------

வியாழக்கிழமை இரவு, அல்லைப்பிட்டி கடற்கரையில் ஒன்றுகூடலிற்கு ஏற்பாடாகியிருந்தது. "மச்சான், என்னென்டா.. சூரிய அஸ்தமனம் அல்லைப்பிட்டி கடற்கரையில் இருந்து பார்த்தா சூப்பரா இருக்குமடா" கோபி எத்தனையோ தடவை சொல்லியும், ஆளை ஆள் இழுத்து பஸ்ஸில் ஏத்தி, பண்ணை பாலம் தாண்ட சூரியன் கடலுக்குள் இறங்கிக் கொண்டிருக்கும்  ரம்மியத்தை ரசித்தோம். வேலணை தாண்ட பனை மரங்களிற்கிடையில் சூரியன் அஸ்தமிக்கும் அந்த அற்புத கணம் கண்கொள்ளா காட்சியாக மனதில் பதிந்தது. 


"சூரியன் அவசரப்பட்டு விட்டது, நாங்கள் அல்லைப்பிட்டி போய்
சேரும் வரை பொறுத்திருக்கலாம்"


கடற்கரையில் டவலை சுத்தி காற்சட்டையை மாத்திக்கொண்டு தண்ணிக்குள் இறங்க சில்லிட்டுது, கல்லு காலில் குத்தியது. பாசிகளில் வழுக்காமல் மெல்ல மெல்ல அடிவைத்து கடலில் ஒரு இடத்தை தேர்ந்தெடுத்து கடல் தண்ணிக்குள் அமர்ந்து அலட்ட தொடங்கினோம்.


அன்னப்பறவை வடிவிலான ஒரு Peddle Boatல் கடலில் கதையலம்பும் நண்பர்களிற்கு இறால் பொரியலும் குளிர்பானங்களும் ஆதியும் இரு அரவிந்தன்களும் மாறி மாறி கொண்டு வந்தார்கள். கடற்கரையில் இருந்த ஒலிபெருக்கியில் "ஆயிரம்.. மல்ரகளே மலருங்கள்" பாட்டு இசைக்கத் தொடங்கியது.

"மச்சான், இது அந்த மாதிரி இருக்கடா..சொர்க்கமடா"


கரையேறி உடல் கழுவி உடுப்பு மாத்தி கடற்கரை கதிரைகளில் அமர யாழ்ப்பாணத்து ஸ்டைல் BBQ வரவும் சரியாகவிருந்தது. உள்ளியை BBQல் போட்டு கொண்டு வந்தார்கள். பிறகு  கோழி, இறால், கணவாய், முட்டை, ஆடு என்று சாப்பாடு வந்து கொண்டேயிருந்தது. கதிரைகளை சுத்தி போட்டு இருந்து ஆளை ஆள் கடிக்க தொடங்கினோம்.


"மச்சான் கணா, நீ தமிழில் தூஷணம் கதைத்து நாங்க கேட்டதில்லையடா.. ஒருக்கா பேசிக்காட்டு செல்லம்"
கணா எழும்பி, காற்சட்டையை இழுத்து விட்டு விட்டு.. பேசினான், கணாவை பேசக் கேட்டவன் சொந்த செலவில் சூனியம் வைத்தான்.


"சொர்க்கத்தின் வாசல்படி" ஜேசுதாஸ் பாட, இளையராஜாவின் பாடல்கள் மீளவும் உருவாக்கிய பதின்ம பருவ சூழ்நிலையில், கதை காதல் நோக்கி திரும்பியது. அந்த காலத்தில் சுழற்றிய சரக்குகள் பற்றியும் சுழற்றாத சிஸ்டர்மார் பற்றியும் சுவை ததும்புப பெடியள் கதை கதையா சொன்னாங்கள். அன்று நெஞ்சை பிளந்து கண்ணீர் வரவழைத்த காதல் கதைகள் இன்று சிரிப்பை பரிசளித்தன. 

காதல் காயங்கள் ஆறிவிட்டன..



--------------------------------------------------------------------------------------------------------------------------

வெள்ளிக்கிழமை இரவு உடுப்பிட்டியில் நவத்தார் வீட்டில் பார்ட்டி. நவத்தார், எங்கட இன்னுமொரு மண்டைக்காய், இன்று யாழ்ப்பாணத்தில் சிரிலங்கா டெலிகொம்மின் பெருந்தலை. நவத்தாரின் பழைய நாச்சார் வீட்டின் முற்றத்தில், மாமரத்திற்கு கீழ் மேசை கதிரை போட்டு, நுளம்பு வராமல் புகையும் அடித்திருந்தார்கள்.  தம்பி ஜேகே அண்மையில் எழுதிய யாழ்ப்பாணத்து நாச்சார் வீடுகள் பற்றிய பதிவின் அருமை, அந்த வீடுகளை நேரில் தரிசிக்கும் போது இன்னுமொரு படி மெருகேறியது. 


