Thursday, 24 March 2016

அனுபவித்ததிலிருந்து 2....2016 Big Match



யாழ்ப்பாணம் மத்திய கல்லூரி மைதானத்தில், 110வது வடக்கின் பெரும் போரிற்காக பலத்த பாதுகாப்பு ஏற்பாடுகள் செய்யப்பட்டிருந்தன. 2014லும் 2015லும் பரி யோவான் அணியின் கை ஓங்கியிருந்த வேளையில் மைதானத்திற்குள் புகுந்த குழப்பவாதிகளால் ஆட்டம் இடைநிறுத்தப்பட்டது. அவ்வாறான சம்பவம் இம்முறையும் இடம்பெறுவதை தடுக்க, குழப்பவாதிகளை கட்டுப்படுத்தவென யாழ்ப்பாண நீதிவான் இளஞ்செழியனின் உத்தரவிற்கமைய பொலிஸார் பாதுகாப்பை பலப்படுத்தியிருந்தனர். 


பரி யோவானில் படிக்கும் காலங்களில் மாணவர்கள் மைதானத்திற்குள் இறங்குவது கல்லூரி நிர்வாகத்தால் தடைசெய்யப்பட்டிருந்தது. மாணவர்களை மைதானத்திற்குள் இறங்கவிடாமல் பரி யோவானின் காவல்துறை, இயக்கம் முகமாலை எல்லையை காப்பதுபோல், மைதானத்தின் எல்லை கோட்டை காவல் காக்கும். விக்கெட்டுகள் விழும் போதும், துடுப்பாட்டகாரர்கள் ஜம்பது, நூறு அடிக்கும் போதும் பழைய மாணவர்கள் கொடிகளோடு மைதானத்திற்குள் இறங்குவதை நாங்கள் பொறாமையோடு பார்ப்போம். 


1990ல் சுரேன் நூறடிக்க, முன்னாள் பரி யோவான் காவல்துறை அதிகாரியான சுதர்ஷன் அண்ணா மைதானத்துக்குள் ஓடி எங்களை வெறுப்பேத்தினார். மெல்பேர்ணில் வாழத்தொடங்கிய பிறகு தான் மைதானத்திற்குள் ஓடியதை அடிக்கடி பெருமையாக சொல்லி சொல்லி எங்களை கடுப்பேத்துவார்.
கடந்த நவம்பரில் Big Matchற்கு போவோம் என்று சுரேன் பிரேரிக்க ஆதியும் ஆமோதிக்க, மைதானத்திற்குள் ஓடும் காட்சி கண்முன் விரிந்தது.


இந்த முறை நாங்களும் மைதானத்திற்குள் ஓடி, பழைய மாணவர்காளாக எமக்கு கிடைத்த சுதந்திரத்தை அனுபவிக்க வேண்டும் என்ற எண்ணம் மனதை ஆட்கொண்டது. பயணிப்பதற்கு சில நாட்களிற்கு முன்னர் இந்த ஆசையை தம்பி கோபிகிருஷ்ணாவுடன் பகிர, அவன் inboxல் ஒரு இடியை தூக்கி போட்டான்.

"No. Strictly prohibited".. பரி யோவானில் இங்கிலீஷ் காற்று பலமாக வீசும்.


யாழ்ப்பாணம் வந்திறங்க, உதயனில் மூன்றாம் பக்கத்தில் "வடக்கின் பெரும்போர்: மைதானத்திற்குள் நுழைவோருக்கு மூன்று நாள் சிறை - இளஞ்செழியன் அதிரடி" என்று செய்தி வாசிக்க, வந்த விசர் அடங்கி விட்டது..இல்லை அடக்கப்பட்டு விட்டது. 

நோட் திஸ் பொயின்ட், யுவர் ஒனர்


மைதானத்திற்குள் ஓடவேண்டும் என்ற எனது கனவை நிறைவேற்ற ஆட்டத்தின் பிரதான அனுசரணையாளரான Airtelன் வடமாகாண பொறுப்பாளரும் எனதருமை நண்பனுமான ரோய் பிரதீபன் ஒரு திட்டம் வகுத்தான். இரு அணிகளும் கல்லூரி கொடிகள் ஏற்றவும் அர்ஜுனவுடன் கை குலுக்கவும் மைதானத்திற்குள் இரு புறமும் அணிவகுத்து நிற்க..

"மச்சான், இப்ப ரெண்டு டீமுக்கும் நடுவால் ஓடு.. ஆதியை விட்டு படம் எடுத்திட்டு, Facebookல், கனவு நனவானது என்று status போடு" தளபதி ரோய் தாக்குதல் திட்டத்தை விபரித்தான். 

"மச்சான், பொலிஸ் பிடிக்காதே ? " அத்திவாரம் ஆட்டங்கான பில்டிங் பலமாக நின்றது.

"பிடிச்சா உன்னை சுமா எடுத்து விடுவார்.. நீ ஓடு" ரணகளத்திலும் ரோய் அரசியல் பேசினான். 


மத்திய கல்லூரி மைதானத்தின் மெதடிஸ்ட் தேவாலய முனையில் இரு கல்லூரி அணிகளிற்குமான கூடாரம் அருகருகே அமைந்திருக்க, யாழ் பொது நூலக மூலையில் யாழ் பரியோவான் கல்லூரி மாணவர்களுக்கு இடம் ஒதுக்கப்பட்டிருந்தது. சுப்ரமணிய பூங்கா பக்கமிருக்கும் வாசலிற்கு வலப்புறம், அணிகளின் கூடாரத்திற்கும் பரி யோவான் மாணவர்களின் கூடாரத்திற்குமிடையில் சூனிய பிரதேசம் (No Man's land), பாதுகாப்பு ஏற்பாடாம். 


பரி யோவான் மாணவர்களின் பாசறையில் நாங்கள் படித்த காலங்களுடன் ஒப்பிடும் போது மாணவர்கள் எண்ணிக்கையில் மிகக்குறைவாகவே இருந்தார்கள். பாடசாலை சீருடை அணிந்து வர பணிக்கப்பட்ட, மாணவர்களிடம் உற்சாகமாமும் வலு குறைவாகவே காணப்பட்டது. 1990ல் சிவப்பு கறுப்பு நிற ஆடைகளணிந்து அட்டகாசத்தால் நிறைந்து வழிந்த பரி யோவான் பாசறை நினைவில் நிழலாட, 2016ல் நாம் கண்ட காட்சி கவலையளித்தது. பரி யோவான் பாசறையில், பரி யோவானின் காவல்துறை அன்று போல் இன்றும் மிடுக்காக அணிவகுத்து நின்றது கண்கொள்ளா காட்சி.

யாழ்ப்பாணம் மாறிவிட்டது... 


பரி யோவான் மாணவர்களின் பாசறை தாண்டி மணிகூட்டு கோபுரம் பக்கம் நகர, யாழ்ப்பாண வெக்கையிலும் கண்கள் குளிர்ச்சியடைந்தன. மாணவர்களிற்கு அந்த பக்கம், பரி யோவான் ஆசிரியர்களின் கூடாரம், கூடாரத்தில் பரி யோவானின் Primary schoolல் கற்பிக்கும் இளம் ஆசிரியைகள், சிவப்பு கறுப்பு நிற சேலைகளணிந்து அமரந்திருந்தார்கள். 


பரி யோவானின் Primary school மிகவும் குளிர்ச்சியானது...அங்கு இருக்கும் பெரிய மரங்களால் மட்டுமல்ல, அங்கு கற்பிக்கும் இளம் ஆசிரியைகளாலும் தான். சுண்டுக்குளி மகளிர் கல்லூரியில் AL முடிக்கும் மாணவிகள் அடுத்த வருடம் பரி யோவானில் அழகிய பாலர் வகுப்பு ஆசிரியைகளாக அவதாரம் எடுப்பார்கள். 