வெள்ளிக்கிழமை, கோயில் திருவிழா என்று சில கெட்ட சாமான்கள் "ஒரு நாள் நல்லவன்"களாக மாறினாலும் பம்பலுக்கு குறைவிருக்கவில்லை. விஜயன் வந்திறங்கி தனது சக Orthopaedics வைத்தியர்களுடன் மட்டும் படம் எடுக்க, நக்கல் உச்சத்தை தொட்டது. அதே பழைய அரண பரண கதைகள் வலம்வர, ஆயிரத்தெட்டாவது தடவையும் அந்த கதைகளை முதல் முதலாக கேட்ட போது சிரித்த அதே சிரிப்ப்பு மீண்டும் எதிரொலித்தது. 


இரவுச்சாப்பாட்டிற்கு, நவத்தார் அடுத்த ஒழுங்கையில் புதிதாக கட்டியிருந்த வீட்டிற்கு அழைத்து சென்றான். அங்கும் இன்னொரு விதவிதமான சுவைமிகு யாழ்ப்பாண சமையல் நமக்காக காத்திருந்தது. அன்றிரவு புட்டை கணவாய்க் குழம்போடும் இடியப்பத்தோடு பால் சொதியில் பிசைஞ்சு இறால் பொரியலோடு சேரத்தடிக்க..சொல்லி வேலையில்லை பாஸ்...

எங்கட யாழ்ப்பாணமடா

அடுத்த பதிவில் முடிவுறும்..





Friday, 8 April 2016

மீண்டும் பள்ளிக்கு.... அனுபவதித்ததிலிருந்து 4




மீண்டும் பள்ளிக்கு போகலாம் 
நம்மை நாம் அங்கு காணலாம்

"பள்ளிக்கூடம்" படத்தில் இடம்பிடித்த அந்த அருமையான பாடல் வரிகளை கேட்கவே உள்ளம் கூத்தாட தொடங்கும்.  துள்ளித்திரிந்த காலத்தில் ஓடித்திரிந்த பாடசாலை வளாகத்தை மீண்டும் தரிசிக்கும் போது ஏற்படும் உணர்வை வார்த்தைகளால் வர்ணிக்க முடியாது, அனுபவதித்து தான் உணரவேண்டும். அதே மீள்தரிசனம், பம்பலடித்து திரிந்த நண்பர்களுடன் என்று அமையும் போது விபரிக்க விளையும் சொற்களே பிடறியில் குதிக்கால் அடிக்க ஓடி ஒளியும். 


யாழ்ப்பாண வரவேற்பு வளைவில் நடுவீதியில் நின்று குறூப் படம் எடுக்க, ஏ9 வீதியில் சென்ற வாகனங்கள் சற்று நேரம் தரித்து நின்று எங்களுக்கு வழிவிட்டன. சாவகச்சேரியிலிருந்து யாழ்ப்பாணம் நோக்கி சென்ற மினிவானின் ஓட்டுனர் கையசைத்து தனது மகிழ்வை வெளிப்படுத்தினார்.




"மச்சான், கணக்கர் சந்தியில் என்னை இறக்கி விடுங்கோ" லண்டன் ஜெய் நாவற்குழி பாலத்தடியில் கோரிக்கை வைக்க, கண்டி வீதியில் புங்கன்குளம் சந்தியை யார் கண்டுபிடிப்பது என்று எமக்குள் சிறு போட்டி. சுண்டுக்குளி மாணவி கிரிஷாந்தி உட்பட பலர் கொலை செய்து புதைக்கப்பட்ட செம்மணி வெளி தாண்டினோம். மாம்பழம் சந்தியை விஜயனும் நெடுங்குளம் சந்தியை அம்மானும் இதுதான் புங்கன்குளம் சந்தி என்று காட்டி மொக்கன் ஆனாங்கள். கடைசியில் எல்லாருமா சேர்ந்து ஒடுங்கிய புங்கன்குள வீதியில் பஸ்ஸிற்கு வழிகாட்ட, ரயில்வே கடவையை கடந்தோம்.


"இதான்டா யசியர்ட வீடு" நெடுங்காலம் எம்மோடு தொடர்பெடுக்காத ஆத்ம நண்பனொருவனை நினைவில் நிறுத்தினோம்.