ஆசிரியர்களின் பாசறையில் அமர்ந்திருந்த அமெரிக்காவிலிருந்து வந்து பரி யோவானில் தொண்டர் ஆசிரியர்களாக பணியாற்றும் வெள்ளைக்கார டீச்சர்களுடன் எங்கட ஆணழகன் ஆதி ஸ்டைலாக இங்கிலீஷில் கடலை போட்டது பலரின் வயிற்றெரிச்சலை கிளப்பியது. 

டேய் ஆதி, உன்ட அட்டூழியங்களுக்கு அளவேயில்லையா ?


கண்களில் குளிர்ச்சியை ஏற்றிக்கொண்டு நகர, பரி யோவான் பழைய மாணவர்களிற்கான கூடாரம் நம்மை வரவேற்றது. ஷண்டி அண்ணா கொண்டு வந்து இறக்கியிருந்த Paparae band முழங்க, பம்பல் கோஷ்டிகள் குழுமி கும்மாளம் அடித்த மைதானத்தின் ஒரே பகுதி இந்த உயர் குதூகல வலயம் மட்டுமே. எந்நேரமும் Paparae வாத்தியங்கள் இசையும் அதற்கு ஆடிக்கொண்டேயிருந்த ஆதிகால ஜொனியன்ஸும், பல ஆண்டுகளிற்கு பின்னர் சந்தித்த நண்பர்களை கண்டதும் "மச்சாஆஆஆன்" என்று கத்தி கட்டித்தழுவி சத்தமாய் சிரித்து எழுப்பிய ஆனந்த ஒலிகளும் என்று, பரி யோவான் பழைய மாணவர் பாசறையில் உற்சாகமும் நட்பும் கரைபுரண்டோடியது. 


பரி யோவான் பழைய மாணவர் பாசறை தாண்டினால், மீண்டும் சூனிய பிரதேசம், (No man's land) பந்தோபஸ்தாம். மணிக்கூட்டு கோபுரத்தடியில் இருந்த scoreboard தாண்டி மற்றப்பக்கத்தில் யாழ் மத்திய கல்லூரி பழைய மாணவர்களின் பாசறை. மத்திய கல்லூரியின் 200வது ஆண்டு நிறைவு விழாவை முன்னிட்டு வெளிநாடுகளிலிருந்து வந்திருந்த நூற்றுக்கணக்கான மத்திய கல்லூரி பழைய மாணவர்களால், அந்த பாசறை நிறைந்து வழிந்தது. 


வெளிநாடுகளிலிருந்து வந்திருந்த மத்திய கல்லூரி மாணவர்கள் பரி யோவான் கல்லூரியின் பழைய மாணவர்களுடன் மிகவும் அந்நியோன்னியமாகவும் சிநேகபூர்வமாகவும் பழகியது, இந்த முறை மைதானத்தில் எந்தவித குழப்பங்களும் ஏற்படாமல் விட்டதற்கு ஒரு பிரதான காரணம். அதனால் தான், இந்த முறை நடந்த போட்டி "most friendliest big match ever" என்று வரலாற்றாசிரியர்களால் வர்ணிக்கப்படுகிறது.


மத்திய கல்லூரி முன்றலில், பொது மக்களிற்கான கூடாரமும் வேம்படி மகளிர் கல்லூரி, சுண்டுக்குளி மகளிர் கல்லூரி மாணவிகளிற்கான கூடாரமும் அமைக்கப்பட்டிருந்தது. மகளிர் கல்லூரி கூடாரங்களிலும் ஒரு வித அமைதி குடிகொண்டிருந்தது, ஏமாற்றமளித்தது. அந்த கூடாரங்களின் நடுவில், விசேஷ விருந்தினர்களிற்கான கூடாரத்தில் கோட் சூட் அணிந்த நீதிபதி இளஞ்செழியனும் சாரம் கட்டிய அமைச்சர் அர்ஜனா ரணதுங்காவும் இறுக்கமான முகத்தோடு அமர்ந்திருந்தார்கள்.

Relax boys.. சிரிங்க பாஸ்


மத்திய கல்லூரி நாணய சுழற்சியில் வெற்றி பெற்று முதலில் துடுப்பெடுத்தாட தீர்மானித்தது. அணிகள் களமிறங்க தயாராக, மத்திய கல்லூரி பழைய மாணவர்கள் கொடிகளுடன் மைதானத்திற்குள் இறங்கி விக்கெட்டுகளின் முன் நின்று கற்பூரம் கொளுத்தி மணியடித்து பூஜை செய்தார்கள். நாங்களும் இறங்கி பரலோகத்தில் இருக்கிற பிதாவை நோக்கி ஜெபிப்போமா என்று சிந்திக்கவும் நீதிபதி இளஞ்செழியன் ஒருக்கா எழும்பி தனது இருப்பை காட்டிவிட்டு இருக்கவும் சரியாகவிருந்தது. 

பரி யோவான் மாணவர்கள் ஒழுக்கசீலர்கள், பழைய மாணவர்களும் 


மூன்றாவது ஓவரில் மத்திய கல்லூரி அணி தனது முதலாவது விக்கெட்டை இழக்க, நாங்கள் ஆரவாரித்து கொண்டு பரி யோவான் ஆசிரியைகள் இருந்த பக்கம் தாண்டி மாணவர்கள் இருக்கும் பாசறை நோக்கி புறப்பட, பொலிஸாரால் தடுக்கப்பட்டோம். சிங்கள பொலிஸோடு சிநேகமாகி "மொகத பொஸ்" என்று அளவுளாவ, பரி யோவான் நிர்வாகம் தான் அந்த கட்டுபாட்டை விதித்ததாகவும் பழைய மாணவர்களுக்கு என ஒதுக்கப்பட்ட இடத்திலிருந்து யாரும் வேறு பகுதிகளிற்கு போக தடைவிதிக்கப்பட்டுள்ளது என்றும் சிங்கள பொலிஸ் தமிழர்களிற்குள் பிரச்சனை தீயை மூட்டி விட்டான். 

கருணா அம்மானில் வெற்றிகண்ட சூட்சுமம், நம்மிடம் வேகாது.


தடையை அகற்ற நாங்கள் பரி யோவான் நிர்வாகத்துடன் நடாத்திய பேச்சுவார்த்தை தோல்வியில் முடிந்தது. பேச்சுவார்த்தையில் ஈடுபட்ட பரி யோவான் நிர்வாகத்தின் அணுகுமுறை வேதனையளிக்க, வெறுத்து போய் மைதானத்தை விட்டு வெளியேறி, சூடாற இளநீர் குடிக்க றீகல் தியேட்டரடிக்கு போனோம். இளநீர் குடித்துவிட்டு திரும்பிவர, ஒரு சின்ன ட்ரக்கில் பரி யோவான் மாணவர்கள் கொடிகளோடும் பீப்பிகளோடும் தாரை தப்பட்டைகளோடும் நிற்கிறாங்கள்.

என் இனமே என் சனமே

"தம்பி நாங்களும் வரட்டோ" பம்மினோம், ஆட்டத்திற்கு எங்களையும் சேர்ப்பாங்களோ என்ற சந்தேகம்.

"அண்ண.. என்ன விசர்க்கதை.. ஏறுங்கோ" .. தம்பிடா

"ஏத்திவிடுங்கோடா" முக்கி தக்கி ட்ரக்கில் ஏறினோம், இல்லை தம்பிமார் ஏற்றி விட்டார்கள்.


தொடரும்...