லண்டன் ஜெய்யை கணக்கர் சந்தி தாண்டி நாகராஜா ஒழுங்கையில் இறக்கி விட்டிட்டு,  நீண்ட ஈச்சமோட்டை வீதிவழியே பஸ் பயணித்து, பழைய பூங்கா வீதியில் திரும்பி, பிரதான வீதியில் வளைந்து பரி யோவான் கல்லூரியின் பிரதான வாசலில் வந்து நின்றது. 

தாய் மண்ணே வணக்கம் !

எங்களை வரவேற்க வந்திருந்த ரோய் பிரதீபனுடன் சேர்ந்து நாங்கள் கல்லூரியின் பிரதான வாயிலில் படம் எடுக்க, பிள்ளைகளை கல்லூரியில் இறக்கி விட வந்திருந்த பெற்றோரும் மாணவர்களும் வீதியால் போவோரும் வேடிக்கை பார்த்தார்கள்.


-------------------------------------------------------------------------------------------------------------------------

"மச்சான், பதினொரு மணிக்கு பிரின்ஸிபலோடு அப்போய்ண்ட்மண்ட்" நூற்றி நாற்பத்து ஒன்பதாவது தடவையாக ஆதி இம்சை படுத்தினான்.

"மச்சான், நீ ஓட்டோல போ, நாங்க பிறகு வாறம்" டொல்ஃபின் வானில் நல்லூருக்கு போய் கும்பிட்டுவிட்டு உரும்பிராய்க்கு போகும் வழியில் ஆதிக்கு உபாயம் சொன்னோம்.

"கோர்ட் சூட் போட்டுக் கொண்டு, அவனை ஓட்டோல போகச் சொல்லுறியா ?" கஜன் உசுப்பேத்தினான்.

அடப்பாவிகளா


--------------------------------------------------------------------------------------------------------------------------

பத்தரைக்கு ஆதியை  டொல்ஃபினில் அனுப்பிவிட்டு, நாங்கள் பதினொன்றரைக்கு ஓட்டோ குமாருடன் கல்லூரியில் போய் இறங்கினோம். Cotton trouser, shirt, sun glass அணிந்து சின்ன கேட்டால் உள்ளிட்ட எங்களை கண்ட வொட்ச்சர் கண்களால் விசாரிக்க

"Old boys" புன்னகையுடன் வொட்சர் வரவேற்றார்.

நாங்கள் கல்லூரிக்குள் நுழைந்த சில நிமிடங்களில் எங்களோடு யாழ்ப்பாண படையணியும் இணைந்து கொள்ள எல்லோர் முகங்களிலும் மகிழ்ச்சியும் சந்தோஷமும் குடியேறுகிறது. சிதைவடைந்த Robert Williams மண்டபம் கடந்து Male staff roomற்குள் எட்டி பார்க்கிறோம், எமக்கு படிப்பித்த ஆசிரியர் யாராவது தென்படுவார்களா என்ற நப்பாசையுடன்.

" மச்சான், எல்லாம் புது வாத்திமாரா இருக்கீனமடா"

பழைய சைக்கிள் பார்க் தாண்டி, மைதானத்திற்குள் காலடி வைக்கவும், இடைவேளை மணியடிக்கவும் சரியாகவிருந்தது. எங்கிருந்தோ பறந்து வந்த மாணவர்கள், சூட்கேஸை விக்கெட்டுகளாக வைத்து பிட்ச் பிடித்து, கிரிக்கட் விளையாட தொடங்கினார்கள். சில நிமிடங்களில் மைதானம் நிறைய மாணவர்கள், ஒரே நேரத்தில் ஆறேழு கிரிக்கட் மட்ச்கள்.

அந்த நாள் ஞாபகம் வந்ததே நண்பனே

"டேய் ஜூட், ஏலுமேன்றா என்னை அவுட்டாக்கு" ஆதி சவால் விட்டான்.

"தம்பி, ஒருக்கா எங்களை விளையாட விடுங்கோ" ரோய் பிரதீபன் மிரட்டலாக வேண்டுகோள் வைத்தான்.

"இந்தாங்கோ அங்கிள்" 

"அங்கிளோ, அடி....அண்ணாவென்று சொல்லடா" பந்து தந்த தம்பி பயந்தே போனான்.

பந்தை கையில் எடுத்து கொண்டு திரும்பி பார்த்தால், அந்த நெடிய மரமும், தண்ணீர் தாங்கியும், தண்ணீர் குடிக்கும் பைப்புகளும், பஞ்சலிங்கம் மாஸ்டர் வீடும் நினைவில் நிழலாட, மரத்திற்கு கீழே கச்சான் விற்கும் ஆச்சியும், ஜஸ்கிரீம் விற்கும் சிவகுருவும் கண்முன் தெரிந்தார்கள்.