அனுபவித்ததிலிருந்து 1....2016 Big Match
http://kanavuninaivu.blogspot.com.au/2016/03/2016-big-match.html

அனுபவித்ததிலிருந்து 3....2016 Big Match
http://kanavuninaivu.blogspot.com.au/2016/04/3-big-match-2016.html





Thursday, 17 March 2016

அனுபவித்ததிலிருந்து.. 2016 Big Match




மார்ச் 10, 2016.. வியாழக்கிழமை 

அத்தியடி பிள்ளையார் கோயிலின் காண்டாமணி சத்தம் கேட்டு  விழித்து எழும்ப, ஒரு வித பரபரப்பு பற்றிக் கொண்டது. மீண்டும் Big Match பார்க்க போகிறேன் என்ற நினைப்பு, கொட்டாவியை கலைத்து, சோம்பலை முறித்து, குளியலறைக்கு வீறுநடை போடவைத்தது. குளியலறைக்குள் நண்பன் அருள், கதவு மூடியிருக்க, ஃபோனில் டைப் பண்ணும் டிக் டிக் சத்தம் மட்டும் கேட்டது.


அருள், கணா, ஆதி, ரகு என்னோடு வீட்டில் தங்க லண்டனிலிருந்து வந்திருந்த சுரேன், இன்பன், சிறிபிரகாஷ், ஜெய், டோனி, அரவிந்தன் ஆகியோர் Jet Wingsலும் கஜன் தன்ட வீட்டிலும் சுது சிறி, அம்மான் ரோயோடும் டாக்டர் விஜயன் தன்னுடைய மாமி வீட்டிலும் தங்கியிருந்தார்கள். 


"டேய்.. மொழி.. அன்டிமாரோடு அலட்டிறதை நிற்பாட்டி போட்டு கெதியா குளிடா.."


ராணி சோப் போட்டு குளித்து முடித்து எங்கட batchற்கு என்று பிரத்தியேகமாக தைத்த big match tshirt அணிந்து, விறாந்தையிலுருந்து தேத்தண்ணி குடிக்கிறோம். யாழ்ப்பாண காலைகளிற்கு ஒரு தனித்துவமிருக்கும். காற்றில் ஒரு தெய்வீக மணம் கமழ காலை சூரியன் மண்ணை தழுவ தொடங்கும் கணங்கள் ரம்மியமானது.  தேத்தண்ணி குடித்து முடித்து, முதல் நாள் தம்பி Akarsanனிடம் வாங்கிய சிவப்பு கறுப்பு ஒலைத்தொப்பி, Nike சப்பாத்து அணிந்து தயாராகவும் ஓட்டோ குமாரின் ஓட்டோ வந்து நிற்கவும் சரியாகவிருந்தது.


ஓட்டோ குமார், எங்களை பார்த்து ஒரு நக்கல் சிரிப்பு சிரிக்கிறார். யாழ்ப்பாணத்தின் ஆதிகால வாசிகளை கண்டால் நவீன யாழ்ப்பாணத்தானுக்கு நக்கல் வரும் தானே. ராசாவின் தோட்ட வீதியில் மிதந்து, ஓட்டோ ஆஸ்பத்திரி வீதியில் இடப்பக்கம் திரும்ப வெளிக்கிட..

"குமார், கொன்வென்ட் பக்கமாய் விடுங்கோ".


பிரதான வீதியில் வெள்ளை சீருடையில் சிவப்பு வெள்ளை, சிவப்பு கறுப்பு, மஞ்சள் கறுப்பு கழுத்து பட்டிகள் அணிந்த பெட்டைகளை காண நாங்களும் பதின்மத்திற்குள் மீண்டும் சங்கமமானோம். பஸ்தியான் சந்தியில் காக்கி சீருடையில் பொலிஸ்காரன் வெறுப்பேத்தினான். பரி யோவானின் Primary school gate அடியை எட்டி பார்த்து சவக்காலை தாண்டி பரி யோவானின் பிரதான வாயிலில் ஓட்டோ குமார் ஓட்டோவை நிறுத்த, ஓட்டோவிலிருந்து குதித்து இறங்கினோம். 


நடையில் ஒரு துள்ளலுடன், கம்பீரம் மாறத Church, நவீன Office கடந்து மிடுக்கான Handy library தாண்டி பழமை மாறாத Robert Williams மண்டபம், புதிய யுகத்தின் Peto Hall கடந்து பரி யோவான் மைதானத்தை அண்மிக்கிறோம். மைதானத்தின் மறுபுறம் பரி யோவானின் Score board நம்மை வரவேற்றது. 



அன்று காலை பரி யோவானின் கிரிக்கட் அணியினருடனும் விடுதி மாணவர்களுடனும் காலை உணவு அருந்த 1992 உயர்தர பிரிவு மாணவர்களாகிய நாங்கள் அழைக்கப்பட்டிருந்தோம், உபயம் சிட்னி பழைய மாணவர் சங்கம். முதல் நாள்,  Peto Hallல் பரி யோவானின் கிரிக்கட் அணியுடன் எங்கட batchஐ பிரத்தியேக படம் எடுக்க வைத்து எங்கள் batchன் யாழ்ப்பாண குறூப் அசத்தியிருந்தார்கள். 


Dining Hallல் 1982 batch அண்ணாமாரும் இணைந்து கொள்ள பம்பல் களைகட்டியது. சென்னையிலிருந்து வந்திருந்த ஷண்டி அண்ணா யாழ்ப்பாண தோசையை ஒரு பிடிபிடித்து கொண்டு தான் ஆம்பூர் பிரியாணி சாப்பிட்ட கதையை சொன்னார். "பசைவாளி" விக்னபாலன் அண்ணா, Dr. Peter Selvararnam, Dr. Theivendra என்று மண்டபம் நிறைய தொடங்க, பரி யோவான் மாணவ தலைவர்கள் விடுதி மாணவர்களை ஒழுங்கமைத்து பழைய மாணவர்களிற்கு இடம் ஒதுக்கித் தந்தார்கள். 


"கண்ணன்.. இவரை யார் என்று தெரியுதா" கை கழுவ போன இடத்தில் விக்கி அண்ணா கேட்டார்.

நாங்கள் படித்த காலத்தில் Libraryயில் கடைமையாற்றிய கண்ணன் தான் இப்ப பரி யோவானின் சமையல்துறை பொறுப்பாளர். செந்தளிப்பு மாறாத முகத்தோடும் என்றும் மாறாத புன்னகையோடும்

"இஞ்ச பாருங்கோ.. யாரை பாரத்து, தெரியுமோ என்று கேட்டனீங்கள்"

யாழ்ப்பாணத் தமிழில் கண்ணன் முகமனிற்காக பொய் சொல்ல, ஈரமான கைகள் பற்றிக்கொண்டன.

"கண்ணன்.. முந்தி library மிஸ்ஸிற்கு ஒரு பட்டம் வைத்திருந்தனாங்கள்.. ஞாபகம் இருக்கோ"

கண்ணனுக்கு வந்தது வெட்கமா சங்கடமா என்று கணிக்க நிதானிக்காமல்

"கடிநாய்" 

வாய் பொத்திக்கொண்டு கண்ணன் பலமாய் சிரிக்கிறார். 

காலையுணவு அருந்திய பரி யோவானின் கிரிக்கட் அணி, தேவாலயம் நோக்கி நகர தொடங்க வழியெங்கும் உற்சாகம் ததும்பும் பழைய மாணவர்கள். கறுப்பு சிவப்பு நிற வேட்டியும் சேர்ட்டும் அணிந்து 2006 batchகாரன்கள் பரி யோவானில் தமிழை நினைவுறுத்தினார்கள். 

"Come on boys"

"All the best".

தோளில் தட்டியும் கைலாகு கொடுத்தும் கிரிக்கட் அணியை உற்சாகப்படுத்தினார்கள். 

"ஐசே, நீர் அஞ்சு விக்கெட் எடுத்தீரென்றால் ஒரு லட்சம்"

"தம்பி, 146 ரன்கள் அடிச்சா அம்பதாயிரம் தாறன்"

பரி யோவான் அணியின் கப்டன் கானமித்திரனும் வைஸ் கப்டன் ஜெனின் ஃபெளிமிங்கும் சிரித்து கொண்டே தலை குனிந்தார்கள்... பரி யோவானில் அவையடக்கம் ? 


பரி யோவானின் தேவாலத்தின் Altarல் பரி யோவானின் கிரிக்கட் அணி வரிசையாக முழுந்தாளிட்டு பணிய, தேவாலயத்தின் போதகர் ஆங்கிலத்தில் ஜெபிக்கத்தொடங்கினார். 

"We pray for both teams"

"Let these boys carry Jaffna and St John's..."

போதகரைத் தொடரந்து பரி யோவானின் அதிபர் வணக்கத்திற்குரிய ஞானபொன்ராஜா தமிழில் இறைவனை நோக்கி மன்றாடினார். 

"இறைவனின் அருள் என்றும் எம்மோடு இருப்பதாக"


எமது Batchற்கு கல்லூரி கொடி தைக்கும் பொறுப்பை ஏற்றிருந்த வாதுலன் அதில் தனித்துவமாக 92 என்ற இலச்சினையையும் சேர்த்து தைத்திருந்தான். யாழ்ப்பாணத்தின் பிரபல மருத்துவரும் எமது batch நண்பனுமாகிய கோபிசங்கரின் வாகனத்தில் paparae இசை முழங்க கல்லூரி கொடி பட்டொளி வீசி பறக்க பரி யோவான் அணியை களத்திற்கு அழைத்து போகும் வாகன தொடரணி அணிவகுக்க தொடங்கியது. 


1990ல் கண்ட நூற்றுக்கணக்கணக்கான சைக்கிள்கள் காணாமல் போக, வேட்டி கட்டிய 2006 batch காரன்கள் மோட்டார் சைக்கிள்களில் உறுமினார்கள். பஸ்தியான் சந்தியில் தொடங்கிய மோட்டார் வாகனங்களின் அணிவகுப்பு கல்லூயின் மைதானம் வரை நீண்டது. எங்கும் சிவப்பு கறுப்பு கொடிகள் அசைந்தாடின.


"வெளிக்கிடட்டாம்".. எங்கேயோவிருத்து யாரோ சொல்ல, யாழ்ப்பாணத்தின் பிரதான வீதி வழியாக பரி யோவானின் கிரிக்கட் அணி, யாழ் மத்திய கல்லூரியின் மைதானத்தை நோக்கி அழைத்து வரப்படுகிறது. வழிநெடுக சனம் நின்று வேடிக்கை பார்க்க, பொலிஸ்காரனும் சிரித்து கொண்டே வழி அமைத்து கொடுக்க, பரி யோவானின் வாகன பேரணி இருபுறமும் பெரிய மரங்கள் நிறைந்த பிரதான வீதியில் கம்பீரமாக நகர்கிறது.


"கெதிபடுத்தட்டாம்".. தண்ணீர் தாங்கியடியில் கட்டளை வர, வாகன அணி வேகம் பிடித்தது. யாழ் ஹோல், பிலிப்பரின் நேர்ஸிங் ஹோம், பொம்மர் அடித்த சென் ஜேம்ஸ் தேவாலயம் கடந்து பரி யோவானின் வாகன அணி அட்டகாசமாய் முன்னேறுகிறது. முதலாம் குறுக்கு தெரு தாண்ட, திடீரென்று சத்தங்கள் நிறுத்தப்பட, ஆர்ப்பாட்ட ஊர்வலம் மெளனமாகிறது.

"ஏன்டா மச்சான், ஏதும் சிக்கலோ" கோபியை கேட்டேன்

"கோர்ட்ஸ் (நீதிமன்றம்) மச்சான்" கோபி.


யாழ் மாநகர சபை கட்டிடம் இருந்த காணி கடந்து, தந்தை செல்வா நினைவுத்தூபி இருக்கும் வளைவில் திரும்புகிறோம். தமிழ் தேசியத்தின் தந்தையையும் தலைவரையும் தமிழ் தேசம் என்றும் மறவாது. அங்கால 1981ல் இலங்கை அரசபடைகளால் எரிக்கப்பட்ட யாழ் நூலகம், இன்று புதுப்பொலிவுடன் மீண்டாலும், அந்த சம்பவம் ஏற்படுத்திய மனக்காயம் மட்டும் ஆறவில்லை. நூலகத்திற்கு முன்னால் போகும் வீதியில் கோபி, காரை லாவகமாக திருப்பி சுப்ரமணிய பூங்காவிற்கு முன்னாள் நிறுத்துகிறான். 



மத்திய கல்லூரி வாசலடியில் பரி யோவான் அணியை வரவேற்க, மத்திய கல்லூரியின் கிரிக்கட் அணி வரிசையாய் நிற்க, வெள்ளை மற்றும் நீல நிற சீருடையணிந்த மத்திய கல்லூரியின் பாண்ட் அணி வரவேற்பு இசை முழங்க கம்பீரமாக தனது அணிவகுப்பை  தொடங்கியது.  இரு கல்லூரி அணிகளுடன் நிகழ்வில் கலந்து கொண்ட இலங்கை கிரிக்கட் அணியின் முன்னாள் தலைவரும் இன்னாள் அமைச்சருமான அர்ஜுன ரணதுங்கவும் யாழ்ப்பாண நீதிபதியும் பரி யோவானின் பழைய மாணவனுமாகிய இளஞ்செழியனும் மைதானத்திற்குள் அழைத்து வரப்பட்டார்கள்.

தொடரும்....







Thursday, 10 March 2016

யாழ்ப்பாணத்தில்.....


நாற்பது சொச்ச வருட வாழ்க்கையில் மிகக் குறைந்தளவு வருடங்களே யாழ்ப்பாணத்தில் வாழ்ந்திருந்தாலும், யாழ்ப்பாணத்தில் கொண்ட காதல், கொழும்பிலோ மெல்பேர்ணிலோ வரவில்லை. யாழ்ப்பாணத்தை நான் அன்றும் காதலித்தேன், இன்றும் காதலிக்கிறேன். யாழ்ப்பாணம் மட்டும் என் காதலை என்றும் ஏற்றதில்லை, ஆனாலும் ஒரு தலை காதலாக என் காதல் தொடர்கிறது. அவள் என் காதலை ஏற்க விடாப்பிடியாக மறுக்க மறுக்க, யாழ்ப்பாணத்தில் எனக்கிருக்கும் காதலும் வீறாப்பாய் தொடர்கிறது.


யாழ்ப்பாணம்..
என்றென்றும் என் காதலி
என்னை காதலிக்காத காதலி


டுபாயிலிருந்து கொழும்புக்கு விமானம் ஏற ஆயத்தமாக "யாழ்ப்பாணம் போகப் போகிறேன்" என்று மனம் உற்சாகமாக, கண்கள் பனித்தன. சென்னை தாண்டி, இலங்கைத் தீவிற்கு மேல் விமானம் பறக்க, ஒரு சிறுவனை போல் யன்னலில் முகம் புதைத்து யாழ்ப்பாணத்தை தேடுகிறேன். மறைத்த முகில் அகழ, நாங்கள் கோலோட்சிய  நீல நிற ஆழக்கடலில், யாழ்ப்பாணத்தை தேடுகிறேன். பார்வைக்குள் வர அவள் மறுக்கிறாள். விமானத்தின் வலப் பக்கத்தில் நான், விமானத்தின் இடப் பக்கத்தில் யாழ்ப்பாணம், தொடர்ந்தும் என்னை யாழ்ப்பாணம் தவிக்க வைத்தது.