--------------------------------------------------------------------------------------------------------------------------


அருளானந்தம் ப்ளொக் நெடுக நடந்து ராஜசிங்கம் ப்ளொக் மூலையில் இருந்த குறுகிய படிக்கட்டில் ஏறி 1989ல் நாங்கள் படித்த Year 11Bஐ அடைந்தோம்.  இடைவேளை நேரம் விளையாடப் போகாமல் வகுப்புக்குள் இருந்த லூசுப்பயலுகள் பிரமித்து பார்க்க, வகுப்பறை எங்கள் கட்டுப்பாட்டுக்குள் வந்தது.

"டேய், நான் தான் மொனிட்டர், எல்லாம் போய் இரு" நகு அன்று தான் வகிக்காத பதவியை இன்று தனதாக்கிக்கொண்டான். 

மண்டைக்காய் கணா, பழைய ஞாபகத்தில் முன்வரிசையில் அமர, முன்னாள் குழப்படிகாரன் வாதுலனும் அவனுக்கு பக்கத்தில் இடம்பிடித்தான்.
கடைசி வாங்கிலிருந்து கள்ளமாக Sports Star வாசித்த அருள்மொழியும் முன்வாங்கில் தன் உடலை திணிக்க, சிரித்து கொண்டே கப்டன் இன்பனும் அமர்ந்தான்.


தம்பிமாரின் கையில் அண்ணாமாரின் நவீன தொலைபேசிகள் அண்ணாமாரை படமெடுக்க, வாழ்வில் மறக்க முடியாத ஜந்தே ஜந்து நிமிடங்கள் இதயத்திலும் கமராவிலும் பதிவாகின்றன. பசுமை நிறைந்த நினைவுகள் என்று கடந்த காலத்தை ஏன் வர்ணிக்கிறார்கள் என்பதை நாங்கள் அனுபவித்து உணர்ந்தோம். 


"ஐசே.. ஏன் நிற்கிறீஈஈஈர்" பின்வாங்கில் எழுந்து நின்றவர்களை பார்த்து அந்த காலத்தில் எங்கள் வகுப்பை மேய்த்த சின்ன டொங்கரின் பாணியில், பழைய பொலிஸ் ரோய் பிரதீபன் அதட்டினான்.

-----------------------------------

அருளானந்தம் ப்ளொக்கின் மேல்மாடியில் நடக்க தொடங்க, 
தேவையே இல்லாமல் தேவராசா மாஸ்டரிடம் அடி வாங்கி படித்த, இல்லை நேரத்தை வீணாக்கிய, ஆர்ட் ரூம் வகுப்புகளாக உருமாறியிருந்தது.

"இதில தான் முந்தி ஆர்ட் ரூம் இருந்ததா சொல்லினம்" புதிதாக வந்த ஆசிரியர் எங்களுக்கு பரி யோவான் வரலாறு போதித்தார்.

காலமடா சாமி !

--------------------------------------------------------------------------------------------------------------------------

படியால இறங்க சந்திரமெளலீசன் மாஸ்டர் எங்களை நோக்கி வரவும் சரியாக இருந்தது. 1981ல் எங்களுக்கு 2ம் வகுப்பில் வகுப்பாசிரியராக தனது ஆசிரியப்பணியை தொடங்கிய மெளலீசன் மாஸ்டருக்கு இந்தாண்டு ஆசிரியப்பணியில் வெள்ளிவிழா ஆண்டு.

எங்களை கண்டதும், அடையாளம் கண்டு கொண்டு, முகம் மலர்ந்து, நெற்றியில் கை வைத்து

"இஞ்ச பாருங்கோடா.. எல்லா குழப்படி கோஷ்டிகளும் வந்திறங்கியிருக்கு" மெளலீசன் மாஸ்டர் மெய்சிலிர்த்தார்.


"சேர், காதல் பொங்க நீங்கள் நளவெண்பா படிப்பித்தது மறக்கேலாது" பக்கத்து வகுப்பில் படித்த நகு கலாய்த்தான்.


"சேர், ரெண்டாம் வகுப்பில் நீங்கள் போட்ட, விசுவாமித்திரன் நாடகம் ஞாபகம் இருக்கா" யோகதாஸ் நினைவுபடுத்தினான்


"அதை எப்படி மறக்கேலும், யாதவன், இறைவன் நடித்தவங்கள், எங்கட விஜயனும்" மெளலீசன் மாஸ்டருக்கு ஞாபகம் இருந்தது.


"சேர், நானும் நடித்தனான். மரமாக.. ஜ மீன் ஒரு பெரிய மரக்கொப்பை பிடித்து கொண்டு விசுவாமித்திரனுக்கு பின்னால நின்றனான்" நானும் இணைந்து கொண்டேன்.


பக்கத்தால போன டீச்சர்மார், "சேருக்கு இன்றைக்கு பிறந்தநாள்" என்று சொல்ல, நாங்கள் எல்லோரும் சேர்ந்து சத்தமாக Happy Birthday பாடினோம். அசெம்பிளிக்கு அணிவகுத்து சென்ற பொடியள் சிரித்தார்கள்.

--------------------------------------------------------------------------------------------------------------------------


Principalலோடு நடந்து போய், Peto Hallல் முன்வரிசையில் assemblyயில் இருக்க, வித்தியாசமாய் இருந்தது. அன்றைய Assemblyயில் 1990 Big Matchல் 145 ஓட்டங்கள் அடித்து சாதனை படைத்த எங்கள் batch நண்பன் சுரேன் சிறப்புரையாற்றினான். இன்றுவரை வடக்கின் பெரும் போரில் highest individual scorer எனும் பெருமையை சுரேன் தக்கவைத்துள்ளான்.


எங்களோடு பக்கத்திலிருந்து பம்பல் அடிக்கும் சுரேன், எடுப்பாக மேடையில் ஏறி விலாசமாக பேச, பெருமை கொண்டோம். கிரிக்கட்டும் பரி யோவானும் தனக்கு கற்று தந்த வாழ்க்கை பாடங்கள் பற்றி கருத்தாழமிக்க உரையாற்றினான் சுரேன். சுரேனின் துடுப்பாட்டம் போலவே, அவனது உரையாற்றிய பாணியிலும் வேகமும் ஸ்டைலும்
இருந்தது.  சுரேன் தனது உரையை தன் சொந்த வாழ்வனுபவத்தையும் Alex Ferguson போன்றோரின் சுயசரிதை புத்தகங்களையும் மையப்படுத்தி வடிவமைத்திருந்தான்.

எழும்பி நின்று கைதட்டியிருக்கோணும்



யோகதாஸின் மகனிற்கு அன்று பரி யோவான் U13 கிரிக்கட் அணியின் சிறந்த fielderற்கான விருது கிடைத்தது சந்தோஷத்தை தந்தது.

புலிக்கு பிறந்தது...

--------------------------------------------------------------------------------------------------------------------------

அசெம்ப்ளியில் பழைய மாணவர்களின் பிறந்த நாளிற்கு கேக் வெட்ட தொடங்க, பரி யோவான் பிரதான வாயில் பக்கம் தாரை தப்பட்டை சத்தங்கள் கேட்க தொடங்கின. நகுவிற்கும் எனக்கும் இருப்பு கொள்ளவில்லை. ஆளுக்காள் கண்ணை காட்டி விட்டு இருவரும் எழுந்து மண்டபத்தை விட்டு வெளியேறினோம்.


"பயந்த மாதிரி காட்டாதே, நெஞ்ச நிமிர்த்தி நடந்து வா" பிரதான வாயிலிற்கு வெளியே மத்திய கல்லூரி மாணவர்கள் அவர்களின் கல்லூரி கொடிகளோடு ஆடுக்கொண்டிருக்க, நகு தைரியமளித்து என்னை கூட்டிக்கொண்டு போனான்.


ஆடுற மத்திய கல்லூரி பொடியளிற்கு கிட்ட போய் நாங்க வேடிக்கை பார்க்க, அவங்களுக்கு உற்சாகம் பிறந்து வெறித்தனமாக ஆடினாங்கள். ஒரு சுற்று ஆடிமுடிய, நகு சொன்னான்


"ஏன்டா இங்க நின்டு மினக்கிடுறீங்கள், சுண்டுக்குளிக்கு முன்னால போய் ஆடுங்கோவன்"

"மணி ஐடியா அண்ணே" பொடியள் பறந்திட்டாங்கள். பிரதான வாயிலிற்கு வெளியே ஆடிய மத்திய கல்லூரி கோஷ்டியை சாணக்கியமாய் கலைத்த நகு, அதை பார்த்துக்கொண்டிருந்த பரி யோவான் அலுவலக உத்தியோகத்தர்கள் மத்தியில் பிரபலமானான்.

--------------------------------------------------------------------------------------------------------------------------


நகுவும் நானும் திரும்ப வரவும் அசெம்ப்ளி முடிந்து தம்பி கோபி வெளில வரவும் சரியாக இருந்தது.

"அண்ணே என்ன விலாசமா, அசெம்ப்ளி நடுவில எழும்பி போனீங்கள், சென்ரல்காரன்களிட்ட அடி கிடி வாங்கினீங்களோ" கோபியின் கேள்வியில் மேலோங்கியது நக்கலா நளினமா என்று மூளை பட்டிமன்றம் நடாத்த..