யாழ்ப்பாணம்..
என்றென்றும் என் காதலி
என்னை காதலிக்காத காதலி


சிவராத்திரி விடுமுறை தினத்தில், கட்டுநாயக்காவில் விமானம் தரையிறங்க, கட்டுநாயக்கா மண்ணில் 2001ல் வீரசரிதம் படைத்த மறவர்களை நினைவில் நிறுத்தி, கண் மூடி ஜெபிக்க தொடங்கினேன். ஒவ்வொரு முறை கட்டுநாயக்காவில் விமானம் தரையிறங்கும் போதும், அந்த மறவர்கள் நினைவில் நிழலாடுவார்கள். தோளில் Backpackஐசுமந்து கொண்டும் மற்ற கையில் Bagஐ இழுத்து கொண்டும் விமானத்திலிருந்து பரபரப்பாக இறங்குகிறேன்.


விமான நிலையத்தில் முந்தைய தடவைகளில் நம்மை பயமுறுத்திய மகிந்தவின் மாபெரும் படம் இருந்த இடத்தில் குட்டியாய் My3 சிரித்தார். அந்த இடத்தில் ஒருக்கா நின்று,  முஷ்டி மடக்கி கையை முன்னும் இழுத்து "yes we did it" என்று ஆட்டம் போட்டது மனது. பம்மடிக்க போன இடத்தில், என்னுடைய சிங்களத்தை பரிசோக்க பாத்ரூமில் ஒருத்தன் தனியா மாட்டினான்.


"அத நிவாடு தவசத, பொஸ்" (இன்று விடுமுறை நாளா ?) சிங்களத்தில் கன்னியுரையாற்றினேன்.

"ஓவ் (ஓம்)" துடைப்பத்தை வைத்துவிட்டு அவன் பதிலளித்தான்.

"மொகடத நிவாடு" (எதுக்கு விடுமுறை). வாவ்...சிங்களம் புகுந்து விளையாட, நானே ஆச்சரியப்பட்டு கொண்டு, மல்லியை பரிசோதித்தேன்.


தலையை சொரிந்து கொண்டே "மொகத..மெஹே... மே... அற.. மங் தன்னஹா" (எனக்கு தெரியாது). சிவராத்திரிக்கு விடுதலையென்று தெரியாத குடிமகன் இருக்கும் வரை நல்லிணக்கம் என்பது ஒரு நீண்ட தூரபயணமாய் தானிருக்கும்.


குடிவரவு பகுதியில் நாவல் கலர் சீலை அணிந்த பெண் அதிகாரிகள் இறுக்கமான முகத்துடன் பாஸ்போர்ட்டை வாங்கினார்கள். 2002ல் திமிராய் சொன்ன "வணக்கம்" நினைவில் வர "ஆயு..." வரமறுக்க, "Good morning" .


"ஓயா டுவள் சிட்டிசன் த (நீங்கள் dual citizen ஆ)... நாவல் சேலை பெண் அதிகாரி வினா தொடுத்தாள். ஒஸ்ரேலியன் பாஸ்போர்ட், பார்த்தும் இங்கிலீஷ் வர மறந்ததோ ? மறுத்ததோ ?


"நஹா (இல்லை)", பதில் பக்கென்று வந்தது, நாங்களும் நாகவிகாரைக்கு போகாமலே நல்லிணக்க சமிக்ஞை காட்டினோம்.

"என சரை எனகொட கண்ட" (அடுத்த முறை வரும் போது எடுங்கோ) ஆஹா.. சாணக்கியமாய் கவித்திடுவீங்களோ ? இது தான் நல்லாட்சியோ ?


கொழும்பிலிருந்து மழை தூறி ஆசிர்வதிக்க, பரி யோவான் நண்பர்களுடன் யாழ்ப்பாணம் நோக்கிய பயணம் தொடங்கியது. காதலியை காணப்போகும் படபடப்பு தொற்றிக்கொள்ள, சூரியன் FMல் "என்னவென்று சொல்லுவது வஞ்சியவள் பேரழகை" பாட்டு ஒலித்தது. அநுராதபுரத்தில் நிற்பாட்டி இஞ்சி போட்ட ப்ளேன் டீ குடித்துவிட்டு, மதவாச்சி தாண்டி, வவுனியா எல்லைக்கோடு கடக்க, மண் மணம் மணக்க தொடங்கியது.

யாழ்ப்பாணம்..
என்றென்றும் என் காதலி
என்னை காதலிக்காத காதலி


தாண்டிக்குளத்திலும் ஓமந்தையிலும் பஸ் நிற்காமல் போக, இல்லாமல் போன ஒன்றை ஏனோ மனம் தேடியது. புளியங்குளம் தாண்ட விடிய மூன்று மணியாகிவிட்டது. நித்திரை வர மறுக்க, பஸ்ஸின் முன்படியில் இருந்து, ஓயாமல் அலையடித்த ஏ9 வீதியை பார்த்துக்கொண்டே பயணம் தொடர்ந்தது.

புளியங்குளம்...கனகராயன்குளம்..மாங்குளம்.


"முருகண்டி நவத்தண்ட" ( முருகண்டியில் நிற்பாட்டுங்கோ) ஓட்டுனரிற்கு கட்டளை பறந்தது. வன்னி காத்து பட்டதும் அண்ணருக்கு வீரம் வந்திட்டுதோ ? முருகண்டியில் கற்பூரம் ஏத்தி, தேங்காய் உடைத்து, டீ குடித்து கொண்டே ஒரு உதயன் பேப்பரை வாங்கி நாலு பேர் சுத்தி நின்று வாசிக்க.. அன்று நாம் வாழ்ந்த வாழ்க்கை மீண்டது போலிருந்தது.


கிளிநொச்சி நகர் தாண்ட இதயம் கனத்தது. இதில தான் அது இருந்தது அதில தான் இது இருந்தது என்று நித்திரையால் எழும்பின பெடியள் கதைத்தது காதில் விழுந்தது. பரந்தன் தாண்டி ஆனையிறவு நெருங்க, இராணுவத்தின் வெற்றி சின்னத்தை பற்றி ட்ரைவர் தனது கோலயாவிற்கு பெருமையாக பீத்தி என்னை வெறுப்பேத்தினான்.


இத்தாவில் கடந்து முகமாலை தாண்டி தென்மராட்சியில் பஸ் பயணிக்க தொடங்க, நினைவுகள் இழப்புகள் தோல்விகள் என மனம் அசைபோட்டது.  சாவகச்சேரி, கைதடி, நாவற்குளி பாலம் கடந்து போக, காதலியை காணப்போவதை நினைத்து இதயத்துடிப்பு அதிகரிக்க ஆரம்பித்தது.


அதோ அவள்.. கண்டுவிட்டேன்..
அதோ யாழ்ப்பாணம்.. கண்டுவிட்டேன்..
காலை சூரிய ஒளியில் அவளை காண கண்கோடி வேண்டுமே. கட்டபிடித்து முத்தம் கொடுக்க விடமாட்டாள், அவள் காதலிக்கவே இல்லை, இதுக்குள் முத்தமும் மண்ணாங்கட்டியும். சரி தொட்டு தான் பார்க்கலாம் என்றால், கன்னத்தில் அறை விழும் என்று பயம். எட்ட நின்றே அவளை தரிசிப்பேன், எட்ட நின்றே அவளை காதலிப்பேன்.


ஆஹா.... அவள் சிரிக்கிறாள்.. நான் சிலிர்க்கிறேன். அவள் பார்வையால் என்னை வரவேற்க நான் அவள் பாதம் தொட்ட மண்ணை கையில் எடுத்து நெற்றியில் ஒற்றி கொண்டேன்.

யாழ்ப்பாணம்..