"இங்க பாரும் ஜசே, பொடியள் லைன்னில் போகாமல் கண்ட பாட்டுக்கு போறாங்கள், அதை முதலில் கவனியும்" நாங்கள் திருப்பி தாக்கினோம்.


"உங்கட காலம் போல இல்லை அண்ணே இப்ப, சொல்லி பாருங்கோவன், உங்களுக்கே விளங்கும்" கோபி அங்கலாய்த்தான்.


"தம்பிமார், லைனில் போங்கோடா.. ஐசே உமக்கு சொல்லுறது விளங்கேல்லயோ" எங்களை வெருட்டி வழிநடத்திய Prefectsஐ போல் நாங்கள் கட்டளை பிறப்பித்து நிலைமையை கட்டுப்பாட்டுக்குள் கொண்டு வந்தோம்.


சில நிமிடங்களில் பாடசாலை மணி அடிக்க அன்றைய நாள் பாடசாலை முடிவுக்கு வந்தது. சைக்கிள்களை எடுத்துக்கொண்டு கல்லூரியின் பிரதான வாயிலை நோக்கி படையெடுத்த தம்பிமாருடன் நாங்களும் சங்கமித்து, பசுமை நிறைந்த நினைவுகளை மீண்டுமொருமுறை வாழ்ந்து அனுபவித்தோம்.


பரி யோவான் வாசலிற்கு வெளியே, பிரதான வீதியை கடக்க, வாகனங்களை நிறுத்தி எமக்கு வழிசமைத்து தந்த சிரிக்கும் சிரிலங்கா பொலிஸ்காரன் மட்டும் ஏனோ அந்நியமாய் தெரிந்தான். 

மீண்டும் பள்ளிக்கு போகலாம் 
நம்மை நாம் அங்கு காணலாம்

Friday, 1 April 2016

அனுபவித்ததிலிருந்து 3.. Big Match 2016



இளநீர் குடித்துவிட்டு திரும்பிவர, ஒரு சின்ன ட்ரக்கில் பரி யோவான் மாணவர்கள் கொடிகளோடும் பீப்பிகளோடும் தாரை தப்பட்டைகளோடும் நிற்கிறாங்கள்.

என் இனமே என் சனமே

"தம்பி நாங்களும் வரட்டோ" பம்மினோம், ஆட்டத்திற்கு எங்களையும் சேர்ப்பாங்களோ என்ற சந்தேகம்.

"அண்ண.. என்ன விசர்க்கதை.. ஏறுங்கோ" .. தம்பிடா

"ஏத்தி விடுங்கோடா" முக்கி தக்கி ட்ரக்கில் ஏறினோம், இல்லை தம்பிமார் ஏற்றி விட்டார்கள்.


கஜன், உரும்பிராய் அரா, ஜெய், நகு என்கிற ரகு, கணாவோடு நானும் இளம் பொடியளோடு சேர்ந்து ஏற ட்ரக் நிறைந்து விட்டது. ஒரு மூச்சு பிடித்து இழுத்து ட்ரக் நகர தொடங்கியது. மீண்டும் இயங்கத் தொடங்கியுள்ள யாழ் மணிக்கூட்டு கோபுரத்தையும் அதை சூழ அமைக்கப்பட்டுள்ள தமிழ் மன்னர்களான எல்லாளன், பண்டாரவன்னியன், சங்கிலியன் ஆகியோரது உருவச்சிலைகளையும் ஒரு முறை வலம் வந்து வேம்படி மகளிர் கல்லூரி நோக்கி ட்ரக் பயணிக்கிறது. வழியில் மத்திய கல்லூரி மாணவர்கள் பாசறையிலிருந்து கூய் சத்தங்கள் ட்ரக்கை குறிவைக்கின்றன. 


வேம்படி மகளிர் கல்லூரியின் முன்னாள் சில நிமிடங்கள் தரித்து நின்று வாத்தியங்கள் முழங்க, ட்ரக்கிலிருந்தவாறே பொடியள் ஆய் ஊய் என்று கத்த, நாங்கள் வேடிக்கை பார்க்கிறோம். 


நாங்க இன்னும் ஃபோர்மிற்கு வரவில்லை.


ஒரு u turn அடித்து திருப்பி, மீண்டும் மைதானம் நோக்கி வந்து, மத்திய கல்லூரி காரன்களின் பலத்த எதிர்ப்பை முறியடித்து, தமிழ் மன்னர்களின் சிலைகளை மறுமுறை வலம் வந்து, மணிக்கூட்டு கோபுர வீதியில் ட்ரக் மிதக்க தொடங்குகிறது. 