என்றென்றும் என் காதலி
என்னை காதலிக்காத காதலி

என்றாவது என்னை விரும்புவாள்
அதுவரை..
காத்திருப்பேன்..
காதலோடு காத்திருக்கிறேன்





Thursday, 3 March 2016

1990 Big Match.......பரி யோவான் பொழுதுகள் :



கடினமான சமூக பொருளாதார  நெருக்கடிகளை எதிர்தோக்கும் நாடுகள், அதிலிருந்து மீள அந்த தேசத்தின் விளையாட்டு அணிகள் ஈட்டும் வெற்றிகள் தேசத்தின் மீள் எழுச்சிக்கான அடித்தளமாக அமையும். 70களில் கரீபியன் தீவுகளில் Clive Lloydன் மேற்கிந்திய தீவுகள் கிரிக்கட் அணியும்  80களில் இங்கிலாந்தில் Ian Bothamன் கிரிக்கட் அணியும் தங்கள் தங்கள் தேசத்தின் மீளெழுச்சியில் பெரும்பங்காற்றின.


1985ல் அதிபர் ஆனந்தராஜாவை இழுந்ததுடன் ஆரம்பித்த பரி யோவான் கல்லூரியின் இருண்ட காலங்கள், 1980களின் இறுதி வருடங்களில் பரி யோவானை உலுப்பி எடுத்ததன. 1988 டிசம்பரில் யாழ்ப்பாண கச்சேரியடி கார் குண்டு வெடிப்பில் பலியான ஹரிசுதன், திருத்தணிகேசன், 1989ல் யாழ் தேவியில் ஈபிகாரன்களின் கண்மூடித்தனமான துப்பாக்கி சூட்டில் கொல்லப்பட்ட கஜேந்திரன், மண்டையன் குழுவால் கொல்லப்பட்ட அகிலன் மற்றும் தேவகுமார், கடலில் மூழ்கி இறந்த ரஞ்சித், என சாவுகளும் இழப்புகளும் பரி யோவான் வளாகத்தை ஆக்கிரமித்த கொடிய வருடங்கள் அவை.


வாகீசன் (86,87) சஞ்சீவன் (88,89) தலைமை தாங்கிய பரி யோவானின் பலமான கிரிக்கட் அணிகளின் ஆட்டங்கள் யுத்த சூழலால் பெரிதும் பாதிக்கப்பட்டன. அந்த ஆண்டுகளில் யாழ்ப்பாணம் மத்திய கல்லூரியுடனான Big Matchம் நடக்காமல் போனது காலக்கொடுமை. இழப்புகளால் துவண்டு போயிருந்த பரி யோவான் வளாகத்திற்கு ஒரு புத்துணர்ச்சி, moral boost அவசரமாகவும் அவசியமாகவும் தேவைப்பட்டது. 


1990ன் T. சதீசன் தலைமைதாங்கிய பரி யோவானின் கிரிக்கட் அணி உத்வேகத்துடன் ஆடிய ஆட்டங்கள் கல்லூரிக்குள் ஒரு உற்சாகத்தை ஏற்படுத்தியிருந்தது. பரியோவான் கிரிக்கட் அணியின் தலைசிறந்த பயிற்சியாளர் Xavier மாஸ்டர் காலமாக, அவரின் இடத்தில் பரி யோவானின் பழைய மாணவன் சூரியகுமார் கிரிக்கட் அணியை சிறப்பாக வழிநடத்த தொடங்கியிருந்தார். 


1990ன் பரி யோவான் அணியில் விளையாடிய அநேகமானோர் பம்பல்காரன்கள். பரி யோவானிற்கே தனித்துவமான "எடுப்பு" இல்லாத சாதாரண "ஊத்தைவாளிகள்". அணியின் இந்த நடத்தைக்கு சதீசனின் தலைமைத்துவ முன்மாதிரி பிரதான காரணமாக, 1990ன் பரி யோவான் கிரிக்கட் அணி பரி யோவான் வரலாற்றில் மிகப் பிரபலமான அணிகளில் ஒன்றாக  இடம்பிடித்தது. 


1990 பரியோவானின் Big Match அணியில் சுரேன், ஜெகேந்திரன், பிரஷாந்தன், முரளி, சதீசன், விபீஷ்ணா, காண்டீபன், நிரூபன், புஷ்பவினோதன், போல்ராஜ் மற்றும் லக்கி இடம்பெற்றிருந்தார்கள். சிவகுமரன், ஆனந்தபுர சமரில் வீரமரணமடைந்த கேணல் சேரலாதன், அணியின் ஆஸ்தான 12th man. இன்பன், அருள்மொழி, ஏஞ்சல், திருமாறன் எல்லோரும் reserves. கேர்ஷன் O/L சோதனையை காரணம் காட்டி முட்டாள்தனமாக அந்த வருடம் விளையாடவில்லை. 


நூற்றுக்கணக்கான மாணவர்கள் சைக்கிள்களில் ஊர்வலமாக சிவப்பு கறுப்பு நிற கொடிகளுடன் முன்னும் பின்னும் செல்ல, கல்லூரியின் கொடி கம்பீரமாக பறந்த மினி பஸ்ஸில் பரி யோவான் கல்லூரி அணி பிரதான வீதியூடாக மத்திய கல்லூரி மைதானத்திற்கு அழைத்து வரப்படுகிறார்கள். எங்கட batchக்கு அடுத்த கிழமை O/L சோதனை. வீட்டில் அழுது குழறி நாங்களும் Big Match திருவிழாவில் சங்கமமாக, சில பேய்க்கூட்டங்கள் வீட்டிலிருந்து தேற்றம் நிறுவி பழகினாங்கள். 


முகுந்தன் தலைமையிலான மத்திய கல்லூரி அணி துடுப்பெடுத்தாட தயாராக, நடுவர்களை தொடர்ந்து வெள்ளை தொப்பிகள் அணிந்து விண்ணதிரும் கரகோஷத்துடனும் தாரை தப்பட்டை ஒலிகளோடும் பரி யோவான் அணி  மிடுக்காக களமிறங்குகிறது. 

கல்லூரி கல்லூரி 
பரி யோவான் கல்லூரி 


மணிகூட்டு கோபுர முனையில் முதலாவது ஓவரை போட, முழுக்கை நீள வெள்ளை ஷேர்ட் அணிந்து லக்கி நிலையெடுக்க, சுப்ரமணிய பூங்கா முனையில் பரி யோவான் கல்லூரி மாணவர்களின் கூடாரத்தில் உற்சாகம் கரைபுரள்கிறது. 

"போடு மச்சான் 
பொல்லு பறக்க"


மூன்றாவது ஓவர்.....மத்திய கல்லூரி 4 ஓட்டங்களை பெற்றிருந்த நிலையில்... லக்கி வீசிய பந்தில் bails பறக்க மத்திய கல்லூரியின் 
முதலாவது விக்கெட் விழுகிறது. பரி யோவான் பாசறையில் மகிழ்ச்சி காம்ப் அடிக்க தொடங்கிவிட்டது. தண்ணியையும் ஜூஸையும் குடித்து விட்டு மைதானத்தின் எல்லை கோட்டிற்கு வெளியே மாணவர்கள், எல்லை கோட்டில் பரி யோவானின் காவல்துறை. 

-–-------------------------------
லக்கி, பரி யோவானில் கடைசி துடுப்பாட்டகாரன். யாழ்ப்பாண கல்லூரிக்கெதிராக அவன் அடித்த ஒற்றை சிக்கஸரை பார்த்து அதிபர் தேவசகாயமே ஆச்சரியப்பட்டார். இன்று ஓஸ்ரேலியாவில் லக்கி battingல் கலக்குகிறான். எந்தவித உணர்ச்சிகளும் காட்டாமல் எதிரணியின் பந்துவீச்சை துவம்சம் செய்யும் அதிரடி ஆட்டக்காரன். Bowlingம் அப்படிதான், பந்து பட்டு bails பறக்கும்....Australia's Best Tamil cricketer.

-----------------------------------

அந்த வருடம் பரி யோவான் அணியில் நாலு வேக பந்துவீச்சாளர்கள், லக்கி, முரளி, பிரஷாந்தன் மற்றும் சதீசன். மத்திய கல்லூரி 33/1 ஓட்டங்களை எட்ட பிரஷாந்தனும் சதீசனும் மாறி மாறி விக்கெட்டுகளை சரித்து மத்திய கல்லூரியை 33/4 எனும் இக்கட்டான நிலைக்கு தள்ளுகிறார்கள். மத்திய கல்லூரி ஜந்தாவது விக்கெட்டுக்கு ஒரு பலமான partnershipஐ போட, முதலாவது நாள் மதிய இடைவேளை வருகிறது. 


இடைவேளைக்கு பின், அந்த வருடம் அதிகம் பந்து வீசியிராத புஷ்பீயை சதீசன் களமிறக்க, ஐந்தாவது விக்கட் சரிகிறது...92/5. ஏழாவது விக்கெட்டுக்கு பரி யோவான் மீண்டும் கடுமையாக போராட வேண்டியிருக்கிறது. இறுதியில் மத்திய கல்லூரி அணி 156 ஓட்டங்களுக்கு சகல விக்கெட்டுகளையும் இழக்க மதியம் 2 மணியாகிவிட்டது. சதீசன் 4, லக்கி 2, முரளி 2, விக்கெட்டுகளை கைப்பற்றினார்கள்.

சென்ரலால ஏலாது
ஏலுமேன்றா பண்ணிப்பார்


பரி யோவானின் நம்பிக்கைக்குரிய ஆரம்ப துடுப்பாட்ட வீரர்கள் சுரேனும் ஜெகேந்திரனும் அடித்து ஆட தொடங்கினார்கள். வழமையாக நொட்டி தட்டி விளையாடும் ஜெகேந்திரன் leg sideல் six அடிக்க, சுரேனிற்கு அன்றைக்கு cut shot வளமா வாய்த்தது. சுரேனின் ஆட்டத்திற்கு field set பண்ண மத்திய கல்லூரி திணற, பரியோவான் அணி 111/0 என்ற நிலையில் தேத்தண்ணி குடிக்க சென்றது. 


தேநீர் இடைவெளிக்கு பிறகான முதலாவது ஓவரில் ஜெகேந்திரன் ஆட்டமிழக்க, பேயை கலைக்க பிசாசு வந்திறங்கின மாதிரி, ஜெகே போக பிரஷாந்தன் களமிறங்கினார். ஒரு பக்கத்தில் சுரேன் நூறை கண்வைத்து நிதானமாக ஆட மற்ற பக்கம் பிரஷாந்தன் மத்திய கல்லூரியின் பந்து வீச்சை துவம்சம் செய்தார். பவுண்டரி சிக்கஸர் என்று விளாசி தள்ளி 57 ஓட்டங்களுடன் பிரஷாந்தன் களத்தை விட்டகலும் போது அணியின் ஓட்டங்கள் 207/2.

----------------------------------
பின்னாட்களில் Tamil Union அணிக்கு விளையாடிய பிரஷாந்தன், இலங்கை கிரிக்கட் அணி தேர்வில் தமிழன் என்றபடியால் புறக்கணிக்கப்பட்டார். இலங்கை அணித்தேர்வில் அவரிற்கு இழைக்கப்பட்ட அநியாயத்தால் மனமுடைந்து நாட்டை விட்டு வெளியேறினார்.

----------------------------------


தீசன் தீசன்...சதீசன் 
Johnian தீசன்...சதீசன் 

Batஜ சுழற்றி கொண்டு சதீசன் களமிறங்க பரி யோவான் மாணவர்கள் மத்தியில் உற்சாகம். "இன்றைக்கு நல்ல அடி பார்க்கலாமடா" என்று சொல்லி வாய் மூடவில்லை, சதீசன் ஆட்டமிழக்கிறார்...207/3. மத்திய கல்லூரி மாணவர்களிடம் காணாமல் போயிருந்த உற்சாகம், திரும்ப வருகிறது. 


பரி யோவான் பாசறையில் குடிகொண்ட தற்காலிக அமைதி, முரளி அடித்த மாட்டு சிக்ஸரால் கலைகிறது. சுப்ரமணிய பூங்கா பக்கமிருந்து முரளி அடித்த சிக்ஸ், நூலக வளவில் போய் விழ, ஆட்டம் பாட்டம் கொண்டாட்டம் தான்.

அடிடா மச்சான்
பவுண்டரி சிக்ஸர்


1990 Big Matchன் கதாநாயகன் சுரேன், நூறு ஓட்டங்களை எட்ட, மைதானமே எழுந்து நின்று கரகோஷம் எழுப்புகிறது. பரி யோவானின் பழைய மாணவர்கள் மைதானத்திற்குள் இறங்கி சோடா கொடுக்க, மத்திய கல்லூரியின் பழைய மாணவர்கள் "Paulன்ட ரெக்கோர்டை உடைக்க விடாதீங்கோடா" என்று தங்கள் அணியை எச்சரிக்கிறார்கள். Paul பிரகலாதன் 1982ல் அடித்த 125 ஓட்டங்கள் தான் அதுவரை தனி நபரொருவர் Big Marchல் எடுத்த அதிக பட்ச ஓட்டங்கள். 

What's the colour
Red & Black


பரி யோவான் அணி 263 ஓட்டங்கள் எடுத்த நிலையில் முரளி 27 ஓட்டங்களிற்கு ஆட்டமிழுக்க அணியின் baby of the team விபீஷ்ணா களமிறங்குகிறான். சுரேனும் விபீஷ்ணாவும் பரி யோவானின் பிரசித்தி பெற்ற 1992 batch காரன்கள். சுரேனும், விபீஷ்ணாவும், கல்வியிலும் விளையாட்டு மைதானத்திலும் கலக்கிய, இன்று அகிலமெங்கும் கலக்கும் 1992 batchன் சூப்பர் காய்களில் இருவர். இருவரும் முதல் நாள் இறுதிவரை ஆட்டமிழக்காமல் ஆடுகிறார்கள். சுரேன் Paul பிரகலாதனின் சாதனையை முறியடித்து 127ல் முதலாவது நாளை முடிவிற்கு கொண்டு வருகிறார்.


இரண்டாவது நாள் களமிறங்கிய இருவரது ஆட்டத்திலும் ஒரு அவசரம் தெரிகிறது. விபீஷ்ணா cover drivesல் கலக்க பவுண்டரிகள் விண் கூவுகின்றன. 145 ஓட்டங்களை பெற்ற நிலையில் சுரேன் ஆட்டமிழக்க 311/5 என்ற நிலையில் பரி யோவான் அணி தனது முதலாவது இன்னிங்ஸை முடிவிற்கு கொண்டு வருகிறது. விபீஷ்ணா ஆட்டமிழக்காமல் 24 ஓட்டங்களை பெற்றிருந்தான்.

----------------------------------

சுரேன், படிப்பிலும் கிரிக்கெட்டிலும் கலக்கிய ஒரு சகலதுறை மாணவன். "ஆளுக்கு கொஞ்சம் லெவலடா" என்று கல்லூரியில் கதை இருந்தாலும், எல்லோருடனும் நட்பு பாராட்டி பம்பலாக பழகுவான்....லெவல் இல்லாத ஜொனியன்ஸ் யாரும் உண்டோ ?