1980களின் இறுதியில் சுரேஷ் பிரேமச்சந்திரன் தலைமையிலான மண்டையன் குழு கோலோச்சிய அசோக் ஹோட்டலில் இன்று சிரிலங்கா பொலிஸ் நிலையம். பொலிஸ் நிலையத்தடியில் ஆயுதங்கள் முறுக்கேற்றப்பட, புதிதாக திறக்கப்பட்ட வெள்ளை நிற ஜந்து மாடி Jetwings ஹோட்டலை தாண்டுகிறோம்.


"ஆஸ்பத்திரி தாண்டு மட்டும், சத்தம் போட வேண்டாம்" சிவப்பு கறுப்பு ஷேர்ட் அணிந்த சிறப்பு தளபதி தம்பி தீபன் கட்டளையிடுகிறார், மூத்த போராளிகளான நாங்கள் கட்டுப்படுகிறோம். மணிக்கூட்டுகோபுர வீதியிலிருந்து இடப்பக்கம் திரும்பி ஆஸ்பத்திரி வீதியில் ட்ரக் பயணிக்கிறது. பூபாலசிங்கம் பொத்தக சாலையடியில்

"தம்பி, மேளத்தை ஓஸ்ரேலியாகாரனிட்ட குடுங்கோடா, அடி தூள் கிளப்புவான்"


கொஞ்சம் தெம்பு கலந்து உரத்து குரல் கொடுக்க, மேளமடிக்கும் தடி கணாவின் கையில் ஏறுகிறது. யாழ்ப்பாணத் தம்பி மேளத்தை பிடிக்க ஒஸி கணா தன்னுடைய வித்தையை யாழ் நகரின் மத்தியில் அரங்கேற்றுகிறான்.


College... College 
St. John's College

எங்கட College 
St. John's College

உங்கட College
St. John's College

அப்பாட college
St. John's College

அம்மாட College
St. John's College

டேய் சுண்டுக்குளிடா..


வாகனத்தில் சிரிப்பலை அதிர அந்த காலத்து நாங்களும் இந்த காலத்து அவங்களும் அன்னியமானோம். ட்ரக் காங்கேசன்துறை வீதியில் வலப்பக்கம் திரும்பி யாழ் இந்துக் கல்லூரி நோக்கி பயணிக்க தொடங்கியது. பரி யோவானின் கொடிகள் வானத்தில் அசைத்தாட யாழ் நகர வீதிகளில் நாங்கள் பயணிக்கும் தருணங்கள் மெய் சிலிர்க்க வைத்தன.

"மச்சான், this is the best part, glad that I made it" லண்டன் ஜெய் நெகிழ்ந்தான். 

ட்ரக்கின் நடுவில், ஒரு கையில் கொடியோடும் மறுகை யாரோ ஒரு தம்பியின் தோளைபிடித்துக் கொண்டும், தொத்துபொறியில் ஜெய்யின் உணர்வை உள்வாங்கிக்கொள்கிறேன். ஒரு கரையில் கஜன் ரோட்டோரம் போவோரை பார்த்து கொடியசைத்து கொண்டிருந்தான். நகு ஒரு மூலையில் கம்பியை இறுக்கமாக பிடிக்க, அரா மட்டும் கண்ணும் கருத்துமாக வீடியோ எடுத்து கொண்டிருந்தான்.

"மச்சான், படங்களை WhatsApp பண்ணு, foruத்தில் போட்டு விசரை கிளப்போணும்"


மிளிரும் நீல வெள்ளை,யாழ்ப்பணாத்தின் அறிவுக்களஞ்சியமாம்,  இந்துக்கல்லூரியின் கட்டிடங்களையும் மைதானத்தையும் தாண்டி, இந்து மகளிர் கல்லூரியடியில் வாகனத்தை நிறுத்தினார்கள். வாகனத்தில் வந்த ஒரு தம்பியின் சரக்கு இந்து மகளிர் கல்லூரியில் படிக்கிறாவாம். 

வாழ்க வளமுடன்

90 big match நடந்த போது, வீட்டிலிருந்து தேற்றம் நிறுவி பழகின, மண்டைக்காய் கணா, வீதியில் இறங்கி, இந்து மகளிர் கல்லூரி வாசலில் அட்டகாசமாய் மேளம் அடித்த அந்த காட்சியை காண, கொடுத்து வைத்திருக்க வேண்டும்.





ட்ரக்கை திருப்பிக் கொண்டுவந்த தம்பிமார், ஏதோ ஒரு ரோட்டால போட்டு திருப்பி பலாலி வீதியில் ஏத்தினாங்கள். திருநெல்வேலி சந்தை தாண்ட பக்கத்தில் நின்ற ஒரு தம்பி, இன்னொருத்தனை தட்டி 

"டேய், உன்ட கொப்பரடா"

அவன் படக்கென்று ட்ரக்கிற்குள் பதுங்க நாங்கள் அவனை கல்லூரி கொடியால் மறைத்தோம். ஆரியகுள சந்தியில் வாகனம் இடப்பக்கம் திரும்பி ஸ்டான்லி வீதியில் ஏறும் வரை, "கொப்பர் கண்ட அம்பி", குழம்பியடித்து "என்னை அப்பர் கண்டிருப்பாரா மச்சான்" என்று ஆயிரம் தடவை கேட்டு எல்லோரையும் வெறுப்பேத்தினான்.


ஸ்டான்லி வீதியில் அத்தியடி வீதி கடக்க, வீதியோரத்தில் விபத்தில் அடிபட்ட ஒரு இளைஞன் வீதியில் விழுந்து கிடக்க, சுற்றிவர சனம். முகத்தில் ரத்தம் வழிய வீதியில் விழுந்து கிடந்த இளைஞனை கண்டதும், மேளதாளங்களை உடனடியாக நிறுத்தி வாகனத்தை ஓரங்கட்டினார்கள், பரி யோவானின் மாணவர்கள்.

"மச்சான் ஓட்டோவை மடக்கு"

வீதியில் வந்த ஓட்டோவை மறித்து, காயப்பட்ட இளைஞனை ஆஸ்பத்திரிக்கு அனுப்பி, வீதியில் குழுமியிருந்த சனத்தின் மத்தியில் எழுந்த சலசலப்பை சமாளித்து, வாகனத்தில் மீண்டும் ஏறிய பரி யோவான் மாணவர்களை பார்க்க உண்மையிலேயே பெருமையாக இருந்தது. 

"Lux in tenebris luce
Light shines in the darkness"


இராசாவின்தோட்ட வீதியில் வளைந்து, தண்டவாளம் தாண்டி, மடத்தடி வீதியில் மிதந்து, பிரதான வீதியை அடைய, பழையபடி தாரை தப்பட்டைகள் முழுங்க தொடங்கியிருந்தன. ரோட்டோரம் சனம் சிரித்து கொண்டே வேடிக்கை பார்க்க, பஸ்தியான் சந்தி, ஆளில்லா பரி யோவான் வளாகம், பழைய பூங்கா வீதி சந்தி தாண்டி, சுண்டுக்குளி மகளிர் கல்லூரியின் முன் வாகனம் நிறுத்தத்திற்கு வந்தது. 


1990 Big Match மூட்டம் எம்மோடு பம்பலடித்து, அண்மையில் எம்மை விட்டு பிரிந்த Michael, சிவகுமரன் (சேரலாதன்) அதே இடத்தில் ஆடிய காட்சி கண்முன் விரிய, இளமைக்கால நினைவுகளுடனும் உற்சாகத்துடனும் நாங்கள் களத்தில் இறங்கி ஆட, தம்பிமார் மேளம் கொட்டினார்கள்.


இருபதில் அனுபவிக்காதது
நாற்பதில் அனுபவித்தோம்


மீண்டும் வாகனமேறி, வியர்வை கொட்ட கொட்ட, யாழ்ப்பாணத்தின் பிரதான வீதியூடாக, பயணிக்க தொடங்கினோம். வழிநெடுக கணாவின் மேளதாளத்திற்கு கால்கள் தானாக ஆட பரி யோவானின் சிவப்பு கறுப்பு நிற கொடி காற்றில் கம்பீரமாக அசைந்தாடியது. யாழ் நீதிமன்ற வளாகத்தடியில் மெளனம் காத்து, தந்தை செல்வா நினைவுத்தூபியடியில் திரும்பி, யாழ் நூலகத்தை அண்ணாந்து பார்த்து முடிய, ட்ரக் மைதானத்தடியில் வந்து நின்றது.

"தாங்கஸடா தம்பிமார், சந்தோஷமடா"

"அண்ணே, நாங்க தான் உங்களுக்கு நன்றி சொல்லோணும்"

நாங்கள் பாசமழையில் நனைய, பழைய மாணவர்களிற்கான வாசலில் cowboy hatம் விஜயகாந்த் sunglassesம் அணிந்து முறுக்கின மீசையோடும் body languageல் கடுப்போடும் மிடுக்கோடும் சிரிக்காமல் கிரிக்காமல் வரவேற்றார், தம்பி கோபிகிருஷ்ணா, பரி யோவானின் ஒழுக்கத்துறை பொறுப்பாளர்.

"கோபி,  என்ன ஸ்கோர் தம்பி"



தொடரும்

அனுபவித்ததிலிருந்து 1
http://kanavuninaivu.blogspot.com.au/2016/03/2016-big-match.html

அனுபவித்ததிலிருந்து 2