யாழ்ப்பாணத்தை மட்டுமல்ல இலங்கையையே கலக்க வேண்டிய சுரேனின் கிரிக்கட் பயணம், 1990ல் மீண்டும் தொடங்கிய யுத்தத்தால் தடைபட்டது, வேதனை, கவலை. சுரேன் இன்றும் லண்டனில் மிகச்சிறப்பாக கிரிக்கட் ஆடிவருகிறான்.

-----------------------------------


இரண்டாவது இன்னிங்ஸில் ஆடதொடங்கிய மத்திய கல்லூரியின் ஆரம்ப துடுப்பாட்டகாரர்கள் நிதானமாக ஆடி ஓட்டங்களை குவிக்க, பரி யோவான் பாசறையில் பொறுமை சோதனைக்குள்ளாகிறது. பிரஷாந்தனும் சதீசனும் ஆளுக்கொரு விக்கெட் எடுத்து Openersஐ வீட்டுக்கனுப்ப..36/2. மற்றபக்கத்தால லக்கியும் புஷ்பீயும் விளையாட்டை காட்ட.. 67/4. 

பாஸே பஸியலடே
பூம் பூம் பூம்


அந்த நாள்வரை Big Match ஒன்றில் பரி யோவான் அணி வெற்றி பெற்றதை பார்த்திராத ஒரு தலைமுறை பரி யோவான் மாணவர்கள் மத்தியில் இனம்புரியாத ஒரு உற்சாக உணர்வு ஆட்கொள்கிறது. தொடர்ந்து விக்கெட்டுகள் சரிய, சரிய வெற்றி கண்ணுக்கெட்டிய தூரத்தில்...


எட்டாவது விக்கெட் விழ, மைதானத்திற்குள் நுழைந்த பரி யோவான் பழைய மாணவர்கள், "கடைசி விக்கெட் விழுந்ததும், dressing roomக்கு ஓடுங்கடா, அடி விழும்" என்று பரி யோவான்  அணியை எச்சரிக்கிறார்கள். இதை கேட்டு பயந்த விபீஷ்ணா கையை காட்டி சிவகுமரனை field பண்ண வர சொல்லி விட்டு மைதானத்தை விட்டு அகல்கிறான். ஆட்டம் தொடங்க முதலே எல்லோரிடமும் தன்னை field பண்ண விடுமாறு சிவகுமரன் கேட்டிருந்தான். மிகச்சிறந்த களத்தடுப்பாளரான சிவகுமரன் அணியை உற்சாகமாக வைத்திருந்ததில் பெரும் பங்காற்றியிருந்தான்.


கடைசி விக்கட்.. சுப்ரமணிய பூங்கா முனையிலிருந்து முரளி வீசிய பந்தை மத்திய கல்லூரியின் ரகுதாஸ் உயர்த்தி அடிக்க, பந்து mid onல் நின்ற சதீசனை நோக்கி வருகிறது. அதுவரை கட்டுகோப்பு காத்த பரி யோவான் மாணவர்கள் எல்லை கோட்டை தாண்டி மைதானத்துக்குள் ஓடவும் சதீசன் பந்தை பிடிக்கவும் சரியாக இருந்தது. அந்த காட்சி, சதீசனோடு இணைந்து முழு பரி யோவான் மாணவர்களுமே பிடித்த catch மாதிரி இருந்தது என்று இறப்பதற்கு சில நாட்களுக்கு முன்பு, Michael நவரட்ணராஜா விபரித்தது, இன்றும் காதில் ஒலிக்கிறது. 


பிறகென்ன.. பரி யோவான் அணியை தோள்களில் மாணவர்கள் சுமக்க, மைதானத்தில் சாதாரண உடையில் பிஸ்டலோடு நின்ற இரண்டே இரண்டு போராளிகள் கலவரம் வராமல் தடுத்தார்கள். கடந்த வருடங்களில் இருபதிற்கு மேற்பட்ட இலங்கை பொலிஸ்காரரால் அடக்க முடியாத கலவரத்தை அன்று இரு போராளிகள் அடக்கினார்கள் என்று நினைக்கும் போது நாம் வாழ்ந்த காலத்தை நினைத்து பெருமையாகவும் நாம் இழந்த ஆளுமையை நினைத்து ஏக்கமாவும் உணர்கிறேன். 

வெற்றி வெற்றி வெற்றி..

மைதானத்தில் அன்றிருந்த பழைய மாணவர்களாகட்டும் மாணவர்களாகட்டும் ஆசிரியர்களாகட்டும் யாருக்கும் அந்த வெற்றி என்ற மகிழ்வை எப்படி உணர்ந்து உள்வாங்குவது என்று தெரியவில்லை. பிட்சில் புரண்டு எழும்பியவர்கள் ஒரு புறம், கல்லூரி கொடியை தூக்கிக் கொண்டு மைதானத்தை சுற்றி ஓடியவர்கள் மறுபுறம், ஆனந்த கண்ணீரோடு குந்தி இருந்து அனைத்தையும் உள்வாங்கியவர்கள் ஒருபுறம் என்று உணர்வின் வெளிப்பாடு பல வடிவங்களில் அரங்கேறியது.

1990 Big Matchன் Best Bowler விருதை சதீசனும் Best Allrounder விருதை பிரஷாந்தனும் Best Batsmen மற்றும் Man of the Match விருதுகளை சுரேனும் தமதாக்கிக்கொண்டார்கள்.


மத்திய கல்லூரியிலிருந்து பிரதான வீதி வழியாக வெற்றி பெற்ற பரி யோவான் அணி ஊர்வலமாக அழைத்து வரப்படுகிறது. வெற்றி ஊர்வலத்தில் நூற்றுக்கணக்கான மாணவர்கள் உற்சாகம் கரை புரண்டோட கலந்து கொள்கிறார்கள். ஆடி பாடிக்கொண்டே பரி யோவானின் வெற்றி உலா மெதுவாக நகர, யாழ் பிரதான வீதி ஒரு சில மணித்தியாலங்களிற்கு முடக்கப்படுகிறது. பரி யோவான் கல்லூரியின் பிரதான வாயில் திறக்கப்பட, அணியின் ஒவ்வொரு வீரனும் தோள்களில் தூக்கி கொண்டு வரப்படுகிறார்கள். Peto Hallற்கு முன்பாக வெற்றி விழா களை கட்டுகிறது. பரி யோவானின் கட்டுப்பாடுகள் தற்காலிகமாக தளர்த்தப்பட, கல்லூரி வளாகத்தினுள்
தாரை தப்பட்டைகள் முழங்க பரி யோவான் மாணவர்கள் யாவரும் ஆட தொடங்கினார்கள்...


1990 Big Match தந்த வெற்றியோடும் 1989 A/L சோதனையில், கச்சேரியடி குண்டு வெடிப்பில் கண்ணில் காயம்பட்ட சுபநேசன் Bio பிரிவில் அகில இலங்கையில் முதலாவது இடத்தை பிடிக்கவும், அந்த வருடம் நடந்த O/L சோதனையில் 1992 A/L Batch யாழ்ப்பாண மாவட்டத்தில் அதிகப்படியான 8Dகளை பெறவும், பரி யோவான் மீண்டும் தலை நிமிர்ந்து நடை போட தொடங்கியது..

Lux in tenebris lucet 
Light shines in the darkness

-----------------------------------

சதீசன் பந்தை பிடிக்கமுதலே மாணவர்கள் மைதானத்திற்குள் பாய்ந்த கணத்தை, இறப்பதற்கு சில நாட்கள் முன்பு தனக்கே உரித்தான  ஸ்டைலில் பம்பலாக விபரித்த  Michaelற்கும், தேசத்திற்காக  
தன்னுயிரை அர்ப்பணித்த நண்பன் சிவகுமரனிற்கும் இந்த நினைவுகளை காணிக்கையாக்குவோம். 
-----------------------------------